മുംബൈ: ഐ.പി.എല്ലിൻ്റെ പുതിയ സീസൺ ആരംഭിക്കാൻ ദിവസങ്ങൾ മാത്രം ബാക്കിനിൽക്കെ നിലവിലെ ചാംപ്യന്മാരായ റോയൽ ചലഞ്ചേഴ്സ് ബെംഗളൂരു ക്യാംപിൽ ആശങ്ക. ആർ.സി.ബി താരവും ഓസീസ് പേസറുമായ ജോഷ് ഹേസൽവുഡ് ഐ.പി.എൽ കളിക്കുന്ന കാര്യം സംശയത്തിലായതാണ് ആർ.സി.ബിക്ക് തിരിച്ചടിയായത്. ഹേസൽവുഡിന് ഫിറ്റ്നസ് സംബന്ധമായ പ്രശ്ന‌ങ്ങൾ തുടരുന്നതിനാൽ താരത്തിന്റെ മെഡിക്കൽ ക്ലിയറൻസിനുള്ള കാത്തിരിപ്പിലാണ് ആർ.സി.ബി. 

കാലിനേറ്റ പരുക്കിനെ തുടർന്നു കുറച്ചു കാലമായി കളത്തിനു പുറത്താണ് ഹേസൽവുഡ്. പരുക്ക് കാരണം 2025-26ലെ ആഷസ് പരമ്പരയും പിന്നാലെ ടി20 ലോകകപ്പും താരത്തിന് നഷ്ട‌മായിരുന്നു. പിന്നാലെയാണ് ഐ.പി.എല്ലിൽ കളിക്കുന്ന കാര്യവും സംശയത്തിലായിരിക്കുന്നത്.

റിപ്പോർട്ടുകൾ പ്രകാരം ഹേസൽവുഡ് ഇപ്പോഴും ഫിസിയോ തെറാപ്പി ചികിത്സയിൽ തുടരുകയാണ്. ഹാംസ്ട്രിംഗ് പരുക്കിനും ആകിലീസ് ടെൻഡൺ പ്രശ്നങ്ങൾക്കും ശേഷമാണ് താരം പൂർണമായും മത്സരങ്ങളിൽ നിന്ന് വിട്ടുനിൽക്കേണ്ടി വന്നത്. താരത്തിന്റെ ഫിറ്റ്നസ്നില പൂർണമായി വിലയിരുത്തിയ ശേഷമേ ഐ.പി.എല്ലിൽ പങ്കെടുക്കാൻ അന്തിമ അനുമതി നൽകുകയുള്ളൂവെന്നാണ് മെഡിക്കൽ സംഘത്തിന്റെ നിലപാട്.