കൽപ്പറ്റ: വയനാട് വെണ്ണിയോട്ട് വയോധികയെ വീട്ടിനുള്ളിൽ കൊല്ലപ്പെട്ട നിലയിൽ കണ്ടെത്തി. വെണ്ണിയോട് വൈപ്പടി സ്വദേശിനി ഫാത്തിമ (85) ആണ് മരിച്ചത്. മോഷണശ്രമം ചെറുക്കുന്നതിനിടെയുണ്ടായ കൊലപാതകമാണെന്നാണ് പൊലിസിന്റെ പ്രാഥമിക നിഗമനം. ഫാത്തിമ ധരിച്ചിരുന്ന മാലയും കമ്മലുമടക്കമുള്ള സ്വർണാഭരണങ്ങൾ നഷ്ടപ്പെട്ടിട്ടുണ്ട്.

സമീപത്തുതന്നെ താമസിക്കുന്ന ഇളയ മകൻ ഉസ്മാൻ വീട്ടിലെത്തിയപ്പോഴാണ് ഫാത്തിമയെ മുറിക്കുള്ളിൽ മരിച്ച നിലയിൽ കണ്ടെത്തിയത്. തുടർന്ന് കമ്പളക്കാട് പൊലിസിനെ വിവരമറിയിക്കുകയായിരുന്നു.

സംഭവത്തിൽ കവർച്ചാ ശ്രമമുണ്ടായതായും മരണത്തിൽ അസ്വാഭാവികതയുണ്ടെന്നും പൊലിസ് സ്ഥിരീകരിച്ചു. പ്രദേശത്ത് കമ്പളക്കാട് പൊലിസിന്റെ നേതൃത്വത്തിൽ വിരലടയാള വിദഗ്ധരും ഡോഗ് സ്ക്വാഡും എത്തി വിശദമായ അന്വേഷണം ആരംഭിച്ചിട്ടുണ്ട്. നിലവിൽ ഇൻക്വസ്റ്റ് നടപടികൾ പൂർത്തിയാക്കി മൃതദേഹം മാനന്തവാടി മെഡിക്കൽ കോളേജ് ആശുപത്രി മോർച്ചറിയിലേക്ക് മാറ്റി. പ്രതികൾക്കായി തിരച്ചിൽ ഊർജിതമാക്കിയതായി പൊലിസ് അറിയിച്ചു.

An 85-year-old woman was found dead under mysterious circumstances inside her home at Vypadi near Kottathara in Wayanad district. The deceased has been identified as Fathima, who was living alone in the house.