തിരുവനന്തപുരം: ഇസ്റാഈലിൽ മലയാളി യുവാവ് മരിച്ചു. തിരുവനതപുരം കല്ലമ്പലം സ്വദേശി എസ്‌.എസ്‌ ഭവനിൽ സുരേഷ് സുന്ദരേശൻ ആണ് മരണപ്പെട്ടത്. 42 വയസായിരുന്നു. ഇസ്റാഈലിലുള്ള മലയാളി കൂട്ടായ്മയാണ് മരണവിവരം ബന്ധുക്കളെ അറിയിച്ചത്. ടെൽ അവീവിൽ നിർമ്മാണ തൊഴിലാളിയാണ് സുരേഷ് സുന്ദരേശൻ.

രണ്ട് വർഷമായി ഇസ്റാഈലിൽ ജോലി ചെയ്ത് വരികയാണ് സുരേഷ്. മരണകാരണം എന്താണെന്ന് വ്യക്തമായിട്ടില്ല. സംഭവത്തിന്റെ കൂടുതൽ വിവരങ്ങൾ ലഭിക്കുന്നതിന് വേണ്ടി കുടുംബം എംബസി അധികൃതരെ സമീപിച്ചിരിക്കുകയാണ്. 

പച്ചക്കറി സാധനങ്ങൾ വാങ്ങാൻ പോവുന്നുവെന്നാണ് സുരേഷ് അവസാനം ബന്ധുക്കൾക്ക് അയച്ച ശബ്ദ സന്ദേശം. പുറത്ത് ബോംബിങ് നടക്കുന്നുണ്ടെന്നും സുരേഷ് പറഞ്ഞിരുന്നുവെന്ന് ബന്ധുക്കൾ വ്യക്തമാക്കി. മാർച്ച് 13നാണ് സുരേഷ് അവസാനമായി ബന്ധുക്കളുമായി സംസാരിച്ചിരുന്നത്. ഇതിനു ശേഷം സുരേഷിനെ ബന്ധപ്പെടാൻ സാധിച്ചിട്ടില്ല.