ഗുവാഹത്തി: അസം നിയമസഭയില്‍ ഏകസിവില്‍ കോഡ് ബില്‍ അവതരിപ്പിച്ച് ഹിമന്ത സര്‍ക്കാര്‍. ഉത്തരാഖണ്ഡിനും, ഗുജറാത്തിനും പിന്നാലെയാണ് അസമിലും ഏകസിവില്‍ കോഡ് നടപ്പാക്കാന്‍ ബിജെപി ശ്രമിക്കുന്നത്. പാര്‍ലമെന്ററി കാര്യ മന്ത്രി അതുല്‍ ബോറയാണ് ബില്‍ സഭയില്‍ അവതരിപ്പിച്ചത്. 

ബഹുഭാര്യത്വം നിരോധിക്കുക, ലിവ് ഇന്‍ ബന്ധങ്ങള്‍ രജിസ്റ്റര്‍ ചെയ്യുക തുടങ്ങിയ  നിര്‍ദേശങ്ങള്‍ ബില്ലിലുണ്ട്. വിവാഹം, വിവാഹമോചനം, പിന്തുടര്‍ച്ചാവകാശം എന്നിവയുമായി ബന്ധപ്പെട്ട വ്യക്തിനിയമങ്ങള്‍ ജാതി, മത ഭേദമന്യേ സംസ്ഥാനത്തെ എല്ലാ പൗരന്‍മാര്‍ക്കും ഒരേ രീതിയിലാക്കാന്‍ ലക്ഷ്യമിട്ടാണ് ബില്‍ കൊണ്ടുവന്നതെന്ന് സര്‍ക്കാര്‍ അവകാശപ്പെടുന്നു. വിവാഹ പ്രായം പുരുഷന്‍മാര്‍ക്ക് 21 വയസും, സ്ത്രീകള്‍ക്ക് 18 വയസുമായി ബില്ലില്‍ നിശ്ചയിക്കുന്നുണ്ട്.  

നേരത്തെ മുഖ്യമന്ത്രി ബിമന്ത ബിശ്വ ശര്‍മ അധികാരമേറ്റതിന് ശേഷം നടന്ന ആദ്യ മന്ത്രിസഭാ യോഗത്തില്‍ തന്നെ ഏകീകൃത സിവില്‍ കോഡിന് അംഗീകാരം നല്‍കിയിരുന്നു. എന്നാല്‍ നിയമം അസമില്‍ താമസിക്കുന്ന പട്ടികവര്‍ഗക്കാര്‍ക്ക് ബാധകമായിരിക്കില്ലെന്നും സര്‍ക്കാര്‍ അറിയിച്ചു.

ALSO READ: അട്ടപ്പാടി മധു വധക്കേസ്: ഒന്നാം പ്രതിയെ ഹൈക്കോടതി വെറുതെ വിട്ടു; മറ്റ് 15 പ്രതികളുടെ അപ്പീൽ തള്ളി 

അതേസമയം ബിജെപി സര്‍ക്കാരിന്റെ ഏകപക്ഷീയമായ ഇടപെടല്‍ അംഗീകരിക്കില്ലെന്ന നിലപാടിലാണ് പ്രതിപക്ഷ കക്ഷികള്‍. സര്‍ക്കാരിന്റെ ഗൂഢലക്ഷ്യങ്ങളുടെ ഒളിച്ചുകടത്തലാണ് ബില്ലിലൂടെ നടപ്പാക്കുന്നതെന്ന് പ്രതിപക്ഷം ആരോപിച്ചു. 

ന്യൂനപക്ഷങ്ങളുടെ അവകാശങ്ങള്‍ കവരുന്നതെന്ന് വിമര്‍ശിക്കപ്പെടുന്ന ഏക സിവില്‍ കോഡ് 2024ല്‍ ഉത്തരാഖണ്ഡിലാണ് ആദ്യം നടപ്പിലാക്കിയത്. ഈ വര്‍ഷം മാര്‍ച്ചില്‍ ഗുജറാത്ത് സര്‍ക്കാരും ബില്‍ പാസാക്കിയിരുന്നു. 

Himanta Biswa Sarma government introduced the Uniform Civil Code Bill in the Assam Legislative Assembly.