കോഴിക്കോട്: വരാനിരിക്കുന്ന തെരഞ്ഞെടുപ്പിന്റെ പശ്ചാത്തലത്തില്‍, രാഷ്ട്രീയ പാര്‍ട്ടികളുടെ പ്രചാരണ പരിപാടികളിലും മറ്റ് അനുബന്ധ പ്രവര്‍ത്തനങ്ങളിലും കുട്ടികളെ യാതൊരു കാരണവശാലും പങ്കെടുപ്പിക്കരുതെന്ന് ജില്ലാ തെരഞ്ഞെടുപ്പ് ഓഫിസര്‍ കൂടിയായ ജില്ലാ കലക്ടര്‍ സ്‌നേഹില്‍ കുമാര്‍ സിങ് അറിയിച്ചു. തെരഞ്ഞെടുപ്പ് കമ്മീഷന്റെ കൃത്യമായ മാര്‍ഗനിര്‍ദേശങ്ങള്‍ ലംഘിക്കുന്നവര്‍ക്കെതിരെ കര്‍ശന നടപടിയുണ്ടാകുമെന്ന് അദ്ദേഹം മുന്നറിയിപ്പ് നല്‍കി.

റാലികള്‍, തെരഞ്ഞെടുപ്പ് യോഗങ്ങള്‍, മുദ്രാവാക്യം വിളികള്‍ എന്നിവയില്‍ കുട്ടികളെ പങ്കെടുപ്പിക്കാന്‍ പാടില്ല. തെരഞ്ഞെടുപ്പ് സംബന്ധമായ ലഘുലേഖകളോ പോസ്റ്ററുകളോ വിതരണം ചെയ്യുന്നതിന് കുട്ടികളെ ഉപയോഗിക്കുന്നത് കുറ്റകരമാണ്.

പ്രചാരണത്തിനിടെ വോട്ട് അഭ്യര്‍ത്ഥിക്കുമ്പോള്‍ കുട്ടികളെ കൈകളിലെടുക്കുന്നതോ കുട്ടികളുമായി വാഹന റാലികളില്‍ പങ്കെടുക്കുന്നതോ അനുവദനീയമല്ല. രാഷ്ട്രീയ പാര്‍ട്ടികളുടെ ചിഹ്നങ്ങള്‍ ധരിപ്പിക്കാനോ തെരഞ്ഞെടുപ്പ് ഗാനങ്ങള്‍ പാടിക്കാനോ പ്രസംഗങ്ങള്‍ പറയിപ്പിക്കാനോ കുട്ടികളെ ഉപയോഗിക്കരുത്.

നിയമനടപടി നേരിടേണ്ടി വരും
കുട്ടികളെ തെരഞ്ഞെടുപ്പ് ആവശ്യങ്ങള്‍ക്കായി ഉപയോഗിക്കുന്നത് ബാലവേല നിരോധന നിയമം ഉള്‍പ്പെടെയുള്ള വിവിധ നിയമങ്ങളുടെ ലംഘനമാണെന്ന് കലക്ടര്‍ വ്യക്തമാക്കി. രാഷ്ട്രീയ പാര്‍ട്ടികളും സ്ഥാനാര്‍ഥികളും പ്രവര്‍ത്തകരും ഈ നിര്‍ദേശങ്ങള്‍ കര്‍ശനമായി പാലിക്കണമെന്നും അദ്ദേഹം ഓര്‍മിപ്പിച്ചു.

Kozhikode District Collector Snehil Kumar Singh has issued a strict directive prohibiting the use of children in election rallies, poster distribution, and campaigning, stating that any violation will be treated as a breach of child labor laws.