ആലുവ: നഗരമധ്യത്തിലെ ഷോപ്പിങ് കോംപ്ലക്‌സിന് മുന്നില്‍ ചില്ലുതകര്‍ന്ന നിലയില്‍ കണ്ടെത്തിയ കാറും അതിനുള്ളിലെ വിചിത്രമായ കാഴ്ചകളും നാട്ടുകാരെയും പൊലിസിനെയും ഒരുപോലെ കുഴപ്പിച്ചു. കാറിനുള്ളില്‍ ഒരു താറാവും മുയലും ഒപ്പം ചുറ്റികയും കത്തിയും. കേട്ടവര്‍ക്കും കണ്ടവര്‍ക്കും ദുരൂഹതയേറി. എന്നാല്‍ സംഗതി അന്വേഷിച്ചു ചെന്ന പൊലിസിന് കിട്ടിയത് ചിരിവരുന്ന മറുപടിയാണ്.

കഴിഞ്ഞദിവസം രാത്രിയാണ് കാസിനോ സ്വദേശിയായ കാറുടമ തോട്ടുമുഖത്തെ പെറ്റ് ഷോപ്പില്‍ നിന്നും താറാവിനെയും മുയലിനെയും വാങ്ങിയത്. ഇവയെ കാറിലിരുത്തി മദ്യപിക്കാനിറങ്ങിയ ഇയാള്‍ തിരികെ എത്തിയപ്പോള്‍ കാറിന്റെ താക്കോല്‍ എടുക്കാന്‍ മറന്നു പോയിരുന്നു. മദ്യലഹരിയിലായിരുന്ന ഇയാള്‍ കാറിനുള്ളിലെ മിണ്ടാപ്രാണികള്‍ക്ക് ശ്വാസം കിട്ടാനായി സ്വന്തം കാറിന്റെ ചില്ല് ചുറ്റിക കൊണ്ട് അടിച്ചു തകര്‍ക്കുകയായിരുന്നു.

രാവിലെ ചില്ലുതകര്‍ന്ന കാറും അതിനുള്ളിലെ ജീവികളെയും കണ്ട നാട്ടുകാര്‍ വിവരമറിയിച്ചതിനെ തുടര്‍ന്ന് ആലുവ പൊലിസെത്തിയാണ് ഇവയെ പുറത്തെടുത്തത്. കാറിലുണ്ടായിരുന്ന കത്തിയും ചുറ്റികയും ഇയാളുടെ പണിയായുധങ്ങളായിരുന്നു. മദ്യത്തിന്റെ ഹാങ്ങോവര്‍ മാറി ഉച്ചയോടെ എത്തിയ ഉടമ തന്റെ കാറുമായി മടങ്ങി. വളര്‍ത്തുമൃഗങ്ങളോടുള്ള ഉടമയുടെ അമിത സ്‌നേഹം കാരണം മണിക്കൂറുകളോളമാണ് ആലുവ നഗരം ഈ 'മിസ്റ്ററി'ക്ക് പിന്നാലെ ഓടിയത്.

The mystery of a damaged car containing a duck and a rabbit in Aluva was solved when it was revealed that the drunk owner broke the glass himself to ensure ventilation for his new pets after losing the keys.