മസ്‌കത്ത്: ഒമാനിലെ സന്നദ്ധ സംഘടനകളിലും ചാരിറ്റി സ്ഥാപനങ്ങളിലും കൂടുതൽ തൊഴിലവസരങ്ങൾ സൃഷ്ടിക്കുന്നതിനായി നാഷനൽ പ്രോഗ്രാം ഫോർ എംപ്ലോയ്‌മെന്റ് ചർച്ച നടത്തി. സാമൂഹിക വികസന മന്ത്രി ഡോ. ലൈല അഹമ്മദ് അൽ നജ്ജാറുമായി നടത്തിയ കൂടിക്കാഴ്ചയിൽ നിർണായക തീരുമാനങ്ങൾ കൈക്കൊണ്ടത്. ദേശീയ വികസന ലക്ഷ്യങ്ങളെ പിന്തുണയ്ച്ചുകൊണ്ട് സാമ്പത്തിക പങ്കാളിയായി ഈ മേഖലയെ മാറ്റാനാണ് ലക്ഷ്യമിടുന്നത്. ഇതിന്റെ ഭാ​ഗമായി ചാരിറ്റി മേഖലകളുടെ കാര്യക്ഷമത വർധിപ്പിച്ചുകൊണ്ട് കൂടുതൽ തൊഴിലവസരങ്ങൾ സൃഷ്ടിക്കാനും കമ്മ്യൂണിറ്റി സംരംഭങ്ങളുടെ സാമൂഹിക-സാമ്പത്തിക സ്വാധീനം വർധിപ്പിക്കാനും ലക്ഷ്യമിടുന്നുണ്ട്.

ALSO READ: ബഹ്‌റൈനിൽ ഹജ്ജ് ഒരുക്കങ്ങൾ പൂർത്തിയായി; ആദ്യ സംഘങ്ങൾ ഉടൻ പുറപ്പെടും

ഫണ്ടിങ്, പുതിയ സംരംഭങ്ങൾ, തൊഴിൽ എന്നിവയെ ഏകോപിപ്പിച്ചുകൊണ്ട് കൂടുതൽ കാര്യക്ഷമമായ പ്രവർത്തനങ്ങളെക്കുറിച്ച് യോഗത്തിൽ ചർച്ചയായി. സന്നദ്ധ-ചാരിറ്റി സ്ഥാപനങ്ങളിലെ തൊഴിൽ കാര്യങ്ങൾ നിയന്ത്രിക്കാൻ ഒരു ദേശീയ സമിതി രൂപീകരിക്കും. സർക്കാർ ഏജൻസികൾ, സ്വകാര്യ മേഖല, സാമൂഹിക സ്ഥാപനങ്ങൾ എന്നിവ തമ്മിലുള്ള പങ്കാളിത്തം ഈ സമിതിയുടെ മേൽനോട്ടത്തിൽ നടക്കും. ഒമാൻ വിഷൻ 2040ന്റെ ലക്ഷ്യങ്ങൾ കൈവരിക്കുന്നതിനായി ആവശ്യമായ നിയമപരവും ഭരണപരവുമായ നടപടികൾ ആരംഭിക്കാൻ യോഗത്തിൽ തീരുമാനമായി. തൊഴിൽ മന്ത്രിയും നാഷനൽ പ്രോഗ്രാം ഫോർ എംപ്ലോയ്‌മെന്റ് സൂപ്പർവൈസർ ജനറലുമായ ഡോ. മഹദ് സെയ്ദ് ബാ ഒവൈൻ യോഗത്തിൽ പങ്കെടുത്തു.

Oman’s National Program for Employment has held discussions with the Ministry of Social Development to create more job opportunities within the voluntary and charitable sectors. To support Oman Vision 2040, a national committee will be formed to oversee employment regulations and foster partnerships between government agencies, private sectors, and social institutions.