തിരുനാവായ (മലപ്പുറം): ഈ വർഷം ഇതുവരെ പി.എസ്.സി പ്രസിദ്ധീകരിച്ചത് 18 വിജ്ഞാപനങ്ങൾ മാത്രം. ഫെബ്രുവരി 28, മാർച്ച് 31 തീയതികളിലായിട്ടാണ് ഈ വിജ്ഞാപനങ്ങൾ. തിങ്കളാഴ്‌ചകളിലെ പതിവ് പി.എസ്.സി യോഗങ്ങൾ ഈയിടെയായി നടക്കാത്തതാണ് വിജ്ഞാപനം മുടങ്ങുന്നതിന് കാരണം. പുതിയ വിജ്ഞാപനം അംഗീകരിക്കുന്നതും പ്രസിദ്ധീകരണത്തിന് നൽകുന്നതും ഈ യോഗങ്ങളിലാണ്. ഇതുവരെ പ്രസിദ്ധീകരിച്ച 18 വിജ്ഞാപനങ്ങളിൽ പ്രധാന തസ്തികകളൊന്നും ഉൾപ്പെട്ടിട്ടില്ല. ഇവയിൽ എല്ലാവിഭാഗം ഉദ്യോഗാർഥികൾക്കും അപേക്ഷിക്കാൻ കഴിയുന്ന ജനറൽ വിജ്ഞാപനങ്ങൾ രണ്ടെണ്ണം മാത്രമാണുള്ളത്. പിന്നോക്ക വികസന കോർപറേഷനിൽ എക്സിക്യൂട്ടീവ് അസിസ്റ്റൻ്റ്, ട്രാവൻകൂർ ടൈറ്റാനിയം പ്രോഡക്ട്‌സിൽ അസിസ്റ്റൻ്റ് മാനേജർ (പ്രൊഡക്‌ഷൻ) എന്നിവയാണിവ.

ALSO READ: കേന്ദ്ര സർക്കാരിന് കീഴിൽ 500+ ഒഴിവുകൾ; സ്റ്റെനോ​ഗ്രാഫർ റിക്രൂട്ട്മെന്റ് നടക്കുന്നു; അപേക്ഷ മെയ് 15 വരെ  

വിവിധ വകുപ്പുകളിൽ ക്ലർക്ക്, ലാസ്റ്റ് ഗ്രേഡ് സെർവന്റ്, മോട്ടോർ വാഹന വകുപ്പിൽ അസിസ്റ്റൻ്റ് മോട്ടോർ വെഹിക്കിൾ ഇൻസ്പെക്ടർ ഉൾപ്പെടെ നിരവധി പ്രധാന വിജ്ഞാപനങ്ങളാണ് ഉദ്യോഗാർഥികൾ ഈ വർഷം പ്രതീക്ഷിക്കുന്നത്. എല്ലാവർഷവും ആദ്യ നാലു മാസങ്ങളിൽ വളരെക്കുറച്ച് വിജ്ഞാപനങ്ങൾ മാത്രം പ്രസിദ്ധീകരിച്ച് വർഷാവസാനം കുട്ടത്തോടെ പ്രസിദ്ധീകരിക്കുന്ന രീതിയാണുള്ളത്. കഴിഞ്ഞവർഷം 902 തസ്‌തികകളിൽ വിജ്ഞാപനം പ്രസിദ്ധീകരിച്ചതിൽ 294 എണ്ണവും ഡിസംബർ 30, 31 തീയതികളിലെ ഗസറ്റിലായിരുന്നു. ഈ വർഷമെങ്കിലും ഈ രീതിക്ക് മാറ്റമുണ്ടാകണമെന്നാണ് ഉദ്യോഗാർഥികൾ ആവശ്യപ്പെടുന്നത്.

psc has published only 18 notifications this year