മലപ്പുറം: സോഷ്യൽ മീഡിയയിൽ സജീവമായ മോട്ടിവേഷണൽ സ്പീക്കറും മുൻ പൊലിസ് ഉദ്യോഗസ്ഥനുമായ ഫിലിപ്പ് മമ്പാട് പോക്സോ കേസിൽ പിടിയിലായി. 16 വയസ്സുള്ള പെൺകുട്ടിയെ ലോഡ്ജിൽ വെച്ച് പീഡിപ്പിച്ചെന്ന പരാതിയിലാണ് നിലമ്പൂർ പൊലിസ് ഇയാളെ കസ്റ്റഡിയിലെടുത്തത്.

സംഭവത്തെക്കുറിച്ച് പൊലിസ് പറയുന്നത്:

 2022 സെപ്റ്റംബറിലാണ് കേസിനാസ്പദമായ സംഭവം നടന്നത്. കോഴിക്കോട് ചേവായൂർ സ്വദേശിയായ 16 വയസ്സുകാരിയെ ഫിലിപ്പ് മമ്പാട് ലോഡ്ജിൽ വെച്ച് ലൈംഗികാതിക്രമത്തിന് ഇരയാക്കിയെന്നാണ് പരാതി.ഇന്നലെ രാത്രി വൈകിയാണ് പൊലിസ് ഇയാളെ കസ്റ്റഡിയിലെടുത്തത്. നിലവിൽ ചോദ്യം ചെയ്യൽ തുടരുകയാണെന്നും അറസ്റ്റ് ഉടൻ രേഖപ്പെടുത്തുമെന്നും നിലമ്പൂർ പൊലിസ് അറിയിച്ചു.

ആരാണ് ഫിലിപ്പ് മമ്പാട്?

പൊലിസ് സേനയിൽ നിന്ന് വിരമിച്ച ശേഷം മോട്ടിവേഷണൽ സ്പീക്കറായും സോഷ്യൽ മീഡിയ ഇൻഫ്ലുവൻസറായും തിളങ്ങിയ വ്യക്തിയാണ് ഫിലിപ്പ്. ജീവിതവിജയത്തെക്കുറിച്ചും മാനസികാരോഗ്യത്തെക്കുറിച്ചും ഇയാൾ പങ്കുവെക്കുന്ന വീഡിയോകൾക്ക് സോഷ്യൽ മീഡിയയിൽ വലിയ കാഴ്ചക്കാരുണ്ട്. സാമൂഹിക വിഷയങ്ങളിൽ കൃത്യമായ നിലപാടുകൾ പറയുന്ന ഇയാൾക്ക് നേരെ ഇത്തരമൊരു ആരോപണം ഉയർന്നത് നാടിനെ ഞെട്ടിച്ചിരിക്കുകയാണ്.ലൈംഗികാതിക്രമം, പോക്സോ നിയമത്തിലെ വിവിധ വകുപ്പുകൾ എന്നിവ പ്രകാരമാണ് പൊലിസ് കേസെടുത്തിരിക്കുന്നത്.