ഹൈദരാബാദ്: വിവാഹേതര ബന്ധത്തിന് തടസ്സമായി നിന്ന ഭര്‍ത്താവിനെ കാമുകന്റെ സഹായത്തോടെ കൊലപ്പെടുത്തി വയലില്‍ കുഴിച്ചു മൂടിയ യുവതിയെ അറസ്റ്റ് ചെയ്തു. തെലങ്കാനയിലെ ഗംഗാപൂരിലാണ് സിനിമാക്കഥകളെ വെല്ലുന്ന ദാരുണ സംഭവം അരങ്ങേറിയത്. 42കാരനായ മുത്ത്യം റെഡ്ഡിയാണ് കൊല്ലപ്പെട്ടത്.

സംഭവത്തില്‍ ഭാര്യ കല്‍പന, ഇവരുടെ കാമുകന്‍ ഗൈനി പണ്ഡാരി എന്നിവരെ പൊലിസ് അറസ്റ്റ് ചെയ്തു. കൊലപാതകത്തിന് ശേഷം ഭര്‍ത്താവിനെ കാണാനില്ലെന്ന് കാണിച്ച് പൊലിസിനെ വഴിതെറ്റിക്കാന്‍ കല്‍പന തന്നെയാണ് പരാതി നല്‍കിയത്.

12 വര്‍ഷത്തെ ദാമ്പത്യവും രണ്ട് മക്കളുമുള്ള കല്‍പന കഴിഞ്ഞ മൂന്ന് മാസമായി പണ്ഡാരിയുമായി പ്രണയത്തിലായിരുന്നു. ഈ ബന്ധം ഭര്‍ത്താവ് അറിഞ്ഞതോടെ കുടുംബത്തില്‍ നിരന്തരം വഴക്കുകള്‍ പതിവായി. ഒടുവില്‍ ഭര്‍ത്താവിനെ വകവരുത്താന്‍ കാമുകനൊപ്പം ചേര്‍ന്ന് കല്‍പന പദ്ധതിയിടുകയായിരുന്നു.

മുത്ത്യം റെഡ്ഡിയെ വധിച്ച ശേഷം ജെസിബി ഉപയോഗിച്ച് കൃഷിയിടത്തില്‍ ആഴത്തില്‍ കുഴിയെടുത്ത് മൃതദേഹം ഒളിപ്പിച്ചു. ആര്‍ക്കും സംശയം തോന്നാതിരിക്കാന്‍ ഈ സ്ഥലത്ത് കല്ലും മണ്ണും നിരത്തി തെളിവ് നശിപ്പിക്കാനും പ്രതികള്‍ ശ്രമിച്ചു.

മെയ് 18നാണ് ഭര്‍ത്താവിനെ കാണാനില്ലെന്ന് പറഞ്ഞ് കല്‍പന പൊലിസിനെ സമീപിക്കുന്നത്. എന്നാല്‍, അന്വേഷണത്തിനിടെ യുവതിയുടെ പെരുമാറ്റത്തില്‍ സംശയം തോന്നിയ പൊലിസ് ഇവരുടെ ഫോണ്‍ രേഖകള്‍ പരിശോധിച്ചതോടെയാണ് കൊലപാതകത്തിന്റെ ചുരുളഴിഞ്ഞത്.

കാമുകനുമായി നിരന്തരം ഫോണില്‍ ബന്ധപ്പെട്ടത് കണ്ടെത്തിയതിനെ തുടര്‍ന്ന് പണ്ഡാരിയെ കസ്റ്റഡിയിലെടുത്ത് ചോദ്യം ചെയ്തതോടെ പ്രതികള്‍ കുറ്റം സമ്മതിക്കുകയായിരുന്നു. വയലില്‍ ഒളിപ്പിച്ച മൃതദേഹം പുറത്തെടുക്കാനുള്ള നടപടികള്‍ പൊലിസ് ആരംഭിച്ചിട്ടുണ്ട്. ക്രൂരകൃത്യത്തില്‍ മറ്റാര്‍ക്കെങ്കിലും പങ്കുണ്ടോയെന്നും പൊലിസ് അന്വേഷിച്ചുവരികയാണ്.

An unmarried-like deception unfolded in Telangana as a woman and her lover were arrested for murdering her husband, burying his body in a field using a JCB, and later filing a fake missing person complaint to mislead the police.