ധാക്ക: ബംഗ്ലാദേശ് പൊതുതിരഞ്ഞെടുപ്പില്‍ മുന്‍ പ്രധാനമന്ത്രി ഖാലിദ സിയയുടെ മകന്‍ താരീഖ് റഹ്മാന്‍ നയിക്കുന്ന ബംഗ്ലാദേശ് നാഷണലിസ്റ്റ് പാര്‍ട്ടിക്ക് (ബി.എന്‍.പി) തകര്‍പ്പന്‍ വിജയം. 2024ലെ ജനകീയ പ്രക്ഷോഭത്തിലൂടെ ശൈഖ് ഹസീന പുറത്താക്കപ്പെട്ടതിന് ശേഷം നടന്ന ആദ്യ ജനാധിപത്യ തിരഞ്ഞെടുപ്പിലാണ് ബി.എന്‍.പി അധികാരം തിരിച്ചുപിടിച്ചത്.
ഇന്ന് രാവിലെ പുറത്തുവന്ന ഫലങ്ങള്‍ പ്രകാരം, 300 അംഗ പാര്‍ലമെന്റില്‍ കേവല ഭൂരിപക്ഷത്തിന് ആവശ്യമായ 151 സീറ്റുകളും കടന്ന് ബി.എന്‍.പി മുന്നേറുകയാണ്. ഏകദേശം 197 സീറ്റുകളില്‍ പാര്‍ട്ടി വിജയിച്ചു. പ്രധാന എതിരാളികളായ ജമാഅത്തെ ഇസ്‌ലാമി നയിച്ച 11 കക്ഷി സഖ്യം 60ഓളം സീറ്റുകളില്‍ ഒതുങ്ങി.
17 വര്‍ഷത്തെ പ്രവാസത്തിന് ശേഷം ഡിസംബറില്‍ തിരിച്ചെത്തിയ താരീഖ് റഹ്മാന്‍ മത്സരിച്ച രണ്ട് മണ്ഡലങ്ങളിലും വന്‍ ഭൂരിപക്ഷത്തോടെ വിജയിച്ചു. അദ്ദേഹം രാജ്യത്തിന്റെ അടുത്ത പ്രധാനമന്ത്രിയാകും.
ശൈഖ് ഹസീനയുടെ പാര്‍ട്ടിയായ അവാമി ലീഗിന് തിരഞ്ഞെടുപ്പില്‍ മത്സരിക്കുന്നതിന് വിലക്കുണ്ടായിരുന്നതിനാല്‍ മൂന്ന് പതിറ്റാണ്ടിനിടെ ആദ്യമായി 'ബോട്ട്' അടയാളമില്ലാതെയാണ് വോട്ടെടുപ്പ് നടന്നത്.
12.7 കോടി വോട്ടര്‍മാരില്‍ 44 ശതമാനത്തോളം വരുന്ന യുവാക്കളാണ് (Gen Z) തിരഞ്ഞെടുപ്പില്‍ നിര്‍ണ്ണായകമായത്. ഏകദേശം 48 ശതമാനമാണ് വോട്ടിങ് നില.

താരീഖ് റഹ്മാന്‍ 

 

തിരഞ്ഞെടുപ്പിനൊപ്പം ഭരണഘടനാ പരിഷ്‌കാരങ്ങള്‍ക്കായുള്ള ഹിതപരിശോധനയും (Referendum) നടന്നു.
മുഹമ്മദ് യൂനുസിന്റെ നേതൃത്വത്തിലുള്ള ഇടക്കാല സര്‍ക്കാരിന് കീഴിലായിരുന്നു വോട്ടെടുപ്പ്. അതേസമയം, തിരഞ്ഞെടുപ്പ് പ്രഹസനമാണെന്ന് ശൈഖ് ഹസീന ഇന്ത്യയില്‍ നിന്ന് പ്രതികരിച്ചു. പുതിയ സര്‍ക്കാര്‍ അധികാരമേല്‍ക്കുന്നതോടെ രാജ്യത്ത് രാഷ്ട്രീയ സ്ഥിരത തിരിച്ചുവരുമെന്ന പ്രതീക്ഷയിലാണ് ബംഗ്ലാദേശ് ജനത.