"ഹിസ്ബുള്ള ഒരു കേവല സംഘടനയല്ല. അത്‌ ഒരു രാഷ്ട്രമാണ്. ഒരു രാഷ്ട്രത്തെ ഇല്ലാതാക്കുക എന്നത് സാധ്യമല്ല."- മുഹമ്മദ് അഫീഫ് (ഹിസ്ബുള്ളയുടെ മുൻ വാർത്ത മാധ്യമ മേധാവി)

ഹിസ്ബുള്ളയുടെ തകർച്ച പൂർണ്ണമായെന്നും, സംഘടന ഇനി ഒരിക്കലും പഴയപടിയാകില്ലെന്നും ഇസ്റാഈലും പാശ്ചാത്യ ശക്തികളും പ്രഖ്യാപിച്ചതിന് പിന്നാലെ, തങ്ങളുടെ സൈനികവും ഭരണപരവുമായ കരുത്ത് വീണ്ടെടുത്ത് ഹിസ്ബുള്ള തിരിച്ചുവന്ന കാഴ്ചയാണ് കഴിഞ്ഞ ദിവസങ്ങളിൽ നാം കണ്ടത്. ലെബനനിലെ നിലവിലെ സാഹചര്യങ്ങളെയും സംഘടനയുടെ ആഭ്യന്തര മാറ്റങ്ങളെയും വിശകലനം ചെയ്തുകൊണ്ട് മിഡിൽ ഈസ്റ്റ് ഐ പുറത്തുവിട്ട റിപ്പോർട്ട് ഹിസ്ബുള്ള എത്തരത്തിലാണ് തങ്ങളുടെ പഴയെ പ്രതാപം വീണ്ടെടുത്തതെന്ന് വിശദമാക്കുന്നുണ്ട്. 

നേതൃത്വത്തിലെ വിടവ് നികത്തപ്പെടുമ്പോൾ: 

ഹസ്സൻ നസ്‌റള്ളയുടെ വധത്തിന് ശേഷം ഹിസ്ബുള്ള നേരിട്ട ഏറ്റവും വലിയ വെല്ലുവിളി നേതൃത്വത്തിന്റെ അഭാവമായിരുന്നു. എന്നാൽ നിമിഷങ്ങൾക്കുള്ളിൽ തന്നെ പുതിയ കമാൻഡ് സ്ട്രക്ചർ രൂപീകരിക്കാൻ സംഘടനയ്ക്ക് സാധിച്ചു. മുതിർന്ന നേതാക്കളുടെ മരണത്തിന് പിന്നാലെ, രണ്ടാം നിരയിലുണ്ടായിരുന്ന യുവനേതാക്കൾ നേതൃത്വത്തിലേക്ക് ഉയർത്തപ്പെട്ടു. കമ്മ്യൂണിക്കേഷൻ ശൃംഖലകൾ തകർക്കപ്പെട്ടെങ്കിലും പ്രാദേശിക തലത്തിൽ തീരുമാനങ്ങൾ എടുക്കാൻ പ്രാപ്തിയുള്ള സ്വതന്ത്ര യൂണിറ്റുകളായി ഹിസ്ബുള്ള സൈന്യം രൂപാന്തരപ്പെട്ടു. ഇത് ഇസ്റാഈലിന്റെ കണക്കുകൂട്ടലുകളെ തെറ്റിച്ചു.

യുദ്ധക്കളത്തിലെ പുതിയ തന്ത്രങ്ങൾ:

ഇസ്റാഈൽ സൈന്യം അതിർത്തി കടന്നുള്ള ആക്രമണങ്ങൾ ശക്തമാക്കിയപ്പോൾ, ഹിസ്ബുള്ള തങ്ങളുടെ പോരാട്ട രീതികളിൽ വലിയ മാറ്റം വരുത്തി. വലിയ ആയുധപ്പുരകൾക്ക് പകരം ചെറിയ, മൊബൈൽ യൂണിറ്റുകളിലേക്ക് അവർ മാറി. തുരങ്ക ശൃംഖലകൾ ഇപ്പോഴും സജീവമാണെന്നും അത് വഴി ആയുധ കൈമാറ്റവും സൈനിക നീക്കങ്ങളും തടസ്സമില്ലാതെ നടക്കുന്നുണ്ടെന്നും റിപ്പോർട്ടുകൾ സൂചിപ്പിക്കുന്നു. വ്യോമാക്രമണങ്ങളെ പ്രതിരോധിക്കാൻ സാധിക്കുന്ന പുതിയ ഡ്രോൺ സാങ്കേതികവിദ്യകളും ദീർഘദൂര മിസൈലുകളും അവർ വീണ്ടും സജ്ജീകരിച്ചിട്ടുണ്ട്.

