ദുബൈ: സാധാരണക്കാര്‍ക്ക് പ്രാഥമിക ചികിത്സാ സൗകര്യങ്ങള്‍ വീട്ടുപടിക്കല്‍ എത്തിക്കുന്നതിന്റെ ഭാഗമായി ആസ്റ്റര്‍ ഡി.എം ഹെല്‍ത്ത്കെയറിന്റെ സി.എസ്.ആര്‍ വിഭാഗമായ 'ആസ്റ്റര്‍ വളണ്ടിയേഴ്‌സ്' മൊബൈല്‍ മെഡിക്കല്‍ യൂനിറ്റ് (എം.എം.യു) ശൃംഖല വിപുലീകരിച്ചു. അഞ്ച് എം.എം.യു കൂടി നിരത്തിലിറക്കിയതോടെ ആഗോള യൂനിറ്റുകളുടെ എണ്ണം 76 ആയി. ഇന്ത്യയില്‍ 54 യൂനിറ്റുകള്‍ പ്രവര്‍ത്തനസജ്ജമാണ്.

റാഞ്ചി, കാണ്‍പൂര്‍, ഭോപാല്‍, ജയ്പൂര്‍, ഭുവനേശ്വര്‍ എന്നീ ഉത്തരേന്ത്യന്‍ നഗരങ്ങളിലെ ചേരിപ്രദേശങ്ങള്‍, തെരുവോരങ്ങള്‍, ഭവനരഹിതര്‍ എന്നിവരെ കേന്ദ്രീകരിച്ചാണ് പുതിയ യൂണിറ്റുകള്‍ സേവനം നടത്തുക. ബെംഗളൂരുവില്‍ നടന്ന ചടങ്ങില്‍ ആസ്റ്റര്‍ ഡി.എം ഹെല്‍ത്ത്കെയര്‍ സ്ഥാപക ചെയര്‍മാന്‍ ഡോ. ആസാദ് മൂപ്പന്‍ പുതിയ യൂണിറ്റുകളുടെ ഫ്‌ളാഗ് ഓഫ് നിര്‍വഹിച്ചു. ആസ്റ്റര്‍ ഡി.എം ഫൗണ്ടേഷന്റെ ധനസഹായത്തോടെ ദയ റിഹാബിലിറ്റേഷന്‍ ട്രസ്റ്റ് (തണല്‍), മലബാര്‍ ഗോള്‍ഡ് ആന്‍ഡ് ഡയമണ്ട്‌സ് ചാരിറ്റബിള്‍ ട്രസ്റ്റ് എന്നിവയുടെ സഹകരണത്തോടെയാണ് പദ്ധതി നടപ്പാക്കുന്നത്.

ആസ്റ്ററുമായുള്ള പങ്കാളിത്തം വലിയൊരു സാമൂഹിക പ്രതിബദ്ധതയുടെ ഭാഗമാണെന്ന് മലബാര്‍ ഗ്രൂപ്പ് ചെയര്‍മാന്‍ എം.പി. അഹമ്മദ് പറഞ്ഞു. ചടങ്ങില്‍ ദയ റിഹാബിലിറ്റേഷന്‍ ട്രസ്റ്റ് ട്രസ്റ്റി അബ്ദുല്‍ നാസര്‍, മലബാര്‍ ഗ്രൂപ്പ് റീജ്യണല്‍ ഹെഡ് ഫില്‍സര്‍ ബാബു തുടങ്ങിയവര്‍ സംബന്ധിച്ചു. 2017-ല്‍ പ്രവര്‍ത്തനമാരംഭിച്ച ആസ്റ്റര്‍ വോളന്റിയേഴ്‌സ് 22 രാജ്യങ്ങളിലായി 80 ലക്ഷത്തിലധികം ആളുകള്‍ക്കാണ് ആരോഗ്യസേവനങ്ങള്‍ എത്തിച്ചത്.

Summary : Aster Volunteers, the CSR arm of Aster DM Healthcare, has expanded its Mobile Medical Unit (MMU) network by introducing five new vehicles. This addition brings their total global fleet to 76 units, with 54 currently operational across India, aiming to deliver primary healthcare directly to the doorsteps of underprivileged communities.