കല്‍പ്പറ്റ: പനമരത്ത് ചറുകാട്ടൂര്‍ സെന്റ് ജോസഫ് സ്‌കൂളിലെ 199 ാം നമ്പര്‍ ബൂത്തിനകത്ത് വോട്ടര്‍മാരോട് താമരക്ക് വോട്ട് ചെയ്യണമെന്ന് പോളിങ് ഓഫീസര്‍ പരസ്യമായി അഭ്യര്‍ത്ഥിച്ചതായി പരാതി. വോട്ട് മെഷീന്‍ ഓപ്പറേറ്റ് ചെയ്യുന്ന തേര്‍ഡ് പോളിങ് ഓഫീസറാണ് പരസ്യമായി ബൂത്തിനകത്ത് താമരക്ക് വോട്ട് ചെയ്യാന്‍ അഭ്യര്‍ത്ഥിച്ചതെന്നാണ് പരാതി.

വോട്ട് ചെയ്തിറങ്ങിയ നാല് പേര്‍ ഇതുസംബന്ധിച്ച് ആക്ഷേപം ഉന്നയിച്ചതോടെ യുഡിഎഫ് പ്രവര്‍ത്തകര്‍ പ്രതിഷേധവുമായെത്തി. യുഡിഎഫ് ജില്ലാ കണ്‍വീനര്‍ എച്ച്.ബി. പ്രദീപ് മാസ്റ്റര്‍ ബൂത്തിലെത്തി റിട്ട. ഓഫീസര്‍ക്ക് പരാതി നല്‍കി. തുടര്‍ന്ന് കോണ്‍ഗ്രസ് നല്‍കിയ പരാതിയുടെ അടിസ്ഥാനത്തില്‍ പോളിങ് ഓഫീസറെ മാറ്റി. 

അതേസമയത്ത് സംസ്ഥാനത്ത് വോട്ടെടുപ്പ് പുരോഗമിക്കുകയാണ്. വൈകിട്ട് മൂന്ന് മണി വരെയുള്ള കണക്ക് അനുസരിച്ച് സംസ്ഥാനത്ത് 62.71% ശതമാനമാണ് പോളിങ്. ത്രികോണ പോരാട്ടം നടക്കുന്ന മണ്ഡലങ്ങളില്‍ എല്ലാം മികച്ച പോളിങാണ് രേഖപ്പെടുത്തിയത്. എല്ലാ ജില്ലകളിലും പോളിംഗ് 50 ശതമാനം പിന്നിട്ടു. എറണാകുളം ജില്ലയിലാണ് ഏറ്റവും കൂടുതല്‍ പോളിങ് നടന്നത്. പത്തനംതിട്ട ജില്ലയിലാണ് കുറവ്. പോളിങ് 90 ശതമാനം വരെ ഉയരാമെന്ന് മുഖ്യ തെരഞ്ഞെടുപ്പ് ഓഫീസര്‍ ഡോ രത്തന്‍ യു കേല്‍ക്കര്‍ അഭിപ്രായപ്പെട്ടു.