ദുബൈ: ബലിപെരുന്നാൾ‌ പ്രമാണിച്ച് രാജ്യത്തെ തൊഴിലാളികൾക്കായി വിപുലമായ ആഘോഷ പരിപാടികൾ പ്രഖ്യാപിച്ച് യുഎഇ മാനവ വിഭവശേഷി, സ്വദേശിവൽക്കരണ മന്ത്രാലയം (MOHRE). 'നമ്മുടെ തൊഴിലാളികളുടെ സന്തോഷമാണ് നമ്മുടെ ഈദിന്റെ സന്തോഷം' എന്ന മനോഹരമായ മുദ്രാവാക്യത്തോടെയാണ് മന്ത്രാലയം രാജ്യവ്യാപക കാമ്പെയ്ൻ സംഘടിപ്പിക്കുന്നത്. യുഎഇയിലുടനീളമുള്ള 30 ഓളം കേന്ദ്രങ്ങളിലാണ് വിവിധ പരിപാടികൾ അരങ്ങേറുക.

വിവിധ സർക്കാർ, സ്വകാര്യ മേഖലയിലെ സ്ഥാപനങ്ങളുടെ പങ്കാളിത്തത്തോടെയാണ് ഈദ് ആഘോഷങ്ങൾ ഏകോപിപ്പിക്കുന്നത്. തങ്ങളുടെ ലേബർ അക്കോമഡേഷനുകളിലെ തൊഴിലാളികളെ ഈ പരിപാടികളുടെ ഭാഗമാക്കാൻ ആഗ്രഹിക്കുന്ന സ്വകാര്യ കമ്പനികൾക്ക് മന്ത്രാലയത്തിന്റെ ഔദ്യോഗിക വെബ്‌സൈറ്റ് (http://mohre.gov.ae) സന്ദർശിച്ച് രജിസ്റ്റർ ചെയ്യാവുന്നതാണ്. കമ്പനികളുടെ സമയക്രമത്തിനും സ്ഥലത്തിനും അനുയോജ്യമായ വിവിധ വിനോദ-ആഘോഷ പ്രവർത്തനങ്ങൾ ഇതിലൂടെ തിരഞ്ഞെടുക്കാൻ സാധിക്കും.

യുഎഇ ആഭ്യന്തര മന്ത്രാലയം, ഫെഡറൽ അതോറിറ്റി ഫോർ ഐഡന്റിറ്റി ആൻഡ് സിറ്റിസൺഷിപ്പ് (ICP), ദുബൈ ആർടിഎ (RTA), യുഎഇയിലെ വിവിധ പൊലിസ് ആസ്ഥാനങ്ങൾ, മുനിസിപ്പാലിറ്റികൾ, ദുബൈയിലെ തൊഴിൽ കാര്യങ്ങൾക്കായുള്ള സ്ഥിരം സമിതി, നാഷണൽ ആംബുലൻസ്, ബുർജീൽ ഹോൾഡിംഗ്സ് തുടങ്ങി നിരവധി പ്രമുഖ സർക്കാർ-സ്വകാര്യ സംവിധാനങ്ങളാണ് കാമ്പെയ്നിൽ മന്ത്രാലയത്തിനൊപ്പം പങ്കാളികളാകുന്നത്.

രാജ്യത്തിന്റെ നിർമ്മാണത്തിലും വളർച്ചയിലും പ്രധാന പങ്കുവഹിക്കുന്ന തൊഴിലാളി സമൂഹത്തിന് മാനസിക ഉല്ലാസവും പെരുന്നാൾ സന്തോഷവും പകരുക എന്ന ലക്ഷ്യത്തോടെയാണ് യുഎഇ ഭരണകൂടം ഈ വലിയ പദ്ധതി നടപ്പിലാക്കുന്നത്.

ALSO READ: ദുബൈ ഗ്ലോബല്‍ വില്ലേജ് ഇനി 10 ദിവസം കൂടി മാത്രം; പെരുന്നാള്‍ ആഘോഷങ്ങള്‍ക്കും വന്‍ ഓഫറുകള്‍ക്കും അവസാന അവസരം

The UAE has launched extensive Eid celebration programs for workers across 30 locations nationwide, featuring entertainment, cultural events, gifts, and community activities aimed at bringing joy to thousands of laborers during the festive season.