മിക്‌സി ജാറിലെ ബ്ലേഡുകളുടെ മൂര്‍ച്ച കുറയുന്നതും ഉള്ളിലെ കറയും പലരുടെയും പരാതിയാണ്. ഇത് പരിഹരിക്കാന്‍ ഇതാ രണ്ട് മിനിറ്റ് ട്രിക്ക്

ബ്ലേഡുകളുടെ മൂര്‍ച്ച കൂട്ടാന്‍

മാസത്തിലൊരിക്കല്‍ അല്‍പം കല്ലുപ്പ് ജാറിലിട്ട് നന്നായി ഒന്ന് അടിച്ചെടുക്കുക. കല്ലുപ്പിന്റെ തരികള്‍ ബ്ലേഡിലുരസി അവയ്ക്ക് മൂര്‍ച്ച കൂട്ടാന്‍ സഹായിക്കും.

കറയും ദുര്‍ഗന്ധവും മാറാന്‍

ജാറിനുള്ളിലെ ഭക്ഷണാവശിഷ്ടങ്ങളുടെ കറയും മണവും കളയാന്‍ അല്‍പം ഡിഷ് വാഷ് ലിക്വിഡും ഒരു സ്പൂണ്‍ വിനാഗിരിയും (Vinegar) ചേര്‍ത്ത് അടിച്ചാല്‍ മതി. ജാര്‍ പുതുപുത്തന്‍ പോലെ തിളങ്ങും.

മിക്‌സി ജാര്‍ ലീക്ക് ചെയ്യുന്നതും എന്‍ജിന്‍ പെട്ടെന്ന് കേടാകുന്നതും ഒഴിവാക്കാന്‍ സഹായിക്കുന്ന ചില കാര്യങ്ങള്‍ കൂടെ നോക്കാം. ഇത് നിങ്ങളുടെ മിക്‌സിയുടെ ആയുസ് വര്‍ധിപ്പിക്കാന്‍ സഹായിക്കും.

മിക്‌സി ജാര്‍ ലീക്കേജും എന്‍ജിന്‍ തകരാറും എങ്ങനെ ഒഴിവാക്കാം?

ജാര്‍ ലീക്ക് ചെയ്യുന്നത് തടയാന്‍

വാഷര്‍ പരിശോധിക്കുക

ജാറിന്റെ അടപ്പിലെയും അടിവശത്തെയും റബ്ബര്‍ വാഷര്‍ (Rubber Gasket) അയഞ്ഞുപോയാല്‍ ലീക്കുണ്ടാകും. ഇത് കൃത്യമായി ഇരിക്കുന്നുണ്ടെന്ന് ഉറപ്പാക്കുക. വാഷര്‍ കേടായതാണെങ്കില്‍ ഉടന്‍ മാറ്റുക.

ബ്ലേഡ് ലൂസാകുന്നത്: ബ്ലേഡ് ഘടിപ്പിച്ചിരിക്കുന്ന നട്ട് അയഞ്ഞാലും വെള്ളം ഇറങ്ങും. ഇത് ടൈറ്റ് ചെയ്തു വെക്കുക.

ലൂബ്രിക്കേഷന്‍: ഇടയ്ക്ക് ജാറിന്റെ അടിവശത്തെ ബുഷില്‍ ഒരു തുള്ളി വെളിച്ചെണ്ണയോ ലൂബ്രിക്കന്റോ പുരട്ടുന്നത് ബ്ലേഡ് ജാമാകുന്നത് തടയും.

മിക്‌സി എന്‍ജിന്‍ കൂടുതല്‍ കാലം നിലനില്‍ക്കാന്‍

അമിതഭാരം ഒഴിവാക്കുക

ജാറില്‍ മുക്കാല്‍ ഭാഗത്തിലധികം നിറച്ച് അടിക്കരുത്. ഭാരം കൂടുമ്പോള്‍ മോട്ടറില്‍ സമ്മര്‍ദ്ദം ഉണ്ടാവുകയും എന്‍ജിന്‍ വേഗത്തില്‍ കേടാവുകയും ചെയ്യും.

തുടര്‍ച്ചയായി ഓടിക്കരുത്

മിക്‌സി ദീര്‍ഘനേരം ഒരേപോലെ ഓടിക്കാതെ 'പള്‍സ്' മോഡില്‍ ഇടവിട്ട് പ്രവര്‍ത്തിപ്പിക്കുക. ചൂടാകുമ്പോള്‍ കുറച്ചുനേരം വിശ്രമം നല്‍കുന്നത് മോട്ടറിന് നല്ലതാണ്.

 ALSO READ: നിത്യേനയുള്ള അസിഡിറ്റി നിസ്സാരമല്ല; അവഗണിച്ചാല്‍ അപകടം..! ഡോക്ടര്‍മാര്‍ നല്‍കുന്ന മുന്നറിയിപ്പ്

ചൂടുള്ള ഭക്ഷണം വേണ്ട

തിളച്ച ആവി പറക്കുന്ന സാധനങ്ങള്‍ മിക്‌സിയിലിട്ട് അടിക്കരുത്. ഇത് ജാറിനുള്ളിലെ പ്രഷര്‍ കൂട്ടി അടപ്പ് തെറിച്ചുപോകാനും വാഷര്‍ കേടാകാനും കാരണമാകും.

മിക്‌സി തറയില്‍ ഉറപ്പിച്ചു വെക്കുക

മിക്‌സിയുടെ അടിയിലുള്ള 'വ്യൂക്വം ലെഗ്ഗുകള്‍' തറയില്‍ ഉറച്ചിരിക്കണം. അല്ലാത്തപക്ഷം ഉണ്ടാകുന്ന വൈബ്രേഷന്‍ എന്‍ജിന്‍ ഷാഫ്റ്റിന് തകരാറുണ്ടാക്കും.

To prevent mixer jar leaks, regularly inspect and replace rubber gaskets, while protecting the motor by avoiding overloading and cooling down hot foods before blending.