തിരുവനന്തപുരം: സംസ്ഥാനത്തെ ഹയർ സെക്കൻഡറി പരീക്ഷാ ഫലപ്രഖ്യാപന തീയതിയിൽ മാറ്റം. നേരത്തെ മേയ് 22-ന് ഫലം വരുമെന്നായിരുന്നു അറിയിച്ചിരുന്നതെങ്കിലും പുതുക്കിയ നിശ്ചയപ്രകാരം മേയ് 25-ന് ഫലപ്രഖ്യാപനമുണ്ടാകുമെന്ന് വിദ്യാഭ്യാസ മന്ത്രി വി. ശിവൻകുട്ടി അറിയിച്ചു. ഹയർ സെക്കൻഡറി മൂല്യനിർണയ ക്യാമ്പുകൾ ഇന്ന് മുതൽ ആരംഭിക്കും.

പുതിയ അധ്യയന വർഷത്തോടനുബന്ധിച്ച് സംസ്ഥാനതല സ്കൂൾ പ്രവേശനോത്സവം ജൂൺ ഒന്നിന് നടക്കും. പുതിയ അധ്യയന വർഷത്തേക്കുള്ള പ്രവേശനം മേയ് 2 മുതൽ ആരംഭിക്കും. ഒരു തരത്തിലുള്ള പ്രവേശന പരീക്ഷകളും നടത്താൻ പാടില്ലെന്ന് മന്ത്രി കർശന നിർദേശം നൽകി.

മഴക്കാലത്തിന് മുൻപായി സ്‌കൂൾ മെയ്ന്റനൻസ് ജോലികൾ മേയ് 30-നകം പൂർത്തിയാക്കണം. ഈ വർഷം അഞ്ചാം ക്ലാസ് മുതൽ 'പഠന പിന്തുണ' പരിപാടി നടപ്പിലാക്കും. 30 ശതമാനത്തിൽ താഴെ മാർക്ക് ലഭിക്കുന്ന കുട്ടികൾക്ക് രണ്ടാഴ്ചത്തെ പ്രത്യേക ക്ലാസുകൾ നൽകിയ ശേഷം പരീക്ഷ നടത്തും.

എസ്.എസ്.എൽ.സി ഫലം മേയ് മൂന്നാം വാരം

തെരഞ്ഞെടുപ്പ് ഡ്യൂട്ടിക്ക് അധ്യാപകരെ നിയോഗിച്ച സാഹചര്യത്തിൽ എസ്.എസ്.എൽ.സി ഫലപ്രഖ്യാപനം അല്പം വൈകും. മേയ് മൂന്നാം വാരത്തോടെ ഫലം പ്രസിദ്ധീകരിക്കാനാണ് നിലവിലെ തീരുമാനം. ഇത്തവണ 4,17,497 വിദ്യാർഥികളാണ് പരീക്ഷ എഴുതിയത്.

യു.എ.ഇയിലെ പരീക്ഷകൾ റദ്ദാക്കി

പ്രതികൂല സാഹചര്യങ്ങൾ മൂലം ദുബൈയിലെ 633 വിദ്യാർഥികൾക്ക് പരീക്ഷ എഴുതാൻ സാധിക്കാത്തതിനാൽ യു.എ.ഇയിലെ പരീക്ഷകൾ റദ്ദാക്കി. ഇവർക്ക് മോഡൽ പരീക്ഷയുടെ മാർക്കും ഗ്രേസ് മാർക്കും മാനദണ്ഡമാക്കി ഫലം നൽകും.

കടുത്ത ചൂട് കണക്കിലെടുത്ത് അവധിക്കാലത്ത് സ്കൂളുകളിൽ ട്യൂഷനോ പ്രത്യേക ക്ലാസുകളോ നടത്തുന്നത് അംഗീകരിക്കില്ലെന്ന് മന്ത്രി വ്യക്തമാക്കി. രാവിലെ 11 മുതൽ ഉച്ചയ്ക്ക് 3 മണി വരെ ജോലി ചെയ്യുന്നത് തൊഴിൽ വകുപ്പ് വിലക്കിയിട്ടുണ്ട്. ഈ സാഹചര്യത്തിൽ കുട്ടികളെ സ്കൂളുകളിൽ എത്തിച്ച് ബുദ്ധിമുട്ടിക്കുന്നത് അനുവദിക്കില്ല.

അതേസമയം വിദ്യാർഥികളുടെ ഫലം സിബിഎസ്ഇ തടഞ്ഞുവെച്ച സംഭവത്തിൽ സർക്കാരിന് ഇടപെടുന്നതിന് പരിമിതികളുണ്ട്. എങ്കിലും രക്ഷിതാക്കളും വിദ്യാർത്ഥികളും പരാതി നൽകിയാൽ കുട്ടികളുടെ ഭാവി സംരക്ഷിക്കാൻ ആവശ്യമായ നടപടികൾ സ്വീകരിക്കുമെന്നും മന്ത്രി കൂട്ടിച്ചേർത്തു.

The Kerala Education Department has rescheduled the Higher Secondary exam results to May 25. Education Minister V. Sivankutty announced that school reopening (Praveshanolsavam) will take place on June 1, with admissions starting May 2.