തിരുവനന്തപുരം: സംസ്ഥാനത്തെ പൊതുവിദ്യാലയങ്ങളിലെ താൽക്കാലിക അധ്യാപക നിയമനങ്ങൾക്ക് യോഗ്യതാ പരീക്ഷയായ കെ-ടെറ്റ് (K-TET) നിർബന്ധമാക്കി പൊതുവിദ്യാഭ്യാസ വകുപ്പ് ഉത്തരവിറക്കി. ഹൈസ്‌കൂൾ തലം വരെയുള്ള താൽക്കാലിക നിയമനങ്ങൾക്കാണ് ഈ നിബന്ധന ബാധകം. സ്കൂളുകളിൽ താൽക്കാലികമായി എത്തുന്നവരും പൂർണ്ണ യോഗ്യതയുള്ളവരായിരിക്കണം എന്ന സുപ്രിം കോടതി വിധിയുടെ പശ്ചാത്തലത്തിലാണ് സർക്കാരിന്റെ പുതിയ തീരുമാനം. കെ-ടെറ്റ് നിർബന്ധമാക്കിയതിനൊപ്പം താൽക്കാലിക നിയമനങ്ങളിലെ സംവരണ വ്യവസ്ഥകൾ കൃത്യമായി പാലിക്കണമെന്നും ഉത്തരവിൽ വ്യക്തമാക്കുന്നുണ്ട്.

സംവരണ ക്രമവും പ്രധാന നിർദ്ദേശങ്ങളും

താൽക്കാലിക നിയമനങ്ങളിൽ 1:1 എന്ന അനുപാതത്തിൽ രണ്ടാമത്തെ ഒഴിവ് പട്ടികവിഭാഗങ്ങൾക്കും പിന്നാക്കവിഭാഗങ്ങൾക്കും ക്രമമനുസരിച്ച് നൽകണം.

സംവരണ ഒഴിവിൽ അർഹരായ അപേക്ഷകരില്ലെങ്കിൽ മാത്രമേ ആ തസ്തികയിലേക്ക് പൊതുവിഭാഗത്തിൽ നിന്ന് നിയമനം നടത്താൻ അനുവാദമുള്ളൂ. എന്നാൽ, ഇങ്ങനെ ചെയ്യുമ്പോൾ തൊട്ടടുത്ത വരാനിരിക്കുന്ന ഒഴിവ് സംവരണ വിഭാഗത്തിനായി നിർബന്ധമായും മാറ്റിവെക്കണം.

സ്കൂളുകളിൽ പരിശോധന നടത്തുമ്പോൾ വിദ്യാഭ്യാസ ഓഫീസർമാർ ഈ സംവരണക്രമം കൃത്യമായി പാലിക്കപ്പെടുന്നുണ്ടെന്ന് ഉറപ്പുവരുത്തണം.

താൽക്കാലിക അധ്യാപകരെ തിരഞ്ഞെടുക്കുന്നതിനുള്ള അഭിമുഖ പാനലിൽ അതാത് തദ്ദേശ സ്വയംഭരണ സ്ഥാപനങ്ങളിലെ വിദ്യാഭ്യാസ സ്ഥിരസമിതി അധ്യക്ഷന്റെയോ അല്ലെങ്കിൽ അവരുടെ പ്രതിനിധിയുടെയോ സാന്നിധ്യം ഇനി മുതൽ നിർബന്ധമായിരിക്കും.

The General Education Department of Kerala has issued a new directive making the Kerala Teacher Eligibility Test (K-TET) mandatory for the appointment of temporary teachers in government and aided schools.