പത്തനംതിട്ട: കോഴഞ്ചേരിയില്‍ വീടിനുള്ളിലെ എയര്‍ കണ്ടീഷണര്‍ (എസി) പൊട്ടിത്തെറിച്ച് തീ പടര്‍ന്നു. കോഴഞ്ചേരി സ്വദേശിയായ മാത്യു തോമസിന്റെ വീട്ടിലാണ് രാത്രി അപകടമുണ്ടായത്. രാത്രിയില്‍ എട്ടരയോടെ നടന്ന സംഭവത്തില്‍ മാത്യുവും ഭാര്യയും പരിക്കേല്‍ക്കാതെ അത്ഭുതകരമായി രക്ഷപ്പെടുകയായിരുന്നു. ഷോര്‍ട്ട് സര്‍ക്യൂട്ടാണ് അപകടകാരണമെന്നാണ് പ്രാഥമിക നിഗമനം.

ഏഴ് വര്‍ഷത്തോളം പഴക്കമുള്ള എസിയാണ് കത്തിനശിച്ചത്. കഠിനമായ ചൂട് കാരണം എസി തുടര്‍ച്ചയായി പ്രവര്‍ത്തിപ്പിച്ചതാകാം ഷോര്‍ട്ട് സര്‍ക്യൂട്ടിലേക്ക് നയിച്ചതെന്നും സംശയിക്കുന്നു. കഴിഞ്ഞ രണ്ട് വര്‍ഷമായി എസി സര്‍വീസ് ചെയ്തിരുന്നില്ലെന്ന് വീട്ടുകാര്‍ അറിയിച്ചു. എസിയില്‍ നിന്ന് തീപ്പൊരി പടരുന്നത് ശ്രദ്ധയില്‍പ്പെട്ട ഉടന്‍ ദമ്പതികള്‍ പുറത്തേക്ക് ഓടി മാറിയതിനാലാണ് വലിയ ദുരന്തം ഒഴിവായത്.

 ALSO READ: സൈബര്‍ പോര് മുറുകുന്നതിനിടെ ഹൈബി ഈഡന്‍ സ്ഥാനമൊഴിയുന്നു; കെപിസിസി ഡിജിറ്റല്‍ മീഡിയ സെല്ലില്‍ അഴിച്ചുപണിക്ക് സാധ്യത

എസി ഉപയോഗിക്കുന്നവര്‍ ശ്രദ്ധിക്കാന്‍

വേനല്‍ക്കാലത്ത് എസിയുടെ അമിത ഉപയോഗം വര്‍ധിക്കുന്നതിനാല്‍ കൃത്യമായ ഇടവേളകളില്‍ സര്‍വീസ് ചെയ്യേണ്ടത് അനിവാര്യമാണ്. പഴയ മെഷീനുകള്‍ തുടര്‍ച്ചയായി പ്രവര്‍ത്തിപ്പിക്കുന്നത് വയറിങിന് അമിതഭാരമുണ്ടാക്കാനും തീപിടിത്തത്തിന് കാരണമാകാനും സാധ്യതയുണ്ടെന്ന് അഗ്‌നിശമന രക്ഷാസേന മുന്നറിയിപ്പ് നല്‍കുന്നു.

An elderly couple in Kozhencherry, Pathanamthitta, had a narrow escape after their seven-year-old air conditioner caught fire due to a suspected short circuit.