ചെന്നൈ: തമിഴ്‌നാട് നിയമസഭാ തിരഞ്ഞെടുപ്പിൽ ഡിഎംകെയ്ക്കേറ്റ കനത്ത പ്രഹരത്തിന് പിന്നാലെ വൈകാരികമായ കുറിപ്പുമായി മുഖ്യമന്ത്രി എം.കെ. സ്റ്റാലിൻ. രാഷ്ട്രീയ ജീവിതത്തിൽ വലിയ വിജയങ്ങളും പരാജയങ്ങളും താൻ കണ്ടിട്ടുണ്ടെന്നും എന്നാൽ നയങ്ങളും പ്രത്യയശാസ്ത്രവുമാണ് തനിക്ക് പ്രധാനമെന്നും അദ്ദേഹം വ്യക്തമാക്കി.

"മനസാക്ഷിയോട് നീതി പുലർത്തി"

ഭരണനേട്ടങ്ങൾ മാത്രം ഉയർത്തിക്കാട്ടിയാണ് താൻ വോട്ട് തേടിയതെന്ന് സ്റ്റാലിൻ പറഞ്ഞു. ഫേസ്ബുക്ക് കുറിപ്പിലെ പ്രധാന ഭാഗങ്ങൾ ഇങ്ങനെ:

"എനിക്ക് വോട്ട് ചെയ്തവർക്ക് വേണ്ടി മാത്രമല്ല, വോട്ട് ചെയ്യാൻ മറന്നവർക്ക് വേണ്ടി കൂടിയാണ് ഞാൻ കഴിഞ്ഞ അഞ്ച് വർഷം ഭരിച്ചത്. എന്റെ മനസാക്ഷിയോട് നീതി പുലർത്തി. കഴിവിനും അപ്പുറം സംസ്ഥാനത്തിന് വേണ്ടി അധ്വാനിച്ചു. തിരഞ്ഞെടുപ്പ് ഫലത്തിൽ ജയപരാജയങ്ങൾ സ്വാഭാവികമാണ്. എന്നാൽ ഡിഎംകെയുടെ യാത്ര ഇവിടെ അവസാനിക്കുന്നില്ല." എന്ന്  എം.കെ. സ്റ്റാലിൻ കുറിച്ചു.

തിരഞ്ഞെടുപ്പിൽ വിജയിച്ചവർക്ക് അദ്ദേഹം അഭിനന്ദനങ്ങൾ അറിയിക്കുകയും ചെയ്തു.

വിശ്വസ്തൻ വീഴ്ത്തിയ 'ദളപതി'

വിജയ്‌യുടെ പാർട്ടിയായ തമിഴക വെട്രി കഴകത്തിന്റെ (ടിവികെ) സ്ഥാനാർത്ഥി വി.എസ്. ബാബുവാണ് സ്റ്റാലിനെ കൊളത്തൂരിൽ മലർത്തിയടിച്ചത്. 2021-ൽ 70,000 വോട്ടുകൾക്ക് ജയിച്ച സ്റ്റാലിൻ ഇത്തവണ പരാജയപ്പെട്ടത് ദേശീയതലത്തിൽ തന്നെ വലിയ ചർച്ചയായിട്ടുണ്ട്.

പഴയ വിശ്വസ്തൻ തന്നെ സ്റ്റാലിനെ വീഴ്ത്തി എന്നത് പരാജയത്തിന്റെ ആഘാതം കൂട്ടി. 2011-ൽ സ്റ്റാലിന്റെ തിരഞ്ഞെടുപ്പ് ചുമതലക്കാരനായിരുന്ന ബാബുവിനെ, ഭൂരിപക്ഷം കുറഞ്ഞെന്ന പേരിൽ സ്റ്റാലിൻ പുറത്താക്കിയിരുന്നു. പിന്നീട് ഡിഎംകെ വിട്ട് എഐഎഡിഎംകെയിലും ഒടുവിൽ വിജയ് പക്ഷത്തുമെത്തിയ ബാബു, സ്റ്റാലിനെ നേരിട്ട് വീഴ്ത്തിക്കൊണ്ടാണ് രാഷ്ട്രീയമായ മധുരപ്രതികാരം പൂർത്തിയാക്കിയത്.

ഡിഎംകെയിൽ അമ്പരപ്പ്

മുഖ്യമന്ത്രി തന്നെ പരാജയപ്പെട്ടതോടെ ഡിഎംകെ കേന്ദ്രങ്ങൾ വലിയ അമ്പരപ്പിലാണ്. ദ്രാവിഡ രാഷ്ട്രീയത്തിന്റെ അനിഷേധ്യ നേതാവായിരുന്ന സ്റ്റാലിന്റെ കരിയറിലെ നാലാമത്തെ തോൽവിയാണിത്. ഭരണവിരുദ്ധ വികാരത്തോടൊപ്പം വിജയ് തരംഗം കൂടി ആഞ്ഞടിച്ചതാണ് തമിഴ്‌നാട്ടിൽ ഇത്തരമൊരു അട്ടിമറിക്ക് കാരണമായതെന്നാണ് പ്രാഥമിക വിലയിരുത്തൽ.