സോഷ്യൽ സപ്പോർട്ട് സിസ്റ്റം:

യുദ്ധത്തിൽ വീടുകൾ നഷ്ടപ്പെട്ടവർക്കും പരിക്കേറ്റവർക്കും വേണ്ടിയുള്ള സേവന പ്രവർത്തനങ്ങളിൽ ഹിസ്ബുള്ള വിട്ടുവീഴ്ച ചെയ്യുന്നില്ല. സംഘടനയുടെ സാമൂഹിക സേവന വിഭാഗം ലെബനന്റെ വിവിധ ഭാഗങ്ങളിൽ ദുരിതാശ്വാസ പ്രവർത്തനങ്ങൾ ഏകോപിപ്പിക്കുന്നു. ഇത് ലെബനനിലെ ജനങ്ങൾക്കിടയിൽ ഹിസ്ബുള്ളയ്ക്കുള്ള സ്വാധീനം വർദ്ധിപ്പിക്കാൻ സഹായിച്ചു. സാമ്പത്തിക പ്രതിസന്ധികൾക്കിടയിലും ഇറാനിൽ നിന്നുള്ള പിന്തുണയോടെ പുനർനിർമ്മാണ പ്രവർത്തനങ്ങൾക്കായി വൻതോതിൽ ഫണ്ട് നീക്കിവെച്ചിട്ടുണ്ട്.

ഇറാൻ നൽകുന്ന കരുത്ത്:

ഹിസ്ബുള്ളയുടെ ഈ ദ്രുതഗതിയിലുള്ള തിരിച്ചുവരവിന് പിന്നിൽ ഇറാന്റെ ശക്തമായ പിന്തുണയുണ്ട്. സാമ്പത്തികമായും സൈനികമായും ആവശ്യമായ സഹായങ്ങൾ ഇറാൻ കൃത്യമായി എത്തിക്കുന്നു. തകർക്കപ്പെട്ട വാർത്താവിനിമയ സംവിധാനങ്ങൾക്ക് പകരം പുതിയതും സുരക്ഷിതവുമായ സംവിധാനങ്ങൾ ഇറാൻ ഹിസ്ബുള്ളയ്ക്ക് കൈമാറിയതായാണ് വിവരം. ഇത് സംഘടനയുടെ ആത്മവിശ്വാസം വർദ്ധിപ്പിച്ചു.

ഹിസ്ബുള്ളയെ നാമാവശേഷമാക്കിയെന്ന ഇസ്റാഈലിന്റെ അവകാശവാദങ്ങൾ നിലനിൽക്കുമ്പോഴും, ഗ്രൗണ്ടിലെ യാഥാർത്ഥ്യം മറ്റൊന്നാണ്. കൃത്യമായ പ്ലാനിംഗോടെയുള്ള പുനർനിർമ്മാണത്തിലൂടെ സംഘടന കൂടുതൽ കരുത്താർജ്ജിക്കുകയാണ്. തകർച്ചയിൽ നിന്ന് പാഠങ്ങൾ ഉൾക്കൊണ്ട്, കൂടുതൽ നവീനമായ രീതിയിൽ അവർ യുദ്ധക്കളത്തിലേക്കും രാഷ്ട്രീയത്തിലേക്കും തിരികെ വരുന്നു എന്നാണ് മിഡിൽ ഈസ്റ്റ് ഐ റിപ്പോർട്ട് വ്യക്തമാക്കുന്നത്. മധ്യപൂർവ്വേഷ്യയിലെ ശക്തിസമവാക്യങ്ങളിൽ ഹിസ്ബുള്ള ഇപ്പോഴും ഒരു നിർണ്ണായക ശക്തിയായി തുടരുന്നു.