ന്യൂഡല്‍ഹി: ആഗോള വിപണിയിലെ വിമാന ഇന്ധന വിലയിലുണ്ടായ കുതിച്ചു ചാട്ടം എയര്‍ ഇന്ത്യയെ പ്രതിസന്ധിയിലാക്കുന്നു. പ്രവര്‍ത്തനച്ചെലവ് ക്രമാതീതമായി വര്‍ധിച്ചതോടെ അന്താരാഷ്ട്ര സര്‍വീസുകള്‍ വെട്ടിക്കുറയ്ക്കാന്‍ ടാറ്റ ഗ്രൂപ്പിന്റെ ഉടമസ്ഥതയിലുള്ള എയര്‍ ഇന്ത്യ നിര്‍ബന്ധിതരായിരിക്കുകയാണ്. വരും മാസങ്ങളില്‍ നൂറോളം സര്‍വീസുകള്‍ റദ്ദാക്കുകയോ എണ്ണം കുറയ്ക്കുകയോ ചെയ്യാനാണ് കമ്പനിയുടെ തീരുമാനം.

ഫെബ്രുവരിയില്‍ ബാരലിന് 99.40 ഡോളറായിരുന്ന വിമാന ഇന്ധനവില മെയ് മാസത്തോടെ 162.89 ഡോളറിലേക്ക് ഉയര്‍ന്നതാണ് കമ്പനിക്ക് കനത്ത തിരിച്ചടിയായത്. പശ്ചിമേഷ്യയിലെ യുദ്ധസാഹചര്യങ്ങളാണ് ഇന്ധന വിലയിലെ ഈ അനിയന്ത്രിതമായ വര്‍ധനയ്ക്ക് കാരണമായിരിക്കുന്നത്.

 ALSO READ: മിന്നല്‍പ്പിണരുകള്‍ ജീവന്‍ കവരുമ്പോള്‍: മങ്കടയിലെ ദുരന്തം നല്‍കുന്ന പാഠങ്ങളും മുന്‍കരുതലുകളും

ഡല്‍ഹിയില്‍ നിന്ന് ഷിക്കാഗോ, നെവാര്‍ക്ക്, സിംഗപ്പൂര്‍, ഷാങ്ഹായ് തുടങ്ങിയ നഗരങ്ങളിലേക്കുള്ള വിമാന സര്‍വീസുകള്‍ പൂര്‍ണ്ണമായും റദ്ദാക്കി. സാന്‍ ഫ്രാന്‍സിസ്‌കോ, പാരീസ്, ടൊറന്റോ തുടങ്ങിയ റൂട്ടുകളിലെ സര്‍വീസുകളുടെ എണ്ണവും ഗണ്യമായി കുറച്ചു.

എയര്‍ ഇന്ത്യയുടെ ഈ തീരുമാനത്തില്‍ ഗള്‍ഫ് മേഖലയിലടക്കം കഴിയുന്ന ഇന്ത്യന്‍ പ്രവാസികള്‍ വലിയ ആശങ്കയിലാണ്. കുറഞ്ഞ ചെലവില്‍ നാട്ടിലെത്താന്‍ ആശ്രയിച്ചിരുന്ന സര്‍വീസുകള്‍ കുറയുന്നത് പ്രവാസികളുടെ യാത്രാദുരിതം വര്‍ധിപ്പിക്കും. പ്രതിസന്ധി പരിഹരിക്കാന്‍ കേന്ദ്ര സര്‍ക്കാര്‍ ഇടപെടണമെന്ന ആവശ്യവുമായി ഫെഡറേഷന്‍ ഓഫ് ഇന്ത്യന്‍ എയര്‍ലൈന്‍സ് രംഗത്തെത്തിയിട്ടുണ്ട്.

 Air India is reducing international flights due to a massive surge in aviation fuel prices, causing travel anxiety among NRIs and prompting calls for government intervention.