മലപ്പുറം: പെണ്‍കുട്ടികളുടെ ചിത്രങ്ങള്‍ മോര്‍ഫ് ചെയ്ത് അശ്ലീല കണ്ടന്റാക്കി ടെലഗ്രാമില്‍ വില്‍പ്പന  നടത്തിയ കേസിലെ പ്രതി പിടിയില്‍. മലപ്പുറം വള്ളിക്കുന്ന് അരിയല്ലൂര്‍ സ്വദേശി നിതിന്‍ മോഹന്‍ദാസാണ് അറസ്റ്റിലായത്. പരപ്പനങ്ങാടി പൊലിസാണ് ഇയാളെ അറസ്റ്റ് ചെയ്തത്. ടെലഗ്രാമില്‍ നിന്ന് തെളിവുകള്‍ ലഭിച്ചതിന്റെ അടിസ്ഥാനത്തിലാണ് അറസ്റ്റ്. നിതിന്‍ ഉപയോഗിച്ച ഡിവൈസില്‍ നിന്നാണ് ചിത്രങ്ങള്‍ അപ്ലോഡ് ചെയ്തിരിക്കുന്നതെന്ന് പരപ്പനങ്ങാടി പൊലിസ് കണ്ടെത്തി. 

രാമനാട്ടുകര സ്വദേശിനിയായ യുവതിയുടെ പരാതിയിലാണ് നടപടി. കണ്ണൂര്‍ സ്വദേശി നല്‍കിയ പരാതിയില്‍ ന്യൂ മാഹി പൊലിസും കേസ് രജിസ്റ്റര്‍ ചെയ്തിട്ടുണ്ട്. ഇതുകൂടാതെ മലപ്പുറം, താനൂര്‍, പരപ്പനങ്ങാടി, ബേപ്പൂര്‍ എന്നിവിടങ്ങളിലടക്കം എട്ട് പരാതികളാണ് നിലവിലുള്ളത്. 

ചെറിയ കുട്ടികള്‍ മുതല്‍ 40 വയസ് പ്രായമുള്ളവരുടെ ചിത്രങ്ങള്‍ പ്രതി ദുരുപയോഗം ചെയ്തിട്ടുണ്ട്. പരിചയക്കാരുടേയും ബന്ധുക്കളുടേയും ചിത്രങ്ങളാണ് ഇത്തരത്തില്‍ മോര്‍ഫ് ചെയ്യാനായി നിതിന്‍ ഇന്‍സ്റ്റഗ്രാമില്‍ നിന്നടക്കം എടുത്തിട്ടുള്ളത്. സംഭവത്തില്‍ കൂടുതല്‍ ഡിജിറ്റല്‍ തെളിവുകള്‍ ശേഖരിക്കാനുള്ള തയ്യാറെടുപ്പിലാണ് പൊലിസ്. ടെലഗ്രാമിനോടും പൊലിസ് വിവരങ്ങള്‍ തേടിയിരുന്നു.

The Kerala Police have arrested Nithin Mohandas in connection with a case involving the morphing and selling of private photographs of women and minor girls.