തെൽ അവീവ്: കഴിഞ്ഞ കുറച്ചു കാലങ്ങളായി തന്റെ ആരോഗ്യത്തെക്കുറിച്ച് പ്രചരിച്ചിരുന്ന അഭ്യൂഹങ്ങൾക്ക് വിരാമമിട്ട് ഇസ്റാഈൽ പ്രധാനമന്ത്രി ബെഞ്ചമിൻ നെതന്യാഹു രംഗത്ത്. താൻ പ്രോസ്റ്റേറ്റ് കാൻസറിന് ചികിത്സയിലായിരുന്നുവെന്ന വിവരം അദ്ദേഹം ഔദ്യോഗികമായി സ്ഥിരീകരിച്ചു. ഇതാദ്യമായാണ് തന്റെ ആരോഗ്യസ്ഥിതിയെക്കുറിച്ച് നെതന്യാഹു പരസ്യമായ വെളിപ്പെടുത്തൽ നടത്തുന്നത്.

ഇറാൻ-ഇസ്റാഈൽ യുദ്ധത്തിന്റെ പശ്ചാത്തലത്തിൽ നെതന്യാഹുവിന്റെ ആരോഗ്യത്തെക്കുറിച്ച് നിരവധി അഭ്യൂഹങ്ങൾ അന്താരാഷ്ട്ര തലത്തിൽ പ്രചരിച്ചിരുന്നു. എന്നാൽ നിലവിൽ താൻ പൂർണ്ണ ആരോഗ്യവാനാണെന്നും ഔദ്യോഗിക കൃത്യനിർവഹണത്തിന് യാതൊരു തടസ്സവുമില്ലെന്നും നെതന്യാഹു വ്യക്തമാക്കി. രോഗം പ്രാരംഭ ഘട്ടത്തിൽ തന്നെ കണ്ടെത്താനായത് വലിയ ആശ്വാസമായെന്നും അദ്ദേഹം കൂട്ടിച്ചേർത്തു.

ALSO READ: പെന്റഗൺ ഇമെയിലുകൾ ചോർന്നു: സ്‌പെയിനിനെ നാറ്റോയിൽ നിന്ന് പുറത്താക്കാൻ ട്രംപിന്റെ നീക്കം; അംഗത്വം റദ്ദാക്കാൻ കഴിയില്ലെന്ന് ഔദ്യോഗിക വക്താവ്

2024 ഡിസംബറിലായിരുന്നു രോഗത്തിന്റെ ആദ്യ സൂചനകൾ പുറത്തുവന്നത്. ഡിസംബർ 29-ന് അദ്ദേഹത്തിന് ഒരു ശസ്ത്രക്രിയ നടത്തിയിരുന്നു. ഇതിന് പിന്നാലെ നടത്തിയ വിശദമായ പരിശോധനകളിലാണ് പ്രോസ്റ്റേറ്റിൽ അർബുദത്തിന്റെ സാന്നിധ്യം ഡോക്ടർമാർ സ്ഥിരീകരിച്ചത്. 0.9 സെന്റിമീറ്റർ വലിപ്പമുള്ള ഒരു മുഴയായിരുന്നു പരിശോധനയിൽ കണ്ടെത്തിയത്.

രോഗം സ്ഥിരീകരിച്ചതോടെ അത്യാധുനികമായ റേഡിയേഷൻ തെറാപ്പി ഉൾപ്പെടെയുള്ള ചികിത്സാ രീതികളാണ് നൽകിയത്. വിദഗ്ധ ഡോക്ടർമാരുടെ മേൽനോട്ടത്തിൽ അതീവ രഹസ്യമായായിരുന്നു ചികിത്സാ നടപടികൾ പുരോഗമിച്ചത്. ഏകദേശം രണ്ടര മാസം മുമ്പ് തന്നെ ചികിത്സാ നടപടികൾ വിജയകരമായി പൂർത്തിയാക്കിയിരുന്നു.

