കോഴിക്കോട്: പരാകെ പരിമളം പരത്തി പൂത്തുലഞ്ഞ റമദാൻ, ഭൂമിയിലെ വിശുദ്ധ സഞ്ചാരം അതിവേഗം പൂർത്തിയാക്കി സൃഷ്ടാവിലേക്ക് മടങ്ങി പോവാനുള്ള ഒരുക്കത്തിലാണ്. ഈ വർഷത്തെ റമദാനിലെ അവസാന വെള്ളിയാഴ്ചയായിരുന്നു ഇന്ന്. പള്ളികളിൽ ജുമുഅ നിസ്കാരത്തിന് ശേഷം പ്രത്യേക പ്രാർഥന നടന്നു. മഴക്ക് വേണ്ടിയും ഫലസ്തീനിലെ ദുരിതമനുഭവിക്കുന്ന മനുഷ്യർക്ക് വേണ്ടിയും വിവിധ ഇടങ്ങളിൽ പ്രാർഥനകളുണ്ടായി. റമദാനിനോടുള്ള ആദ്യ യാത്രാമൊഴിയിൽ മിക്ക പള്ളികളിലും വികാര നിർഭരമായാണ് ഖതീബുമാർ ഖുതുബയും പ്രാർഥനയും നിർവഹിച്ചത്. പല പള്ളികളിലും പ്രാർഥനയ്ക്ക് ശേഷം മരിച്ചവരുടെ ഖബറിടങ്ങളിൽ സന്ദർശനവും നടന്നു.

കടുത്ത ചൂട് കാലാവസ്ഥയുടെ അകമ്പടിയിൽ എത്തിചേർന്ന റമദാൻ വൃതമെടുപ്പ് വിശ്വാസ ലോകത്തിനു ഇരട്ടി പരീക്ഷണമാവുമെന്നു പ്രതീക്ഷിച്ചിരുന്നുവെങ്കിലും സൃഷ്ടാവുമായുള്ള നിരന്തര പ്രാർഥനപ്രാർത്ഥന സമ്പർക്കത്തിലൂടെ വിശ്വാസികൾ അതിനെ മറികടന്നു റമദാനിൽ ലയിച്ചു ചേർന്ന കാഴ്ചകൾ ആണ് എങ്ങും. അതേസമയം, ഇത്തവണ റമദാൻ കടന്നു പോവുന്നതു സമാനതകൾ ഇല്ലാത്ത വേഗത്തിൽ കടന്നു പോയെന്ന ആത്മ നൊമ്പരവും വിശ്വാസികൾ പങ്കുവെക്കുന്നു.

പ്രാർഥനക്കൊപ്പം, മനുഷ്യരുടെ വേദനകളെ അകറ്റാൻ കൂടിയുള്ളതാണ് റമദാനിലെ പുണ്യ ദിനങ്ങൾ. ഉള്ളവൻ ഇല്ലാത്തവന്റെ പ്രയാസം അറിയുക എന്ന മഹത്തായ സന്ദേശം കൂടി പങ്കുവെക്കുന്നുണ്ട്. ഒരു പുണ്യം ചെയ്താൽ ഇരട്ടി പ്രതിഫലം വാഗ്ദാനം ചെയ്യപ്പെട്ട മാസമാണ് റമദാൻ. സക്കാത്ത് നിർബന്ധമാക്കപ്പെട്ട മാസമായതിനാൽ അർഹതപ്പെട്ടവരിലേക്ക് സക്കാത്ത് എത്തിച്ച് നൽകാനുള്ള ശ്രമത്തിലാണ് വിശ്വാസികൾ. റമദാൻ അവസാന ലാപിലേക്ക് പ്രവേശിച്ചതോടെ വ്യക്തികൾ, സംഘടനകൾ എല്ലാം തന്നെ റിലീഫ് പ്രവർത്തനങ്ങളും ശക്തമാക്കിയിട്ടുണ്ട്. പെരുന്നാൾ ഒരുക്കങ്ങൾക്കുള്ള കിറ്റുകളും വസ്ത്രങ്ങളും ഉൾപ്പെടെ വിവിധ സംഘടനകളും വ്യക്തികളും എത്തിക്കുന്നുണ്ട്.
 
അന്ന പാനീയങ്ങൾ ഉപേക്ഷിച്ച് ദീർഘമേറിയ നീണ്ട പകലുകൾ, നോമ്പ് തുറയുടെ സ്നേഹത്തിലേക്ക് തുറക്കുന്ന സന്ധ്യകൾ, പ്രാർഥനയുമായി നാഥനോട് അടുക്കുന്ന പാതിരാവുകൾ എല്ലാം ഏതാനും ദിവസങ്ങൾക്ക് ശേഷം വിടപറയാൻ ഒരുങ്ങുകയാണ്. കഴിഞ്ഞ കാലങ്ങളിലെ പാപങ്ങൾ കഴുകി കളഞ്ഞ്, വരും നാളുകളിൽ റമദാനിൽ പകർന്നുകിട്ടിയ പാഠങ്ങൾ പാലിക്കാനുള്ള തയ്യാറെടുപ്പിൽകൂടിയാണ് വിശ്വാസികൾ. അതോടൊപ്പം പെരുന്നാളിന്റെ വർണ്ണക്കാഴ്ചകളെ പ്രാർഥനാപൂർവം വരവേൽക്കാനുള്ള ഒരുക്കത്തിൽ കൂടിയാണ് വിശ്വാസികൾ.