ദോഹ: ഖത്തര്‍ നാഷണല്‍ വിഷന്‍ 2030ന്റെ ഭാഗമായി രാജ്യത്തെ സ്വകാര്യ മേഖലയില്‍ സ്വദേശികളുടെ പങ്കാളിത്തം വര്‍ദ്ധിപ്പിക്കുന്നതിനുള്ള നടപടികള്‍ കര്‍ശനമാക്കി ഖത്തര്‍ ഭരണകൂടം. നിലവില്‍ സ്വകാര്യ മേഖലയിലുള്ള സ്വദേശികളുടെ പ്രാതിനിധ്യം 17 ശതമാനത്തില്‍ നിന്ന് 20 ശതമാനത്തിലേക്ക് ഉയര്‍ത്താനാണ് സര്‍ക്കാര്‍ ലക്ഷ്യമിടുന്നത്. ഇതിന്റെ ഭാഗമായി തൊഴിലിടങ്ങളില്‍ കൂടുതല്‍ സൗകര്യങ്ങളും അവസരങ്ങളും ഒരുക്കാന്‍ കമ്പനികള്‍ക്ക് മന്ത്രാലയം നിര്‍ദ്ദേശം നല്‍കി.

സ്വദേശിവല്‍ക്കരണ (Qatarization) നയം പ്രോത്സാഹിപ്പിക്കുന്നതിനായി '2026 ഖത്തര്‍ നാഷണലൈസേഷന്‍ അവാര്‍ഡ്' ഏര്‍പ്പെടുത്തിയത് ഈ മേഖലയിലെ വലിയൊരു മാറ്റമാണ്. മികച്ച തൊഴില്‍ അന്തരീക്ഷം ഒരുക്കുന്ന കമ്പനികള്‍ക്കും കഴിവുള്ള സ്വദേശി ഉദ്യോഗസ്ഥര്‍ക്കും ഈ അവാര്‍ഡിലൂടെ അംഗീകാരവും പ്രത്യേക ആനുകൂല്യങ്ങളും ലഭിക്കും. ഇത് സ്വകാര്യ കമ്പനികള്‍ക്കിടയില്‍ സ്വദേശികളെ നിയമിക്കുന്നതിനുള്ള ആരോഗ്യകരമായ മത്സരം വര്‍ദ്ധിപ്പിക്കുമെന്നാണ് വിലയിരുത്തല്‍.

2024ല്‍ നിലവില്‍ വന്ന 'പ്രൈവറ്റ് സെക്ടര്‍ നാഷണലൈസേഷന്‍ ലോ' (Private Sector Nationalization Law) ഇതിനായി ശക്തമായ നിയമപരമായ അടിത്തറയാണ് ഒരുക്കിയിരിക്കുന്നത്. സ്വദേശികളെ സ്വകാര്യ മേഖലയില്‍ നിയമിക്കുന്നതിന് വ്യക്തമായ നിയമപരിരക്ഷയും ആനുകൂല്യങ്ങളും ഈ നിയമം ഉറപ്പാക്കുന്നു. തൊഴിലുടമകള്‍ക്ക് സ്വദേശികളെ നിയമിക്കുന്നതില്‍ പ്രോത്സാഹനങ്ങളും സര്‍ക്കാര്‍ വാഗ്ദാനം ചെയ്യുന്നുണ്ട്.

സ്വദേശികളെ മികച്ച തസ്തികകളില്‍ നിയമിക്കാനും അവരുടെ കഴിവിനനുസരിച്ചുള്ള അവസരങ്ങള്‍ നല്‍കാനും ഈ നിയമ ചട്ടക്കൂട് കമ്പനികളെ നിര്‍ബന്ധിതരാക്കുന്നു. രാജ്യത്തിന്റെ സാമ്പത്തിക ഭദ്രതയില്‍ സ്വകാര്യ മേഖലയുടെ പങ്കാളിത്തം ഉറപ്പുവരുത്തുന്നതിനൊപ്പം, സ്വദേശി യുവജനങ്ങള്‍ക്ക് തൊഴില്‍ അവസരങ്ങള്‍ സൃഷ്ടിക്കുക എന്നതും ഈ നയത്തിലൂടെ ഖത്തര്‍ ലക്ഷ്യമിടുന്നത്.

രാജ്യത്തെ തൊഴില്‍ വിപണിയില്‍ വരാനിരിക്കുന്ന മാറ്റങ്ങള്‍ വരും വര്‍ഷങ്ങളില്‍ സ്വകാര്യ മേഖലയിലെ പ്രവര്‍ത്തനരീതിയില്‍ വലിയ സ്വാധീനം ചെലുത്തുമെന്നാണ് സാമ്പത്തിക വിദഗ്ധരുടെ വിലയിരുത്തല്‍.

English Summary: As part of Qatar National Vision 2030, the government aims to increase the participation of nationals in the private sector from 17 percent to 20 percent. For this purpose, the '2026 Qatar Nationalization Award' has been introduced. Companies that provide a good working environment and talented national officials will receive recognition and special benefits through this. The government is providing clear legal protection and incentives for employing nationals in the private sector through the 'Private Sector Nationalization Law' of 2024.