ദുബൈ : യുഎഇയിൽ വരും ദിവസങ്ങളിൽ താപനില ഉയരുമെന്നും അന്തരീക്ഷം പൊടിപടലങ്ങളാൽ നിറയാൻ സാധ്യതയുണ്ടെന്നും ദേശീയ കാലാവസ്ഥാ കേന്ദ്രം (NCM) അറിയിച്ചു. ചില തീരപ്രദേശങ്ങളിൽ മൂടൽമഞ്ഞിനും നേരിയ മഞ്ഞിനും സാധ്യതയുണ്ട്.

പകൽ സമയങ്ങളിൽ നേരിയതോ മിതമായതോ ആയ കാറ്റ് വീശുമെങ്കിലും, ചിലയിടങ്ങളിൽ കാറ്റ് ശക്തമാകാൻ സാധ്യതയുണ്ട്. ഇത് തുറസ്സായ സ്ഥലങ്ങളിൽ പൊടിപടലങ്ങൾ ഉയരുന്നതിനും കാഴ്ചപരിധി കുറയുന്നതിനും കാരണമാകും. ഉൾനാടൻ പ്രദേശങ്ങളിൽ താപനില 39 ഡിഗ്രി സെൽഷ്യസ് മുതൽ 46 ഡിഗ്രി സെൽഷ്യസ് വരെ ഉയർന്നേക്കാം. തീരപ്രദേശങ്ങളിലും ദ്വീപുകളിലും 36 മുതൽ 41 ഡിഗ്രി സെൽഷ്യസ് വരെയും, മലയോര മേഖലകളിൽ 32 മുതൽ 37 ഡിഗ്രി സെൽഷ്യസ് വരെയുമായിരിക്കും താപനില. രാത്രിയിലും പുലർച്ചെയും അന്തരീക്ഷ ഈർപ്പം (ഹ്യുമിഡിറ്റി) 90 ശതമാനം വരെ ഉയർന്നേക്കാവുന്നതിനാൽ തീരപ്രദേശങ്ങളിൽ മൂടൽമഞ്ഞ് അനുഭവപ്പെടാൻ സാധ്യതയുണ്ട്.

 അറബിക്കടൽ പൊതുവെ ശാന്തമായിരിക്കുമെങ്കിലും തിങ്കളാഴ്ച മുതൽ രാത്രികാലങ്ങളിൽ കടൽ പ്രക്ഷുബ്ധമാകാൻ സാധ്യതയുണ്ട്. ഒമാൻ കടൽ വരും ദിവസങ്ങളിലും സാധാരണ നിലയിൽ തുടരുമെന്നും കാലാവസ്ഥാ കേന്ദ്രം വ്യക്തമാക്കി.

English Summary: The UAE is expected to experience rising temperatures and dusty conditions over the weekend and coming days, according to the National Center of Meteorology (NCM). Fresh winds may blow dust and sand in exposed areas, reducing horizontal visibility.