അബുദബി: അബുദാബിയിലെയും അൽ ഐനിലെയും വ്യവസായ മേഖലകളിൽ വൻ നിക്ഷേപത്തിനൊരുങ്ങി കെസാഡ് ഗ്രൂപ്പ് (KEZAD Group). 147 മില്യൺ ദിർഹം (ഏകദേശം 14.7 കോടി) ചിലവിൽ അഞ്ച് പുതിയ വ്യവസായ-ലോജിസ്റ്റിക്സ് പദ്ധതികളാണ് കമ്പനി പ്രഖ്യാപിച്ചത്. ഈ പദ്ധതികൾ പൂർത്തിയാകുന്നതോടെ മേഖലയിൽ 500 പുതിയ തൊഴിലവസരങ്ങൾ സൃഷ്ടിക്കപ്പെടുമെന്ന് കെസാഡ് ഗ്രൂപ്പ് അറിയിച്ചു.

47 മില്യൺ ദിർഹം നിക്ഷേപത്തിൽ നാല് പ്രധാന പദ്ധതികളാണ് അൽ ഐനിൽ വരുന്നത്. ഇതിലൂടെ 200 പേർക്ക് തൊഴിൽ ലഭിക്കും. അബുദബിയിലെ കെസാഡ് അൽ മഅ്മൂറയിൽ 100 മില്യൺ ദിർഹം നിക്ഷേപത്തിൽ ഒരുങ്ങുന്ന അഞ്ചാമത്തെ പദ്ധതിയിലൂടെ 300 പേർക്കും ജോലി ഉറപ്പാക്കും. ഓയിൽഫീൽഡ് കെമിക്കൽസ്, മെറ്റൽ പ്രോസസ്സിംഗ്, മാനുഫാക്ചറിംഗ്, ലോജിസ്റ്റിക്സ് തുടങ്ങിയ വിവിധ മേഖലകളിലാണ് ഈ വികസന പ്രവർത്തനങ്ങൾ നടക്കുന്നത്.

ALSO READ: ഗതാഗത വിപ്ലവത്തിന് കാതോർത്ത് യുഎഇ; ദുബൈ, ഷാർജ, അജ്മാൻ ഇമാറാത്തുകളെ ബന്ധിപ്പിച്ച് 600 കോടിയുടെ ഹൈവേ വരുന്നു

ഗ്രാൻഡ് ലൈൻ ഇൻഡസ്ട്രീസ്, യൂണിബൽ ഗ്രൂപ്പ് ഇൻവെസ്റ്റ്‌മെന്റ്, അൽ ലുൽ ട്രാൻസ്‌പോർട്ട് തുടങ്ങിയ പ്രമുഖ സ്ഥാപനങ്ങളുമായി ചേർന്നാണ് വെയർഹൗസിംഗ് സൗകര്യങ്ങളും നിർമ്മാണ പ്ലാന്റുകളും കെസാഡ് വികസിപ്പിക്കുന്നത്.

അബുദബിയിലെ വ്യാവസായിക അടിത്തറ വികസിപ്പിക്കുന്നതിന്റെ ഭാഗമായാണ് പുതിയ കരാറുകൾ. 2025-ൽ കെസാഡ് ഉൾപ്പെടുന്ന എഡി പോർട്ട്സ് ഗ്രൂപ്പിന്റെ വരുമാനത്തിൽ 45 ശതമാനം വർദ്ധനവ് രേഖപ്പെടുത്തിയിരുന്നു. നിലവിൽ 91 ശതമാനം വെയർഹൗസുകളും നിറഞ്ഞുകഴിഞ്ഞ കെസാഡ്, വർദ്ധിച്ചുവരുന്ന ആവശ്യം പരിഗണിച്ച് കൂടുതൽ സ്ഥലസൗകര്യങ്ങൾ ഒരുക്കാനുള്ള തയ്യാറെടുപ്പിലാണ്. പുതിയ നിക്ഷേപങ്ങൾ അബുദബിയുടെ സാമ്പത്തിക വളർച്ചയ്ക്കും ഉദ്യോഗാർത്ഥികൾക്കും വലിയ മുതൽക്കൂട്ടാകും.

new job opportunities emerge in the United Arab Emirates as KEZAD Group announces projects worth 147 million dirhams boosting industrial growth attracting investments and creating employment across multiple sectors supporting economic expansion and workforce development in the region