ചികിത്സ കഴിഞ്ഞിട്ടും എന്തുകൊണ്ട് ഈ വിവരം മറച്ചുവെച്ചു എന്നതിനും നെതന്യാഹു വിശദീകരണം നൽകി. യുദ്ധം കൊടുമ്പിരിക്കൊണ്ടിരിക്കുന്ന സാഹചര്യത്തിൽ തന്റെ ആരോഗ്യത്തെക്കുറിച്ചുള്ള വാർത്തകൾ ശത്രുക്കൾ ദുരുപയോഗം ചെയ്യാൻ സാധ്യതയുണ്ടെന്ന് അദ്ദേഹം ഭയപ്പെട്ടിരുന്നു. രാജ്യത്തിന്റെ സുരക്ഷ കണക്കിലെടുത്താണ് വിവരം രഹസ്യമാക്കി വെച്ചതെന്ന് നെതന്യാഹു വെളിപ്പെടുത്തി

തന്റെ ആരോഗ്യസ്ഥിതിയെക്കുറിച്ച് വ്യാജപ്രചാരണങ്ങൾ നടത്തി രാജ്യത്ത് അസ്ഥിരതയുണ്ടാക്കാൻ ശത്രുക്കൾ ശ്രമിക്കുമെന്ന് താൻ കരുതിയിരുന്നുവെന്ന് നെതന്യാഹു വ്യക്തമാക്കി. യുദ്ധമുഖത്ത് രാജ്യം നിൽക്കുമ്പോൾ അനാവശ്യ ആശങ്കകൾ ഒഴിവാക്കുക എന്നതായിരുന്നു നെതന്യാഹുവിന്റെ ലക്ഷ്യം.

"ദൈവത്തിന് നന്ദി, ഞാൻ ഇപ്പോൾ പൂർണ്ണ ആരോഗ്യവാനാണ്. ശാരീരികമായി അതീവ ഊർജ്ജസ്വലനായ അവസ്ഥയിലാണ് ഞാനുള്ളത്. പ്രോസ്റ്റേറ്റിലെ പ്രശ്നം പൂർണ്ണമായും ഭേദമായിരിക്കുന്നു," നെതന്യാഹു തന്റെ ഔദ്യോഗിക എക്സ് (X) ഹാൻഡിലിൽ കുറിച്ചു.

2026 ഏപ്രിൽ 20-ന് പുറത്തിറങ്ങിയ അദ്ദേഹത്തിന്റെ വാർഷിക ആരോഗ്യ റിപ്പോർട്ടിലാണ് ചികിത്സയുടെ കൂടുതൽ വിശദാംശങ്ങളുള്ളത്. ചികിത്സയ്ക്ക് ശേഷമുള്ള സ്കാനിംഗ് റിപ്പോർട്ടുകളെല്ലാം പോസിറ്റീവ് ആണെന്നും അർബുദത്തിന്റെ സാന്നിധ്യം ഇപ്പോൾ ശരീരത്തിലില്ലെന്നും മെഡിക്കൽ റിപ്പോർട്ട് പറയുന്നു

76 വയസ്സുകാരനായ നെതന്യാഹുവിന്റെ ആരോഗ്യം ഇസ്രയേൽ രാഷ്ട്രീയത്തിൽ വലിയ ചർച്ചകൾക്ക് വഴി വെച്ചിരുന്നു. മുൻപ് പലതവണ ഹൃദയസംബന്ധമായ അസുഖങ്ങൾക്കും അദ്ദേഹം ചികിത്സ തേടിയിരുന്നു. എന്നാൽ കാൻസർ ബാധയെക്കുറിച്ചുള്ള വാർത്തകൾ പുറത്തുവന്നത് വലിയ ഗൗരവത്തോടെയാണ് രാജ്യാന്തര സമൂഹം നോക്കിക്കാണുന്നത്.

നിലവിൽ യുദ്ധമുഖത്തെ തന്ത്രങ്ങൾ ആവിഷ്കരിക്കുന്നതിലും രാജ്യത്തെ നയിക്കുന്നതിലും തനിക്ക് യാതൊരു ആരോഗ്യപ്രശ്നങ്ങളുമില്ലെന്ന് അദ്ദേഹം ഉറപ്പുനൽകുന്നു. പ്രധാനമന്ത്രിയുടെ വെളിപ്പെടുത്തലോടെ മാസങ്ങളായി നിലനിന്നിരുന്ന രാഷ്ട്രീയ അനിശ്ചിതത്വങ്ങൾക്കും അഭ്യൂഹങ്ങൾക്കുമാണ് ഇപ്പോൾ അന്ത്യമായിരിക്കുന്നത്.

Israeli Prime Minister Benjamin Netanyahu has revealed that he was diagnosed with and successfully treated for early-stage prostate cancer. According to an official medical report released on April 24, 2026, the treatment was conducted in secret over the past few months.