ന്യൂഡല്‍ഹി: കോണ്‍ഗ്രസിന്റെ സ്ഥാനാര്‍ഥി പട്ടിക വൈകുന്നത് വിജയസാധ്യതയുള്ള കൃത്യമായ പേരുകള്‍ കണ്ടെത്താനാണെന്നും പുറത്തുവരാന്‍ പോകുന്നത് ജയത്തിലേക്കുള്ള പട്ടികയാണെന്നും കെ.പി.സി.സി വര്‍ക്കിങ് പ്രസിഡന്റ് ഷാഫി പറമ്പില്‍ എം.പി. പട്ടിക പ്രഖ്യാപിക്കാന്‍ എന്തുകൊണ്ട് വൈകിയെന്ന് അത് പുറത്തുവരുമ്പോള്‍ ജനങ്ങള്‍ക്കും പ്രവര്‍ത്തകര്‍ക്കും ബോധ്യപ്പെടുമെന്നും അദ്ദേഹം മാധ്യമങ്ങളോട് പറഞ്ഞു. സ്ഥാനാര്‍ഥികളെ സംബന്ധിച്ച് മാധ്യമങ്ങള്‍ പല പ്രവചനങ്ങളും നടത്തുന്നുണ്ടെങ്കിലും പാര്‍ട്ടി സമയമാകുമ്പോള്‍ കൃത്യമായ പ്രഖ്യാപനം നടത്തുമെന്നും ഷാഫി കൂട്ടിച്ചേര്‍ത്തു.

യുഡിഎഫിന്റെ സ്ഥാനാര്‍ഥി നിര്‍ണയത്തില്‍ തര്‍ക്കങ്ങളില്ലെന്ന് പ്രതിപക്ഷ നേതാവ് വി.ഡി സതീശന്‍ പ്രതികരിച്ചു. എല്ലാ ഘടകങ്ങളും പരിശോധിച്ചായിരിക്കും തീരുമാനം. സ്ഥാനാര്‍ഥി നിര്‍ണയത്തില്‍ വിസ്മയങ്ങള്‍ തുടരുമെന്നും അദ്ദേഹം വ്യക്തമാക്കി. സി.പി.എമ്മിനെതിരെ കടുത്ത വിമര്‍ശനവും അദ്ദേഹം ഉന്നയിച്ചു.

 കഴിഞ്ഞ പത്തു വര്‍ഷം കൊണ്ട് സി.പി.എം തകര്‍ന്നെന്നും അവരുടെ നേതൃത്വം അധപ്പതിച്ചെന്നും സതീശന്‍ കുറ്റപ്പെടുത്തി. ആന്തൂര്‍ സാജന്റെ കൊലപാതകത്തിന് ഉത്തരവാദിയായ ആളെയാണ് സി.പി.എം സ്ഥാനാര്‍ഥിയാക്കിയതെന്നും തളിപ്പറമ്പിലെ കാര്യത്തില്‍ യുഡിഎഫ് ഉചിതമായ തീരുമാനമെടുക്കുമെന്നും അദ്ദേഹം പറഞ്ഞു.

ALSO READ: മകനെ രക്ഷിക്കാനിറങ്ങിയ പിതാവ് കിണറ്റില്‍ വീണ് മരിച്ചു; മൂന്നു വയസ്സുകാരന്‍ രക്ഷപ്പെട്ടു

അതേസമയം, സ്ഥാനാര്‍ഥി പട്ടിക പ്രഖ്യാപിക്കുന്നതില്‍ തിരക്കില്ലെന്ന് കെ.പി.സി.സി പ്രസിഡന്റ് സണ്ണി ജോസഫ് അറിയിച്ചു. പട്ടിക ഇന്ന് പ്രഖ്യാപിക്കില്ലെന്നും നാളെ കേന്ദ്ര തെരഞ്ഞെടുപ്പ് സമിതിക്ക് ശേഷം ആദ്യഘട്ട പട്ടിക വരുമെന്നും അദ്ദേഹം പറഞ്ഞു. എന്നാല്‍ പല മണ്ഡലങ്ങളിലും നേതാക്കള്‍ക്കിടയില്‍ ഭിന്നാഭിപ്രായം നിലനില്‍ക്കുന്നുണ്ടെന്നാണ് പുറത്തുവരുന്ന വിവരം. തീരുമാനമായ ചില മണ്ഡലങ്ങളില്‍ പോലും വീണ്ടും ചര്‍ച്ചകള്‍ നടത്തേണ്ടി വരുന്നതാണ് പട്ടിക വൈകാന്‍ കാരണമെന്നും സൂചനയുണ്ട്.

Congress leaders Shafi Parambil and V.D. Satheesan stated that the delay in announcing the candidate list is to ensure victory, while dismissing reports of internal disputes and criticizing the CPIM's candidate selection.