പാലക്കാട്: ബലിപെരുന്നാള്‍ മുന്നില്‍ക്കണ്ട് കേരളത്തിലേക്ക് കന്നുകാലികളെ എത്തിക്കുന്ന വ്യാപാരികള്‍ കടുത്ത പ്രതിസന്ധിയിലേക്ക്. അയല്‍സംസ്ഥാനങ്ങളിലെ പ്രധാന ഗ്രാമീണ കന്നുകാലി ചന്തകള്‍ ഗോരക്ഷാ പ്രവര്‍ത്തകരുടെ കടുത്ത ഭീഷണിയെത്തുടര്‍ന്ന് കൂട്ടത്തോടെ അടച്ചുപൂട്ടിയതാണ് കേരളത്തിലേക്കുള്ള കന്നുകാലി വരവിനെ ബാധിച്ചിരിക്കുന്നത്. പെരുന്നാളിന് ദിവസങ്ങള്‍ മാത്രം ബാക്കിനില്‍ക്കെ വിപണിയിലുണ്ടായ ഈ വലിയ വിതരണക്കുറവ് വരും ദിവസങ്ങളില്‍ സംസ്ഥാനത്ത് ബീഫ് വില കുത്തനെ ഉയരാന്‍ കാരണമായേക്കുമെന്നാണ് കച്ചവടക്കാര്‍ നല്‍കുന്ന സൂചന.

കേരളത്തിലേക്ക് പ്രധാനമായും കന്നുകാലികളെ കൊണ്ടുവരുന്ന ഒഡീഷ, മഹാരാഷ്ട്ര, ഗുജറാത്ത്, ആന്ധ്രാപ്രദേശ്, തെലങ്കാന, കര്‍ണാടക എന്നീ സംസ്ഥാനങ്ങളിലാണ് നിലവില്‍ പ്രതിസന്ധി രൂക്ഷമായിരിക്കുന്നത്. പെരുന്നാള്‍ വിപണി ലക്ഷ്യമിട്ടുള്ള കന്നുകാലി വില്‍പന തടയുക എന്ന ഉദ്ദേശ്യത്തോടെ, ഗ്രാമീണ ചന്തകള്‍ പ്രവര്‍ത്തിക്കരുതെന്ന് ഇവര്‍ കര്‍ഷകര്‍ക്കും വ്യാപാരികള്‍ക്കും മുന്നറിയിപ്പ് നല്‍കിയിട്ടുണ്ട്. ഈ ഭയം കാരണം ചന്തകള്‍ അടഞ്ഞുകിടക്കുന്നതിനാല്‍, ആവശ്യത്തിന് ഉരുക്കളെ വാങ്ങി കേരളത്തിലേക്ക് കൊണ്ടുവരാന്‍ സാധിക്കുന്നില്ലെന്ന് വ്യാപാരികള്‍ പറയുന്നു.

കൃത്യമായ രേഖകളോടെ കൊണ്ടുവരുന്ന കന്നുകാലികളെപ്പോലും അതിര്‍ത്തികളില്‍ വച്ച് ഗോരക്ഷാ സംഘങ്ങള്‍ ബലംപ്രയോഗിച്ച് പിടിച്ചെടുക്കുന്നതായി വ്യാപാരികള്‍ ആരോപിക്കുന്നു. പിന്നീട് ഇവയെ നിയമവിരുദ്ധമായി മറിച്ചുവിറ്റ് വലിയ തുക ഈ സംഘങ്ങള്‍ സമ്പാദിക്കാറുണ്ട്.

ഇതിനുപുറമേ, പിടിച്ചെടുത്ത കന്നുകാലികളെ തിരികെ ലഭിക്കാന്‍ വ്യാപാരികള്‍ കോടതിയെ സമീപിച്ച് അനുകൂല വിധി നേടിയാലും കടുത്ത വഞ്ചനയാണ് നേരിടേണ്ടി വരുന്നത്. കോടതി ഉത്തരവുമായി ചെല്ലുമ്പോള്‍, തങ്ങളില്‍ നിന്ന് പിടിച്ചെടുത്ത വിലകൂടിയ നല്ലയിനം ഉരുക്കള്‍ക്ക് പകരം, പ്രായം കുറഞ്ഞതും വിലയില്ലാത്തതുമായ ചെറിയ ഉരുക്കളെയാണ് അധികൃതര്‍ വ്യാപാരികള്‍ക്ക് തിരികെ നല്‍കുന്നത്.

അടുത്തിടെ കേരളത്തില്‍ ബീഫ് വില വര്‍ധിപ്പിച്ചിരുന്നു. കന്നുകാലികളുടെ ക്ഷാമവും അതിര്‍ത്തികളിലെ യാത്രാ തടസ്സങ്ങളും തുടര്‍ന്നാല്‍ വരുംദിവസങ്ങളില്‍ വിപണിയില്‍ വീണ്ടും വലിയ വിലക്കയറ്റം ഉണ്ടാകുമെന്നുറപ്പാണ്. നിലവിലെ അനിശ്ചിതാവസ്ഥ പരിഹരിക്കാന്‍ സര്‍ക്കാര്‍ അടിയന്തരമായി ഇടപെടണമെന്നാണ് വ്യാപാരികളും പൊതുജനങ്ങളും ആവശ്യപ്പെടുന്നത്.

Due to intimidation by Gau Rakshaks leading to the closure of cattle markets in neighboring states, Kerala faces a severe livestock shortage, triggering fears of a sharp rise in beef prices.