തിരുവനന്തപുരം: സംസ്ഥാനത്ത് എസ്എസ്എല്‍സി പരീക്ഷ ഫലം പ്രഖ്യാപിക്കുന്നതില്‍ പ്രതിസന്ധി തുടരുന്നു. പുതിയ സര്‍ക്കാര്‍ ചുമതലയേല്‍ക്കാന്‍ വൈകുന്നത് ഫല പ്രഖ്യാപനത്തെയും ബാധിക്കുമെന്നാണ് ആശങ്ക. വെള്ളിയാഴ്ച്ച ഫലം പ്രഖ്യാപിക്കുമെന്നാണ് നേരത്തെ അറിയിച്ചിരുന്നത്.

സാധാരണ വിദ്യാഭ്യാസ മന്ത്രിയാണ് ഫലം പ്രഖ്യാപിക്കുക. മന്ത്രിയില്ലെങ്കില്‍ പകരം വകുപ്പ് സെക്രട്ടറി ഫലം പ്രഖ്യാപിക്കണം. മൂല്യനിര്‍ണയമെല്ലാം പൂര്‍ത്തിയായിട്ടുണ്ട്. ഫലം വെള്ളിയാഴ്ച്ച തന്നെ പ്രഖ്യാപിക്കണോ എന്ന കാര്യത്തില്‍ നാളെ ചേരുന്ന പരീക്ഷ ബോര്‍ഡ് യോഗത്തില്‍ അന്തിമ തീരുമാനമുണ്ടാകുമെന്നാണ് പ്രതീക്ഷ. 

നേരത്തെ വിദ്യാഭ്യാസ മന്ത്രി വി ശിവന്‍കുട്ടി പുറത്തിറക്കിയ സര്‍ക്കുലറില്‍ മേയ് 15ന് എസ്എസ്എല്‍സി ഫലം പ്രഖ്യാപിക്കുമെന്നായിരുന്നു അറിയിച്ചിരുന്നത്. പ്ലസ് ടു ഫലം മേയ് 22നും, പ്ലസ് വണ്‍ ഫലം ജൂണ്‍ 10നും നടക്കുമെന്നായിരുന്നു അറിയിപ്പ്. അന്തിമ തീരുമാനം വൈകുന്ന റിപ്പോര്‍ട്ടില്‍ വിദ്യാര്‍ഥികളും ആശങ്കയിലാണ്. 

ഇത്തവണ 4,17,497 വിദ്യാര്‍ഥികളാണ് എസ്എസ്എല്‍സി പരീക്ഷ എഴുതിയത്. ഏപ്രില്‍ 16 മുതല്‍ മൂല്യനിര്‍ണയ ക്യാമ്പുകള്‍ ആരംഭിച്ചു. സംസ്ഥാനത്ത് 89 ക്യാമ്പുകളിലായി 24,000 അധ്യാപകരാണ് ഇത്തവണ മൂല്യനിര്‍ണയ ക്യാമ്പില്‍ പങ്കെടുത്തത്.