ഷൊര്‍ണൂര്‍: അഗ്നിരക്ഷാ സേനയുടെ ഓഫിസിലേക്ക് നിരന്തരമായി വരുന്ന അജ്ഞാത ഫോണ്‍ വിളികള്‍ കാരണം അത്യാഹിത വിവരങ്ങള്‍ അറിയിക്കാന്‍ ശ്രമിക്കുന്നവര്‍ക്ക് ബുദ്ധിമുട്ട് നേരിടുന്നതായി പരാതി. രാത്രിയോ പകലോ എന്നില്ലാതെ രണ്ട് നമ്പറുകളില്‍ നിന്നായി ഓഫിസിലേക്ക് തുടര്‍ച്ചയായി കോളുകള്‍ എത്തുന്നുവെന്നാണ് ഉദ്യോഗസ്ഥര്‍ പറയുന്നത്.

ഫോണ്‍ സ്വീകരിക്കുമ്പോള്‍ അസഭ്യം പറയുകയും വ്യക്തതയില്ലാത്ത രീതിയില്‍ സംസാരിക്കുകയും ചെയ്യുന്നതായി അഗ്നിരക്ഷാ ഉദ്യോഗസ്ഥര്‍ വ്യക്തമാക്കി. ഇതുമൂലം അടിയന്തര ആവശ്യങ്ങള്‍ക്കായി ബന്ധപ്പെടുന്നവരുടെ കോളുകള്‍ പലപ്പോഴും ബിസിയാകുന്ന സാഹചര്യമാണുള്ളത്.

കഴിഞ്ഞ ഒരു മാസത്തോളമായി ഷൊര്‍ണൂര്‍ അഗ്നിരക്ഷാ വിഭാഗം ഈ പ്രശ്‌നം നേരിടുകയാണെന്നും ശല്യം രൂക്ഷമായതിനെ തുടര്‍ന്ന് ഈ മാസം എട്ടിന് പൊലിസില്‍ പരാതി നല്‍കിയതായും അധികൃതര്‍ അറിയിച്ചു. സ്റ്റേഷന്‍ നമ്പറിലേക്കും സമാന രീതിയില്‍ നിരന്തരം വിളിയെത്തുന്നതായും പരാതിയില്‍ പറയുന്നു.

പരാതിയുടെ അടിസ്ഥാനത്തില്‍ നടത്തിയ അന്വേഷണത്തില്‍ കാരാകുറുശ്ശി സ്വദേശിയായ ഒരാളാണ് വിളിക്കുന്നതെന്ന് കണ്ടെത്തിയതായി പൊലിസ് അറിയിച്ചു. മാനസിക പ്രശ്‌നങ്ങളുള്ള വ്യക്തിയാണെന്നാണ് പ്രാഥമിക നിഗമനമെന്നും പൊലിസ് കൂട്ടിച്ചേര്‍ത്തു.

Continuous calls from an unidentified person have disrupted emergency communication at the Shoranur Fire and Rescue office, prompting officials to file a police complaint.