പത്തനംതിട്ട: ജില്ലാ ജനറല്‍ ആശുപത്രിയില്‍ ചികിത്സ തേടിയ വീട്ടമ്മയുടെ ശരീരത്തില്‍ കുത്തിവയ്പ്പിനിടെ ഒടിഞ്ഞിരുന്ന സൂചി ഒരു വര്‍ഷത്തിന് ശേഷം ഭാഗികമായി ശസ്ത്രക്രിയയിലൂടെ പുറത്തെടുത്തു. ആറന്മുള ഇടശ്ശേരിമല മണക്കാലില്‍ സ്വദേശി വത്സലയ്ക്കാണ് (68) ആശുപത്രി അധികൃതരുടെ ഗുരുതരമായ അനാസ്ഥ മൂലം ഒരു വര്‍ഷത്തോളം കടുത്ത ശാരീരിക ദുരിതം അനുഭവിക്കേണ്ടി വന്നത്. നിലവില്‍ സൂചിയുടെ പകുതി ഭാഗം മാത്രമാണ് പുറത്തെടുക്കാനായത്. പഴുപ്പും അണുബാധയും മാറിയ ശേഷം ബാക്കി ഭാഗം മാറ്റാമെന്ന് അറിയിച്ച് ആശുപത്രി അധികൃതര്‍ ഇവരെ ഡിസ്ചാര്‍ജ് ചെയ്തു.

കഴിഞ്ഞ വര്‍ഷം പനിയും ഛര്‍ദ്ദിയും ബാധിച്ച് ജില്ലാ ആശുപത്രിയില്‍ ചികിത്സയില്‍ കഴിഞ്ഞപ്പോഴാണ് വത്സലയ്ക്ക് ഇടുപ്പില്‍ കുത്തിവെപ്പെടുത്തത്. അന്ന് മുതല്‍ കുത്തിവച്ച ഭാഗത്ത് കടുത്ത തടിപ്പും വേദനയും അനുഭവപ്പെട്ടിരുന്നു. എന്നാല്‍, മരുന്ന് കുത്തിവച്ച ശേഷം ശരിയായി തടവി കൊടുക്കാത്തതുകൊണ്ടാണ് ഇതെന്നായിരുന്നു അന്ന് ജീവനക്കാര്‍ നല്‍കിയ വിശദീകരണം. അടുത്തയിടെ വേദന അസഹനീയമാവുകയും ഈ ഭാഗത്ത് പഴുപ്പ് വരുകയും ചെയ്തതിനെ തുടര്‍ന്ന് നടത്തിയ എക്‌സറേ പരിശോധനയിലാണ് ഒടിഞ്ഞ സൂചി ഉള്ളിലിരിക്കുന്ന വിവരം പുറത്തറിയുന്നത്.

ഇപ്പോഴും കടുത്ത വേദന കാരണം നടക്കാന്‍ പോലും ബുദ്ധിമുട്ടുന്ന വത്സലയുടെ ദുരവസ്ഥ ചൂണ്ടിക്കാട്ടി അബിന്‍ വര്‍ക്കി എംഎല്‍എ ആരോഗ്യമന്ത്രി കെ. മുരളീധരന് നേരിട്ട് പരാതി നല്‍കി. സംഭവത്തെക്കുറിച്ച് അടിയന്തരമായി അന്വേഷിച്ച് റിപോര്‍ട്ട് സമര്‍പ്പിക്കാന്‍ ആരോഗ്യമന്ത്രി ജില്ലാ മെഡിക്കല്‍ ഓഫിസര്‍ക്ക് നിര്‍ദേശം നല്‍കിയിട്ടുണ്ട്.

A 68-year-old woman in Pathanamthitta underwent surgery to partially remove a syringe needle that broke inside her body during an injection a year ago, prompting a high-level probe.