കൊച്ചി: കൊച്ചി ശാസ്ത്ര-സാങ്കേതിക സര്‍വകലാശാലയില്‍ (കുസാറ്റ്) വിദ്യാര്‍ഥിനിയെ തൂങ്ങി മരിച്ച നിലയില്‍ കണ്ടെത്തി. സ്‌കൂള്‍ ഓഫ് എഞ്ചിനീയറിങ്ങില്‍ ബിടെക് സിവില്‍ എഞ്ചിനീയറിങ് നാലാം വര്‍ഷ വിദ്യാര്‍ഥിയായ കെഎസ് ദര്‍ശന (21)യാണ് മരിച്ചത്. ഹിദായത്ത് നഗറിലെ വാടക മുറിയിലാണ് കുട്ടിയെ മരിച്ച നിലയില്‍ കണ്ടത്. 

സൗത്ത് പുതുവൈപ്പ് കോമത്തുരുത്ത് സ്വദേശികളായ ഓട്ടോറിക്ഷ ഡ്രൈവര്‍ സുദര്‍ശന്റെയും ഷൈജയുടെയും മകളാണ് ദര്‍ശന. വ്യാഴാഴ്ച്ച ഉച്ചയോടെയാണ് കുട്ടിയെ തൂങ്ങിയ നിലയില്‍ കണ്ടെത്തിയത്. ഒരാഴ്ച്ച മുന്‍പാണ് പരീക്ഷയ്ക്ക് പഠിക്കാനുണ്ടെന്ന് പറഞ്ഞ് ദര്‍ശന ഹോസ്റ്റലിലേക്ക് മാറിയത്. വ്യക്തിപരമായ പ്രശ്‌നങ്ങള്‍ ഉണ്ടായിരുന്നതായി അറിയില്ലെന്ന് ബന്ധുക്കള്‍ പറയുന്നു. 

കഴിഞ്ഞദിവസം പരീക്ഷ ഉണ്ടായിരുന്നെങ്കിലും ദര്‍ശന പരീക്ഷക്ക് എത്തിയിരുന്നില്ല. പരീക്ഷ കഴിഞ്ഞ് ഒപ്പം താമസിക്കുന്ന വിദ്യാര്‍ഥിനി മുറിയിലെത്തിയപ്പോള്‍ വാതില്‍ അകത്തുനിന്ന് പൂട്ടിയ നിലയിലായിരുന്നു. പലവട്ടം വിളിച്ചിട്ടും പ്രതികരിക്കാത്തതോടെ സമീപവാസികളുടെ സഹായത്തോടെ വാതില്‍ പൊളിച്ച് അകത്ത് കയറി. തുടര്‍ന്ന് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. 

ഒരാഴ്ച്ചക്കിടെ കുസാറ്റില്‍ ജീവനൊടുക്കുന്ന രണ്ടാമത്തെ വിദ്യാര്‍ഥിയാണ് ദര്‍ശന. സംഭവത്തില്‍ വൈസ് ചാന്‍സിലര്‍ ഡോ എം ജുനൈദ് ബുഷിരി റിപ്പോര്‍ട്ട് തേടി.