റിയാദ്: സഊദിയുടെ മിക്ക പ്രദേശങ്ങളിലും വെള്ളിയാഴ്ച മുതൽ ചൊവ്വാഴ്ച വരെ ഇടത്തരം മുതൽ കനത്ത മഴ വരെ ലഭിക്കാൻ സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം (എൻ.സി.എം) അറിയിച്ചു. അസീർ, ജിസാൻ, നജ്റാൻ, അൽബഹ, മക്ക, റിയാദ്, കിഴക്കൻ പ്രവിശ്യ, ഖസീം, നോർത്തേൺ ബോർഡേഴ്സ് എന്നീ പ്രവിശ്യകളിലാണ് മഴ മുന്നറിയിപ്പുള്ളത്.

കാലാവസ്ഥാ വ്യതിയാനങ്ങളെക്കുറിച്ചുള്ള അപ്ഡേറ്റുകൾ അറിയാൻ ഔദ്യോഗിക വെബ്സൈറ്റുകളും സാമൂഹിക മാധ്യമങ്ങളും 'അൻവാ' ആപ്പും പിന്തുടരണമെന്ന് കേന്ദ്രം പൊതുജനങ്ങളോട് അഭ്യർത്ഥിച്ചു. സുരക്ഷിതമായ സ്ഥലങ്ങളിൽ തുടരണമെന്നും താഴ്‌വരകളിൽ നിന്നും വെള്ളപ്പൊക്ക സാധ്യതയുള്ള പ്രദേശങ്ങളിൽ നിന്നും വിട്ടുനിൽക്കണമെന്നും സിവിൽ ഡിഫൻസ് ജനങ്ങൾക്ക് മുന്നറിയിപ്പ് നൽകി. മഴവെള്ളം കെട്ടിക്കിടക്കുന്ന ഇടങ്ങളിൽ ഇറങ്ങുകയോ നീന്തുകയോ ചെയ്യരുതെന്നും കർശന നിർദേശമുണ്ട്.

മക്ക മേഖലയിലെ തുർബ, അൽമോയ, അൽഖുർമ, റാനിയ, ത്വാഇഫ്, മെയ്സാൻ, അദം, അൽഅർദിയാത്ത് എന്നിവിടങ്ങളിൽ മിന്നൽപ്രളയത്തിനും ആലിപ്പഴ വീഴ്ചയ്ക്കും ശക്തമായ പൊടിക്കാറ്റിനും സാധ്യതയുണ്ട്. അതേസമയം അൽലൈത്ത്, അൽഖുൻഫുദ, മക്ക സിറ്റി, ജുമുഅ, ബഹ്റ, അൽകമിൽ എന്നിവിടങ്ങളിൽ നേരിയ മഴ ലഭിക്കും.

റിയാദ് മേഖലയിലും സമാനമായ കാലാവസ്ഥയാണ് പ്രവചിക്കുന്നത്. വാദി അൽദവാസിർ, സുലയ്യൽ, അഫ്‌ലാജ്, റിയാദ് നഗരം, ദിലാം, മുസാഹിമിയ, ദുർമ, ഖിദ്ദിയ, ദിരിയ, ഹുത്വാത് ബനി തമീം, അൽഹരീഖ്, അൽഖർജ്, മറാത്ത്, അഫീഫ്, അൽദവാദ്മി, അൽഖുവയ്യ, അൽറൈൻ എന്നിവിടങ്ങളിൽ ശക്തമായ മഴയും പ്രതീക്ഷിക്കുന്നു. എന്നാൽ റുമാ, ശഖ്‌റ, മജ്മഅ, സുൽഫി, അൽഘാട്ട്, സാദിഖ് എന്നിവിടങ്ങളിൽ നേരിയ മഴയായിരിക്കും ലഭിക്കുക.

അസീർ, ജിസാൻ, നജ്റാൻ, അൽബാഹ, കിഴക്കൻ പ്രവിശ്യ എന്നിവിടങ്ങളിലും കനത്ത മഴയ്ക്ക് സാധ്യതയുണ്ട്. ഖസീം, നോർത്തേൺ ബോർഡേഴ്സ്, മദീന എന്നിവിടങ്ങളിൽ നേരിയ മഴയാണ് പ്രതീക്ഷിക്കുന്നത്. നിലവിലെ കാലാവസ്ഥയിൽ അപകടസാധ്യതയുള്ള പ്രദേശങ്ങളിലേക്ക് പോകരുതെന്നും സുരക്ഷാ നിർദേശങ്ങൾ കർശനമായി പാലിക്കണമെന്നും അധികൃതർ ആവർത്തിച്ചു.

English summary : The National Center for Meteorology has forecast moderate to heavy rainfall across most regions of Saudi Arabia starting Friday and continuing through Tuesday.

Affected areas include Asir, Jazan, Najran, Al-Baha, Makkah, Riyadh, the Eastern Province, Qassim, and the Northern Borders.