കോഴിക്കോട്: വടകര വില്യാപ്പള്ളിക്ക് സമീപം കൊറ്റിയാംവെള്ളിയിൽ ഉണ്ടായ സ്ഫോടനത്തിൽ 16 വയസ്സുകാരന്റെ കൈപ്പത്തി തകർന്നു. കൊറ്റിയാംവെള്ളി സ്വദേശി യദു ദേവിനാണ് പരിക്കേറ്റത്. വ്യാഴാഴ്ച വൈകിട്ട് ആറ് മണിയോടെയായിരുന്നു സംഭവം. ഗുരുതരമായി പരിക്കേറ്റ വിദ്യാർത്ഥിയെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

രാഷ്ട്രീയ വിവാദം:

സംഭവം ബോംബ് നിർമ്മാണത്തിനിടെയുണ്ടായ സ്ഫോടനമാണെന്ന് യുഡിഎഫ് ആരോപിച്ചു. ഒരു പ്രാദേശിക സിപിഎം നേതാവിന്റെ ബന്ധുവിന്റെ വീട്ടിലാണ് സ്ഫോടനം നടന്നതെന്നും, സംഭവത്തിന് ശേഷം വീട്ടിൽ നിന്ന് സ്ഫോടക വസ്തുക്കളുടെ അവശിഷ്ടങ്ങൾ നീക്കം ചെയ്തതായും യുഡിഎഫ് നേതാക്കൾ ആരോപിക്കുന്നു. സംഭവത്തിൽ സമഗ്രമായ അന്വേഷണം ആവശ്യപ്പെട്ട് പൊലിസിൽ പരാതി നൽകാനാണ് യുഡിഎഫ് തീരുമാനം.

മറുപടിയുമായി എൽഡിഎഫ്:

യുഡിഎഫിന്റേത് വരാനിരിക്കുന്ന തിരഞ്ഞെടുപ്പ് മുന്നിൽ കണ്ടുകൊണ്ടുള്ള രാഷ്ട്രീയ ആരോപണം മാത്രമാണെന്ന് എൽഡിഎഫ് നേതൃത്വം പ്രതികരിച്ചു. സ്ഫോടനവുമായി പാർട്ടിക്ക് യാതൊരു ബന്ധവുമില്ലെന്ന് പ്രാദേശിക നേതൃത്വം വ്യക്തമാക്കി.

പൊലിസ് വിശദീകരണം:

ക്ഷേത്രത്തിലെ ഉത്സവവുമായി ബന്ധപ്പെട്ട് ലഭിച്ച പടക്കം അശ്രദ്ധമായി കൈകാര്യം ചെയ്തതാണ് അപകടത്തിന് കാരണമായതെന്നാണ് പൊലിസിന്റെ പ്രാഥമിക നിഗമനം. സംഭവസ്ഥലത്ത് ബോംബ് സ്ക്വാഡ് പരിശോധന നടത്തി. വിശദമായ അന്വേഷണത്തിന് ശേഷമേ കൂടുതൽ കാര്യങ്ങൾ വ്യക്തമാകൂ എന്ന് പൊലിസ് അറിയിച്ചു.