തിരുവനന്തപുരം: കന്നി വോട്ട് ചെയ്യാൻ ജെൻസികൾക്ക് വോട്ടിനൊപ്പം ഹൽവയുടെ മധുരം കൂടി. 'വോട്ട് സ്വീറ്റെൻഡ് കേരള കാംപയിനിൻ്റെ' ഭാഗമായി കന്നി വോട്ടർമാരെ ഹൽവ നൽകിയാണ് തെരഞ്ഞെടുപ്പ് കമ്മിഷൻ സ്വീകരിച്ചത്. ഓരോ ജില്ലയിലും തെരഞ്ഞെടുത്ത ബൂത്തുകളിലാണ് ഹൽവ ബോക്‌സ് വിതരണം ചെയ്തത്.ഇതോടൊപ്പം ജെൻസി ബൂത്തുകളും സജ്ജീകരിച്ചിരുന്നു. വോട്ടെടുപ്പിൽ യുവജനതയുടെ സജീവ പങ്കാളിത്തം ഉറപ്പാക്കുന്നതിനാണ് ക്രമീകരണങ്ങൾ ഒരുക്കിയത്. 

തിരുവനന്തപുരം കവടിയാർ സാൽവേഷൻ ആർമിയിലെ പോളിങ് ബൂത്തിൽ വോട്ട് ചെയ്യാനെത്തിയ മുഖ്യ തെരഞ്ഞെടുപ്പ് ഓഫിസർ രത്തൻ യു. ഖേൽക്കർ ബൂത്തിലെത്തിയ യുവ വോട്ടർമാരുമായി സംവദിച്ചു. ജെൻസി വോട്ടർമാർക്ക് ഹൽവ ബോക്‌സും ജില്ലാ കലക്ടറുടെ താങ്ക്‌സ് കാർഡും ലക്കി ഡ്രോ കൂപ്പണും പ്രോത്സാഹന സമ്മാനമായി നൽകി. ജില്ലാ കലക്ടറുടെ സ്വന്തം കൈപ്പടയിലാണ് താങ്ക്‌സ് കാർഡ് ഒരുക്കിയത്. കൂപ്പണിൽ നിന്ന് തെരഞ്ഞെടുക്കപ്പെടുന്ന യുവ വോട്ടർമാർക്ക് ജില്ലാ കലക്ടറുമായി സംവദിക്കാൻ അവസരം ലഭിക്കും. ജെൻസി ബൂത്തുകളിൽ ക്രമീകരിച്ച സെൽഫി പോയിന്റുകളും ശ്രദ്ധേയമായി.