മുംബൈ: മഹാരാഷ്ട്രയിലെ പാൽഘറിൽ പുലർച്ചെയുണ്ടായ വാഹനാപകടത്തിൽ 13 പേർ മരിച്ചു. മുംബൈ - അഹമ്മദാബാദ് ദേശീയപാതയിൽ വിവാഹസംഘം സഞ്ചരിച്ചിരുന്ന ട്രാവലറിലേക്ക് നിയന്ത്രണം വിട്ട കണ്ടെയ്നർ ട്രക്ക് ഇടിച്ചുകയറുകയായിരുന്നു. അപകടത്തിൽ ഇരുപതിലധികം ആളുകൾക്ക് പരുക്കേറ്റു

തിങ്കളാഴ്ച പുലർച്ചെ നാല് മണിയോടെയായിരുന്നു അപകടം സംഭവിച്ചത്. അപകടസമയത്ത് നാൽപ്പതിലധികം യാത്രക്കാർ ട്രാവലറിലുണ്ടായിരുന്നതായി പൊലിസ് സ്ഥിരീകരിച്ചു.

ഇടിയുടെ ശക്തമായ ആഘാതത്തിൽ ഇരു വാഹനങ്ങളും റോഡിലേക്ക് മറിഞ്ഞു. ഇതോടെ ട്രാവലറിനുള്ളിൽ യാത്രക്കാർ കുടുങ്ങിക്കിടക്കുകയായിരുന്നു. അപകട ശബ്ദം കേട്ടോടിയെത്തിയ നാട്ടുകാരും പൊലിസും ചേർന്നാണ് ഉടൻ തന്നെ രക്ഷാപ്രവർത്തനം ആരംഭിച്ചത്. വണ്ടി വെട്ടിപ്പൊളിച്ചാണ് പലരെയും പുറത്തെടുത്തത്. അപകടത്തിൽ പരുക്കേറ്റ ഇരുപതിലേറെപ്പേരെ നിലവിൽ കാസയിലെ ഉപജില്ലാ ആശുപത്രിയിൽ പ്രവേശിപ്പിച്ചിരിക്കുകയാണ്. ഇവരിൽ ചിലരുടെ പരുക്ക് ഗുരുതരമാണെന്നാണ് വിവരം.

അപകടത്തെ തുടർന്ന് മുംബൈ - അഹമ്മദാബാദ് ദേശീയപാതയിൽ മണിക്കൂറുകളോളം വൻ ഗതാഗതക്കുരുക്ക് അനുഭവപ്പെട്ടു. പിന്നീട് പൊലിസ് ഇടപെട്ടാണ് വാഹനങ്ങൾ മാറ്റി ഗതാഗതം പുനഃസ്ഥാപിച്ചത്. സംഭവത്തിൽ പരൊലിസ് കേസെടുത്ത് അന്വേഷണം ആരംഭിച്ചിട്ടുണ്ട്.

Thirteen people were killed and more than twenty others injured after a container truck rammed into a traveler carrying over 40 passengers.