തിരുവനന്തപുരത്ത് ബിജെപി പ്രവർത്തകരും, നാട്ടുകാരും തമ്മിലുണ്ടായ സംഘർഷം റിപ്പോർട്ട് ചെയ്യാനെത്തിയ മാധ്യമ പ്രവർത്തകർക്ക് നേരെ ബിജെപി ആക്രമണം. സംഘർഷത്തിന് പിന്നാലെ ബിജെപി റോഡിൽ കുത്തിയിരുന്ന് പ്രതിഷേധം സംഘടിപ്പിച്ചിരുന്നു. ഇത് റിപ്പോർട്ട് ചെയ്യാനെത്തിയ മാധ്യമ പ്രവർത്തകർക്ക് നേരെ ബിജെപി പ്രവർത്തകർ ആക്രോശിക്കുകയും, കയ്യേറ്റം ചെയ്യാൻ ശ്രമിക്കുകയും ചെയ്തു. വനിത മാധ്യമപ്രവർത്തകർക്ക് നേരെയും കയ്യേറ്റ ശ്രമമുണ്ടായി. 

മാധ്യമ പ്രവർത്തകർ വാർത്ത റിപ്പോർട്ട് ചെയ്യുന്നതിനിടെ ബിജെപി പ്രവർത്തകർ ആക്രോശിക്കുകയായിരുന്നു. നേരത്തെയുണ്ടായ കൂട്ടത്തല്ലിൽ നാട്ടുകാരുടെ ഭാ​ഗം റിപ്പോർട്ട് ചെയ്യുമ്പോഴാണ് മാധ്യമ പ്രവർത്തകരെ ബിജെപി കയ്യേറ്റം ചെയ്യാൻ ശ്രമിച്ചത്. പ്രദേശത്ത് സംഘർഷാവസ്ഥ തുടരുകയാണ്. 

ഇന്ന് രാത്രിയോടെയാണ് നെട്ടയം മലമുകളിൽ ബിജെപി പ്രവർത്തകരും, നാട്ടുകാരും തമ്മിൽ കൂട്ടത്തല്ലുണ്ടായത്. പ്രദേശത്ത് രണ്ട് കുടുംബങ്ങള്‍ തമ്മിലുണ്ടായ സംഘർഷം ബിജെപി ഇടപെട്ട് വഷളാക്കിയെന്നാണ് ആരോപണം. നാട്ടുകാരനായ യുവാവ് ബിജെപി പ്രവർത്തകയ്ക്ക് നേരെ നഗ്നത പ്രദർശനം നടത്തിയെന്നാണ് ബിജെപി ആരോപിക്കുന്നത്. എന്നാൽ നാട്ടുകാർ ഇത് തള്ളുന്നു. കള്ളപരാതി കൊടുത്ത് സംഘർഷമുണ്ടാക്കാനാണ് ബിജെപി ശ്രമിക്കുന്നതെന്ന് നാട്ടുകാർ ആരോപിക്കുന്നു.