തൃശൂർ: മുണ്ടത്തിക്കോട് വെടിക്കെട്ടുപുരയിലുണ്ടായ ഉഗ്രസ്ഫോടനത്തിൽ പരുക്കേറ്റ് ചികിത്സയിലായിരുന്ന തിരുവമ്പാടി വിഭാഗത്തിന്റെ വെടിക്കെട്ട് ലൈസൻസി സതീശൻ അന്തരിച്ചു. 90 ശതമാനത്തിലേറെ പൊള്ളലേറ്റ് തൃശൂർ മെഡിക്കൽ കോളേജിൽ തീവ്രപരിചരണ വിഭാഗത്തിൽ ചികിത്സയിലായിരുന്നു അദ്ദേഹം. സതീശന്റെ നില അതീവ ഗുരുതരമാണെന്ന് നേരത്തെ തന്നെ ആശുപത്രി അധികൃതർ അറിയിച്ചിരുന്നു. ഇതോടെ അപകടത്തിൽ മരിച്ചവരുടെ എണ്ണം ഔദ്യോഗിക കണക്കുകൾ പ്രകാരം പത്തായി ഉയർന്നു.

ALSO READ: മഹാരാഷ്ട്രയിൽ കേരളത്തിൽ നിന്നുള്ള ലോറിക്ക് നേരെ സായുധ സംഘത്തിന്റെ ക്രൂരമായ ആക്രമണം; തൊഴിലാളികളെ വെട്ടിപ്പരിക്കേൽപ്പിച്ചു

അപകടത്തിൽ പരുക്കേറ്റ മറ്റ് നാല് പേരുടെ നില ഇപ്പോഴും ഗുരുതരമായി തുടരുകയാണ്. ഇവർ മെഡിക്കൽ കോളേജ് ഐസിയുവിൽ നിരീക്ഷണത്തിലാണ്. അതേസമയം, പരുക്കുകൾ ഗുരുതരമല്ലാത്ത ആറ് പേർ ഇന്ന് ആശുപത്രി വിട്ടേക്കും.

സ്ഫോടനത്തെത്തുടർന്ന് കാണാതായ നാല് പേരെ തിരിച്ചറിയാനുള്ള നടപടികൾ പൊലിസ് വേഗത്തിലാക്കിയിട്ടുണ്ട്. ഇവരുടെ ബന്ധുക്കളുടെ ഡിഎൻഎ (DNA) സാമ്പിളുകൾ ശേഖരിച്ചിട്ടുണ്ട്. ഇതിന്റെ പരിശോധനാഫലം നാളെ ലഭിക്കുന്നതോടെ മരിച്ചവരെ സംബന്ധിച്ച ഔദ്യോഗിക സ്ഥിരീകരണം ഉണ്ടാകുമെന്ന് അധികൃതർ അറിയിച്ചു. സ്ഫോടനത്തിന്റെ കാരണം കണ്ടെത്താൻ വിദഗ്ധ സംഘം സ്ഥലത്ത് വിശദമായ പരിശോധന നടത്തിവരികയാണ്.

വെടിക്കെട്ട് ദുരന്തത്തിന്റെ പശ്ചാത്തലത്തിൽ തൃശൂർ പൂരത്തിന്റെ ആഘോഷങ്ങളിൽ മാറ്റം വരുത്തിയിട്ടുണ്ട്. തിരുവമ്പാടി വിഭാഗം ഇന്നും ദുഃഖാചരണം തുടരും. പാറമേക്കാവ് വിഭാഗത്തിന്റെ ചമയ പ്രദർശനം ഇന്ന് ആരംഭിക്കുമെങ്കിലും അത് കേവലം ചടങ്ങുകൾ മാത്രമായി ഒതുക്കാനാണ് തീരുമാനം. പൂര വിളംബര ചടങ്ങുകൾ നാളെ നടക്കും. സർക്കാരും ദേവസ്വങ്ങളും നടത്തിയ ചർച്ചയെത്തുടർന്ന് ഇത്തവണത്തെ പ്രധാന വെടിക്കെട്ട് ഒഴിവാക്കാൻ തീരുമാനിച്ചു. പൂരത്തിന്റെ പ്രധാന ആകർഷണമായ കുടമാറ്റം വെട്ടിച്ചുരുക്കി ചടങ്ങുകൾ പൂർത്തിയാക്കും.

തിരുവമ്പാടി വിഭാഗത്തിനായി പടക്കങ്ങൾ നിർമ്മിച്ചിരുന്ന മുണ്ടത്തിക്കോട്ടെ ശാലയിലാണ് നാടിനെ നടുക്കിയ ദുരന്തമുണ്ടായത്. അന്വേഷണം പൂർത്തിയാകുന്നതോടെ സ്ഫോടനത്തിന്റെ യഥാർത്ഥ കാരണങ്ങൾ വ്യക്തമാകുമെന്നാണ് പൊലിസ് കരുതുന്നത്.

Satheesan, the fireworks licensee for the Thiruvambady devaswom, has passed away due to severe burn injuries sustained in the Mundathikode fireworks explosion. He was undergoing treatment at Thrissur Medical College with 90% burns.