ന്യൂഡൽഹി: കേരളത്തിലെ പുതിയ മുഖ്യമന്ത്രിയെ തിരഞ്ഞെടുക്കുന്നതിനെ സംബന്ധിച്ച അനിശ്ചിതത്വങ്ങൾക്ക് നാളെ വിരാമമാകും. പുതിയ മുഖ്യമന്ത്രിയെ കണ്ടെത്താനുള്ള കോൺഗ്രസ് ഹൈക്കമാൻഡ് തല ചർച്ചകളിൽ ഇന്നും അന്തിമ പ്രഖ്യാപനം ഉണ്ടായില്ല. എഐസിസി അധ്യക്ഷൻ മല്ലികാർജുൻ ഖാർഗെയുടെ വസതിയിൽ നടന്ന നിർണായക കൂടിക്കാഴ്ചയ്ക്ക് ശേഷം, ഔദ്യോഗിക പ്രഖ്യാപനം നാളെയുണ്ടാകുമെന്ന് എഐസിസി മാധ്യമ വിഭാ​ഗം ജനറൽ സെക്രട്ടറി ജയറാം രമേശ് അറിയിച്ചു. മുഖ്യമന്ത്രിയെ തീരുമാനിക്കാനുള്ള ചർച്ചകളെല്ലാം പൂർത്തിയായെന്നും ജയറാം രമേശ് പറഞ്ഞു.

ALSO READ: ഭരണസ്തംഭനം: സഖ്യകക്ഷികൾക്കിടയിൽ കടുത്ത അതൃപ്തി 

മുഖ്യമന്ത്രി പദത്തെ ചൊല്ലിയുള്ള അനിശ്ചിതത്വം തുടരുന്നതിനിടെയാണ് ഇന്ന് വൈകിട്ട് മല്ലികാർജുൻ ഖാർഗെയും രാഹുൽ ഗാന്ധിയും കൂടിക്കാഴ്ച നടത്തിയത്. ഏകദേശം ഒരു മണിക്കൂറോളം നീണ്ട ചർച്ചയ്ക്ക് ശേഷമാണ് ജയറാം രമേശുമായി മല്ലികാർജുൻ ഖാർഗെ ചർച്ച നടത്തിയത്.

ചർച്ചയ്ക്ക് ശേഷം ഖാർഗെയുടെ വസതിയിൽ നിന്നും മടങ്ങിയ രാഹുൽ ഗാന്ധി മാധ്യമങ്ങളോട് പ്രതികരിച്ചില്ലെങ്കിലും, പിന്നാലെ എത്തിയ ജയറാം രമേശ് ആണ് നാളെ പ്രഖ്യാപനം ഉണ്ടാകും എന്നതിനെ കുറിച്ച് വിശദീകരിച്ചത്.

"കേരളത്തിലെ മുഖ്യമന്ത്രിയെ നിശ്ചയിക്കുന്നതുമായി ബന്ധപ്പെട്ട എല്ലാ ചർച്ചകളും പൂർത്തിയായിക്കഴിഞ്ഞു. വിശദമായ കൂടിയാലോചനകൾക്ക് ശേഷം ഹൈക്കമാൻഡ് ഒരു തീരുമാനത്തിൽ എത്തിയിട്ടുണ്ട്. ഔദ്യോഗികമായ പ്രഖ്യാപനം നാളെ നടക്കും എന്ന് ജയറാം രമേശ് പറഞ്ഞു. നാളെ പ്രഖ്യാപനം വരുന്നതോടെ കേരളത്തിലെ ഭരണനേതൃത്വത്തെ സംബന്ധിച്ച അഭ്യൂഹങ്ങൾക്ക് വിരാമമാകും.

പ്രഖ്യാപനത്തിന് മുന്നോടിയായി ഘടകകക്ഷികളുമായി കോൺഗ്രസ് നേതൃത്വം വീണ്ടും സംസാരിക്കും. ഇന്ന് നടന്ന ചർച്ചകൾക്കിടെ മുതിർന്ന നേതാക്കളായ എ.കെ. ആന്റണി, കൊടിക്കുന്നിൽ സുരേഷ് എന്നിവരുമായി രാഹുൽ ഗാന്ധി ഫോണിൽ ആശയവിനിമയം നടത്തിയിരുന്നു.

നാളെ രാവിലെ ചേരുന്ന ഹൈക്കമാൻഡ് യോഗത്തിന് ശേഷമായിരിക്കും പുതിയ മുഖ്യമന്ത്രിയുടെ പേര് ഔദ്യോഗികമായി പുറത്തുവിടുക. തിരുവനന്തപുരത്തും ഡൽഹിയിലും പ്രവർത്തകരും രാഷ്ട്രീയ നിരീക്ഷകരും ഒരുപോലെ ആകാംക്ഷയിലാണ്.

New Kerala CM Announcement Expected Tomorrow: High Command Completes Deliberations. The Indian National Congress is set to end the suspense regarding the next Chief Minister of Kerala. AICC General Secretary in charge of Communications, Jairam Ramesh, confirmed that all high-level discussions have concluded and the official announcement will be made tomorrow.