തിരുവനന്തപുരം: പിണറായി വിജയന്റെ ബേക്കറി ജങ്ഷനിലെ വീട്ടിലെ റെയ്ഡ് നടന്നതിനു പിന്നാലെ വന്‍ സംഘര്‍ഷം. സി.പി.എം പ്രവര്‍ത്തകര്‍ ഇ.ഡി ഉദ്യോഗസ്ഥരുടെ വാഹനം ആക്രമിച്ചു. കാറിന്റെ ചില്ല് എറിഞ്ഞുപൊട്ടിച്ചു. സംഭവത്തില്‍ രണ്ട് ഇഡി ഉദ്യോഗസ്ഥര്‍ക്കും ഒരു ഡ്രൈവര്‍ക്കും പരുക്കേറ്റു. റെയ്ഡ് കഴിഞ്ഞ് പുറത്തിറങ്ങിയ ഉദ്യോഗസ്ഥരെ സി.പി.എം പ്രവര്‍ത്തകര്‍ കൂവിവിളിച്ചാണ് സ്വീകരിച്ചത്.ഉദ്യോഗസ്ഥര്‍ക്ക് നേരെ പ്രവര്‍ത്തകര്‍ പ്രതിഷേധ മുദ്രാവാക്യങ്ങള്‍ മുഴക്കുകയും ചെയ്തു.

 സംഭവത്തിന് പിന്നാലെ നഗരത്തിന്റെ വിവിധ ഭാഗങ്ങളില്‍ സിപിഎം പ്രവര്‍ത്തകര്‍ പ്രതിഷേധം തുടരുകയാണ്. പ്രവര്‍ത്തകരെ അറസ്റ്റ് ചെയ്യാന്‍ പൊലിസ് ശ്രമിച്ചതോടെ പാളയം ഏരിയാ കമ്മിറ്റി ഓഫീസിന് മുന്നില്‍ സംഘര്‍ഷാവസ്ഥ രൂപപ്പെട്ടു. അറസ്റ്റ് അനുവദിക്കില്ലെന്ന നിലപാടിലാണ് പാര്‍ട്ടി നേതാക്കള്‍.

അതേസമയം, ഡല്‍ഹി ഇ.ഡി ആസ്ഥാനത്തെ പ്രതിഷേധത്തിനിടെ സി.പി.എം ജനറല്‍ സെക്രട്ടറി എം.എ ബേബിയെ പൊലിസ് കസ്റ്റഡിയിലെടുത്തു.

യാതൊരു രേഖകളും കണ്ണൂരിലെ പിണറായിയുടെ വീട്ടില്‍ നിന്നും കൊണ്ടുപോകുന്നില്ല എന്ന് ഉദ്യോഗസ്ഥര്‍ എഴുതി നല്‍കിയതായി എം.വി ജയരാജന്‍ അറിയിച്ചു.

പിണറായിയുടേ തിരുവനന്തപുരത്തെ വീട്ടില്‍ റെയ്ഡ് തുടരുകയാണ്. ഇന്ന് രാവിലെ ആറ് മണിയോടെയാണ് 12 ഓളം ഇടങ്ങളിലായി ഇ.ഡി റെയ്ഡ് ആരംഭിച്ചത്. 

 ഇഡി നടപടി പാര്‍ട്ടി നേതൃത്വത്തെ അപകീര്‍ത്തിപ്പെടുത്താനുള്ള രാഷ്ട്രീയ നീക്കമാണെന്ന് പി.രാജീവ് ആരോപിച്ചു. 'പിണറായി വിജയനെതിരായ ആക്രമണത്തെ കമ്മ്യൂണിസ്റ്റ് പ്രസ്ഥാനം ശക്തമായി പ്രതിരോധിക്കും,' എന്നും അദ്ദേഹം കൂട്ടിച്ചേര്‍ത്തു.

സി.എം.ആര്‍.എല്‍  ഓഫിസിലും എം.ഡി ശശിധരന്‍ കര്‍ത്തയുടെ വീട്ടിലും ഇ.ഡി പരിശോധന നടക്കുന്നുണ്ട്. സി.എം.ആര്‍.എല്‍ - എക്‌സാലോജിക് കേസിലാണ് പരിശോധന നടക്കുന്നത്. ഇ.ഡി അന്വേഷണത്തിന് എതിരെ സി.എം.ആര്‍.എല്‍ നല്‍കിയ ഹരജി ഹൈക്കോടതി ഇന്നലെ തള്ളിയിരുന്നു. ഇ.ഡിയുടെ അന്വേഷണ നടപടികളും സമന്‍സും സ്റ്റേ ചെയ്യണമെന്ന് ആവശ്യപ്പെട്ട് സി.എം.ആര്‍.എല്‍ മാനേജിങ് ഡയറക്ടര്‍ എസ്.എന്‍ ശശിധരന്‍ കര്‍ത്ത, കമ്പനി ഉദ്യോഗസ്ഥര്‍ തുടങ്ങിയവര്‍ നല്‍കിയ ഹരജികളാണ് ജസ്റ്റിസ് ടി.ആര്‍ രവിയുടെ ബെഞ്ച് തള്ളിയത്.