ആലപ്പുഴ: അമ്പലപ്പുഴയില്‍ സ്വതന്ത്ര സ്ഥാനാര്‍ഥിയായി മത്സരിക്കുമെന്ന് മുതിര്‍ന്ന സി.പി.എം നേതാവ് ജി സുധാകരന്‍. ഇന്ന് പതിനൊന്നുമണിക്ക് വിളിച്ചു ചേര്‍ത്ത വാര്‍ത്താസമ്മേളനത്തിലാണ് ജി സുധാകരന്റെ പ്രഖ്യാപനം. പാര്‍ട്ടിക്കുള്ളിലെ വ്യക്തിഹത്യയും അവഗണനയും സഹിക്കാനാവുന്നില്ലെന്ന് വ്യക്തമാക്കിയാണ് പുതിയ രാഷ്ട്രീയ നീക്കം പ്രഖ്യാപിച്ചത്.

പാര്‍ട്ടിക്കുള്ളിലെ ചില കേന്ദ്രങ്ങള്‍ തന്നെയും തന്റെ കുടുംബത്തെയും അപമാനിക്കാന്‍ ശ്രമിക്കുകയാണെന്നും, ജനങ്ങളുടെ പിന്തുണയോടെ സ്വതന്ത്രമായി നിന്ന് ഇതിന് മറുപടി നല്‍കുമെന്നും അദ്ദേഹം പറഞ്ഞു.

ALSO READ: പാര്‍ട്ടി ആദര്‍ശവും ആശയവും ഉപേക്ഷിച്ചിട്ടില്ല, മത്സരിക്കുമെന്ന് ആരോടും പറഞ്ഞിട്ടില്ല: പ്രചാരണങ്ങള്‍ തള്ളി ജി സുധാകരന്‍

കമ്മ്യൂണിസ്റ്റ് പാര്‍ട്ടിക്കെതിരെ തെരഞ്ഞെടുപ്പില്‍ ഒന്നും പറയില്ല. സ്വതന്ത്ര സ്ഥാനാര്‍ഥിയാണ്. പിന്തുണയുമായി ആരും വന്നിട്ടില്ല. പിന്തുണ സ്വീകരിക്കുമോ എന്ന് ഇപ്പോള്‍ പറയാനാകില്ലെന്നും അദ്ദേഹം പറഞ്ഞു.

ഒരു പ്രതിപക്ഷ പാര്‍ട്ടിയുമായും സംസാരിച്ചിട്ടില്ലെന്നും യു.ഡി.എഫ് സ്ഥാനാര്‍ത്ഥിയാകുമെന്ന് ആരോടും പറഞ്ഞിട്ടില്ലെന്നും അദ്ദേഹം പറഞ്ഞു. എം.എ ബേബി ഇന്നലെ വീട്ടിലെത്തി കണ്ടിരുന്നുവെന്നും ഇപ്പോള്‍ നടക്കുന്നതെല്ലാം വെറും പ്രചാരണങ്ങള്‍ മാത്രമാണെന്നും ജി സുധാകരന്‍ വാര്‍ത്താ സമ്മേളനത്തില്‍ വ്യക്തമാക്കി. 

പാര്‍ട്ടി അംഗത്വം പുതുക്കില്ലെന്ന് ഫേസ്ബുക്ക് പോസ്റ്റിട്ടതിനുശേഷം മാധ്യമങ്ങളോടുള്‍പ്പെടെ പ്രതികരിക്കാന്‍ അദ്ദേഹം തയാറായിരുന്നില്ല. എന്നാല്‍ ജില്ലയില്‍ തന്നോട് അടുപ്പമുള്ള സി.പി.എമ്മിലെ ചില നേതാക്കളുമായും പ്രവര്‍ത്തകരുമായും അദ്ദേഹം ആശയവിനിമയം നടത്താറുണ്ടായിരുന്നു.

ALSO READ: യു പ്രതിഭ അല്ലാതെ വേറൊരു പ്രതിഭയേയും അറിയില്ല; പോറ്റിയുടെ പരാതി ഗൂഢാലോചനയുടെ ഭാഗം: കടകംപള്ളി

കഴിഞ്ഞദിവസം ആലപ്പുഴയിലെ മാധ്യമപ്രവര്‍ത്തകര്‍ ഉള്‍പ്പെടെയുള്ളവരെ ചേര്‍ത്ത് അദ്ദേഹം ഗ്രൂപ്പുതുടങ്ങിയിരുന്നു. ഇതിലാണ് ഇന്നത്തെ വാര്‍ത്താസമ്മേളനത്തെ കുറിച്ച് അറിയിച്ചത്. അമ്പലപ്പുഴയില്‍ സുധാകരന്‍ സ്വതന്ത്രനായി മത്സരിക്കുകയാണെങ്കില്‍ യു.ഡി.എഫ് പിന്തുണച്ചേക്കുമെന്നാണ് വിവരം.

അതേസമയം, വാര്‍ത്താസമ്മേളനം നടത്തുമെന്ന് ജി.സുധാകരന്‍ പ്രഖ്യാപിച്ചതിന് പിന്നാലെ സി.പി.എം നേതാക്കള്‍ പറവൂരിലെ ജി.സുധാകരന്റെ വീട്ടിലെത്തിയിരുന്നു. ഇന്നലെ രാത്രിയോടെ ജില്ല സെക്രട്ടറി ആര്‍. നാസറിന്റെയും സി.എസ് സുജാതയുടെയും നേതൃത്വത്തിലുള്ള സംഘമാണ് വീട്ടിലെത്തിയത്. വാര്‍ത്താ സമ്മേളനത്തില്‍നിന്ന് പിന്‍മാറണമെന്നാണ് ഇവര്‍ ആവശ്യപ്പെട്ടത്. എന്നാല്‍ ഇനിയും അവഗണനകള്‍ നേരിട്ട് മുന്നോട്ടു പോകാനാവില്ലെന്നും സ്ഥാനാര്‍ഥിയാകുമെന്ന നിലപാടില്‍ ഉറച്ചു നില്‍ക്കുമെന്നാണ് ജി.സുധാകരന്‍ വ്യക്തമാക്കിയത്.

Senior leader G. Sudhakaran has announced that he will contest the upcoming election as an independent candidate from Ambalappuzha. Declaring his candidacy, Sudhakaran said he decided to enter the fray independently, drawing significant attention in the political circles of Kerala.