ദുബൈ: യുഎഇ നിവാസികൾക്ക് ഇന്ന് രാത്രി ആകാശത്ത് അപൂർവവും മനോഹരവുമായ ഒരു ജ്യോതിശാസ്ത്ര പ്രതിഭാസം ദൃശ്യമാകും. ഒരേസമയം 'ബ്ലൂ മൂൺ' (Blue Moon), 'മൈക്രോമൂൺ' (Micromoon) എന്നീ സവിശേഷതകൾ ഒത്തുചേരുന്ന 'ബ്ലൂ മൈക്രോമൂൺ' ആണ് ഇന്ന് രാത്രി ആകാശത്ത് കാണാനാവുക. വർഷത്തിലെ ഏറ്റവും അസാധാരണമായ ചാന്ദ്ര പ്രതിഭാസങ്ങളിലൊന്നായാണ് ശാസ്ത്രലോകം ഇതിനെ കണക്കാക്കുന്നത്.

ഈ അപൂർവ നിമിഷം ആഘോഷമാക്കാൻ ദുബൈ ജ്യോതിശാസ്ത്ര ഗ്രൂപ്പ് (DAG), SEE ഇൻസ്റ്റിറ്റ്യൂട്ടുമായി സഹകരിച്ച് പ്രത്യേക നിരീക്ഷണ രാത്രി സംഘടിപ്പിച്ചിട്ടുണ്ട്. 'ദി സസ്റ്റൈനബിൾ സിറ്റി'യിലെ SEE ഇൻസ്റ്റിറ്റ്യൂട്ടിൽ രാത്രി 8 മണി മുതൽ 10 മണി വരെയാണ് പൊതുജനങ്ങൾക്കായി ഈ പരിപാടി ഒരുക്കിയിരിക്കുന്നത്.

എന്താണ് ബ്ലൂ മൂൺ? ചന്ദ്രൻ നീലനിറമാകുമോ?

പേര് 'ബ്ലൂ മൂൺ' എന്നാണെങ്കിലും ചന്ദ്രൻ നീലനിറത്തിൽ കാണപ്പെടില്ല. ഒരു കലണ്ടർ മാസത്തിൽ തന്നെ രണ്ട് പൂർണ്ണചന്ദ്രൻമാർ (വെളുത്തവാവ്) ഒത്തു വരുന്നതിനെയാണ് സാധാരണയായി 'ബ്ലൂ മൂൺ' എന്ന് വിളിക്കുന്നത്. മെയ് മാസത്തിലെ രണ്ടാമത്തെ പൂർണ്ണചന്ദ്രനാണ് ഇന്ന് രാത്രി ഉദിക്കുന്നത്. ചാന്ദ്രചക്രം 29.5 ദിവസം നീണ്ടുനിൽക്കുന്നതിനാലാണ് രണ്ടോ മൂന്നോ വർഷത്തിലൊരിക്കൽ ഇത്തരം പ്രതിഭാസങ്ങൾ ഉണ്ടാകുന്നത്. ഇതിൽ നിന്നാണ് അപൂർവമായ കാര്യങ്ങളെ സൂചിപ്പിക്കാൻ ഇംഗ്ലീഷിൽ "Once in a blue moon" എന്ന പ്രയോഗം ഉണ്ടായത്.

വളരെ അപൂർവമായി അന്തരീക്ഷത്തിലെ അഗ്നിപർവ്വത ചാരമോ പുകയോ കാരണം ചന്ദ്രന് നേരിയ നീല വെളിച്ചം തോന്നാമെങ്കിലും സാധാരണയായി മറ്റ് പൂർണ്ണചന്ദ്രന്മാരെപ്പോലെ തന്നെയാണ് ഇതും കാണപ്പെടുക. എന്നാൽ ദുബൈയിലെ പരിപാടിയിൽ എത്തുന്നവർക്കായി വായു നിറച്ച ഭീമാകാരമായ പ്രകാശിക്കുന്ന നീല ചന്ദ്രന്റെ ഇൻസ്റ്റാളേഷൻ സംഘാടകർ ഒരുക്കിയിട്ടുണ്ട്.

എന്താണ് മൈക്രോമൂൺ?

ചന്ദ്രൻ ഭൂമിയെ വലംവെക്കുന്ന ഭ്രമണപഥത്തിൽ ഭൂമിയിൽ നിന്നും ഏറ്റവും അകലെയുള്ള 'അപ്പോജി' (Apogee) എന്ന സ്ഥാനത്ത് എത്തുമ്പോഴാണ് മൈക്രോമൂൺ സംഭവിക്കുന്നത്. ഭൂമിയോട് ഏറ്റവും അടുത്ത് വരുമ്പോഴുണ്ടാകുന്ന 'സൂപ്പർമൂണിന്' നേരെ വിപരീതമാണിത്. ഭൂമിയിൽ നിന്നും കൂടുതൽ അകലെയായതിനാൽ ഇന്നത്തെ ചന്ദ്രൻ സാധാരണ പൂർണ്ണചന്ദ്രനേക്കാൾ അല്പം ചെറുതായും മങ്ങിയതുമായാകും അനുഭവപ്പെടുക.

മൈക്രോമൂൺ സമയത്ത് ചന്ദ്രൻ ഭൂമിയിൽ നിന്നും അകലെയായതിനാൽ അതിന്റെ ഗുരുത്വാകർഷണബലം കുറവായിരിക്കും. ഇത് സമുദ്രങ്ങളിൽ നേരിയ തോതിലുള്ള വേലിയേറ്റ വ്യത്യാസങ്ങൾക്ക് കാരണമാകുമെങ്കിലും തീരദേശങ്ങളിൽ ഇത് കാര്യമായി പ്രകടമാകില്ല.

ബ്ലൂ മൂൺ അല്ലെങ്കിൽ മൈക്രോമൂൺ പ്രതിഭാസങ്ങൾ ഭൂകമ്പം, അഗ്നിപർവ്വത സ്ഫോടനം തുടങ്ങിയ പ്രകൃതി ദുരന്തങ്ങൾക്ക് കാരണമാകുമെന്നത് വെറും തെറ്റിദ്ധാരണ മാത്രമാണെന്ന് ദുബൈ ജ്യോതിശാസ്ത്ര ഗ്രൂപ്പ് വ്യക്തമാക്കി. ഭൂകമ്പങ്ങൾ ഉണ്ടാകുന്നത് ഭൂമിയുടെ പുറംതോടിനുള്ളിലെ ടെക്റ്റോണിക് പ്ലേറ്റുകളുടെ ചലനം മൂലമാണ്, ചന്ദ്രന്റെ സ്ഥാനം കൊണ്ടല്ല.

ALSO READ: വീട്ടുടമസ്ഥന്റെ അനുമതിയില്ലാതെ വാടകക്കാരന് സബ്-ലീസിന് നൽകാനാകുമോ? ദുബൈയിലെ നിയമം പറയുന്നതിങ്ങനെ

Skywatchers across the UAE can witness the rare Blue Micromoon tonight. Learn what makes this celestial event unique, when to watch it, and the best viewing tips.