മുംബൈ: ഐപിഎൽ 2026-ലെ ഗ്ലാമർ പോരാട്ടത്തിൽ മുംബൈ ഇന്ത്യൻസിനെതിരെ ചെന്നൈ സൂപ്പർ കിംഗ്‌സിന് കൂറ്റൻ സ്കോർ. ടോസ് നഷ്ടപ്പെട്ട് ബാറ്റിംഗിനിറങ്ങിയ ചെന്നൈ നിശ്ചിത 20 ഓവറിൽ 6 വിക്കറ്റ് നഷ്ടത്തിൽ 207 റൺസെടുത്തു. 54 പന്തിൽ നിന്ന് പുറത്താകാതെ 101 റൺസ് നേടിയ മലയാളി താരം സഞ്ജു സാംസണിന്റെ വെടിക്കെട്ട് ഇന്നിംഗ്‌സാണ് മത്സരത്തിന്റെ ഹൈലൈറ്റ്.

സഞ്ജുവിന്റെ മാന്ത്രിക ഇന്നിംഗ്‌സ്

മത്സരത്തിന്റെ തുടക്കത്തിൽ വിക്കറ്റുകൾ വീണെങ്കിലും ഒരറ്റത്ത് ഉറച്ചുനിന്ന സഞ്ജു സാംസൺ മുംബൈ ബൗളർമാരെ കടന്നാക്രമിച്ചു.ഇന്നിംഗ്‌സിന്റെ അവസാന പന്തിലായിരുന്നു സഞ്ജുവിന്റെ സെഞ്ച്വറി നേട്ടം. 10 ഫോറുകളും ആറ് കൂറ്റൻ സിക്‌സറുകളും അടങ്ങുന്നതായിരുന്നു സഞ്ജുവിന്റെ മാസ്മരിക ഇന്നിംഗ്‌സ്.കൃഷ് ഭഗത് എറിഞ്ഞ അവസാന ഓവറിൽ രണ്ട് സിക്‌സറും ഒരു ഫോറും ഉൾപ്പെടെ സ്ട്രൈക്ക് കൈവിടാതെ ബാറ്റ് ചെയ്ത സഞ്ജു 54 പന്തിലാണ് 101 റൺസ് പൂർത്തിയാക്കിയത്.

This is Chettan's game
We're living in it! 🥳#MIvCSK #WhistlePodu pic.twitter.com/dRi96JQS0f

— Chennai Super Kings (@ChennaiIPL) April 23, 2026

രോഹിത്തും ധോണിയും പുറത്ത്; വാംഖഡെയിൽ ഞെട്ടൽ

മത്സരത്തിന് മുന്നോടിയായി പരിശീലനം നടത്തിയിരുന്നെങ്കിലും സൂപ്പർ താരങ്ങളായ രോഹിത് ശർമ്മയും എം.എസ്. ധോണിയും പ്ലെയിംഗ് ഇലവനിൽ ഇല്ലാതിരുന്നത് ആരാധകരെ നിരാശരാക്കി. പരിക്ക് മൂലമാണോ അതോ തന്ത്രപരമായ മാറ്റമാണോ എന്ന് വ്യക്തമല്ല.

 മുംബൈയുടെ ബൗളിംഗ് പ്രകടനം

ടോസ് നേടിയ മുംബൈ ക്യാപ്റ്റൻ ഹാർദിക് പാണ്ഡ്യ ബൗളിംഗാണ് തിരഞ്ഞെടുത്തത്.മുംബൈ നിരയിൽ അല്ലാ ഗസൻഫറും അശ്വനി കുമാറും രണ്ട് വിക്കറ്റുകൾ വീതം വീഴ്ത്തി.ജസ്പ്രീത് ബുംറയും മിച്ചൽ സാന്റ്നറും ഓരോ വിക്കറ്റും സ്വന്തമാക്കി. കൃത്യമായ ഇടവേളകളിൽ ചെന്നൈയുടെ വിക്കറ്റുകൾ വീഴ്ത്താൻ മുംബൈയ്ക്ക് സാധിച്ചെങ്കിലും സഞ്ജുവിനെ തളയ്ക്കാൻ മുബൈക്കായില്ല.