ഹൈദരാബാദ്: അത്താഴത്തിന് ചിക്കന്‍ കറി ഉണ്ടാക്കാത്തത് ചോദ്യം ചെയ്ത ഭര്‍ത്താവിനെ ഭാര്യ വെട്ടിക്കൊന്നു. കാമറെഡ്ഡിയില്‍ ഗോസാങ്കി കോളനിയിലെ കൊടാണ്ടം ശിവജിയെന്ന യുവാവിനാണ് ഭാര്യയുമായുണ്ടായ വഴക്കില്‍ ജീവന്‍ നഷ്ടമായത്. സംഭവത്തില്‍ ലക്ഷ്മിയെ പൊലിസ് കസ്റ്റഡിയിലെടുത്തു. 

ശനിയാഴ്ച്ച രാത്രി ഒന്‍പത് മണിയോടെയാണ് സംഭവം. അന്നേദിവസം ശിവജി മാര്‍ക്കറ്റില്‍ നിന്ന് ചിക്കന്‍ കൊണ്ടുവന്നിരുന്നു. ഇത് പാകം ചെയ്യാന്‍ ഭാര്യയോട് പറഞ്ഞെങ്കിലും ചെയ്തില്ല. അത്താഴത്തിന് ചിക്കന്‍ വിളമ്പാത്തത് ചോദ്യം ചെയ്തതോടെ ഇരുവരും തമ്മില്‍ വാക്കേറ്റമുണ്ടായി. ബഹളം കേട്ട് തൊട്ടപ്പുറത്ത് കഴിയുകയായിരുന്ന ബന്ധുക്കള്‍ ഇരുവരെയും പിടിച്ചുമാറ്റിയെങ്കിലും പിന്നാലെ വീണ്ടും തര്‍ക്കം തുടങ്ങി. 

ALSO READ: സംസ്ഥാനത്ത് ലോഡ് ഷെഡിങ് ഇല്ലെന്ന് ആവര്‍ത്തിച്ച് വൈദ്യുതി മന്ത്രി; ഓവര്‍ ലോഡ് വരുമ്പോള്‍ ഡ്രിപ്പാകുന്നതെന്ന് 

ഇതിനിടെ ലക്ഷ്മി കയ്യില്‍ കിട്ടിയ അരിവാളെടുത്ത് ലക്ഷ്മി ശിവജിയെ വെട്ടിപ്പരിക്കേല്‍പ്പിക്കുകയായിരുന്നു. കഴുത്തിന് ഗുരുതരമായി മുറിവേറ്റ ശിവജി ഉടന്‍ തറയില്‍ വീണു. വീഴ്ച്ചയില്‍ തലയ്ക്ക് ഗുരുതരമായി പരിക്കേറ്റ ശിവജി തല്‍ക്ഷണം മരിച്ചു. കത്തി ഉപയോഗിച്ചുള്ള ആക്രമണത്തിലുണ്ടായ മുറിവില്‍ നിന്ന് ധാരാളം രക്തം വാര്‍ന്നുപോയതാണ് മരണകാരണമെന്ന് പൊലിസ് പറഞ്ഞു. 

അതേസമയം ശിവജിയും ഭാര്യയും തമ്മില്‍ കഴിഞ്ഞ കുറച്ച് നാളുകളായി പ്രശ്‌നത്തിലായിരുന്നെന്ന് ബന്ധുക്കള്‍ പറയുന്നു. ആറ് വര്‍ഷങ്ങള്‍ക്ക് മുന്‍പാണ് ഇരുവരും വിവാഹിതരായത്. ദമ്പതികള്‍ക്ക് രണ്ട് പെണ്‍മക്കളുണ്ട്. പലകാര്യങ്ങളും പറഞ്ഞ് ശിവജി തന്റെ ഭാര്യയെ കുറ്റപ്പെടുത്തുമായിരുന്നെന്ന് അയല്‍വാസികള്‍ പറയുന്നു.