അബുദബി: യു.എ.ഇയിൽ വരും ദിവസങ്ങളിൽ ചൂട് വർദ്ധിക്കുമെന്നും താപനില 46 ഡിഗ്രി സെൽഷ്യസ് വരെ ഉയർന്നേക്കാമെന്നും ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു. രാജ്യത്തിന്റെ വിവിധ ഭാഗങ്ങളിൽ ശക്തമായ കാറ്റും പൊടിക്കാറ്റും അനുഭവപ്പെടാൻ സാധ്യതയുണ്ട്. കൂടാതെ അറേബ്യൻ ഗൾഫിൽ കടൽ പ്രക്ഷുബ്ധമാകാനും സാധ്യതയുണ്ടെന്ന് മുന്നറിയിപ്പിൽ പറയുന്നു.

മേഖലയിലെ ദുർബലമായ ഉപരിതല മർദ്ദ വ്യതിയാനങ്ങളും അന്തരീക്ഷത്തിന്റെ മുകൾത്തട്ടിലെ ഉയർന്ന മർദ്ദവുമാണ് നിലവിലെ കാലാവസ്ഥയ്ക്ക് കാരണം. പൊതുവെ തെളിഞ്ഞ കാലാവസ്ഥയായിരിക്കുമെങ്കിലും, ചില സമയങ്ങളിൽ വീശിയടിക്കുന്ന കാറ്റ് പൊടിപടലങ്ങൾ ഉയരാൻ ഇടയാക്കും.

തീരദേശങ്ങളിലും ദ്വീപുകളിലും 35 മുതൽ 40 ഡിഗ്രി സെൽഷ്യസ് വരെയും, ഉൾപ്രദേശങ്ങളിൽ 42 മുതൽ 46 ഡിഗ്രി സെൽഷ്യസ് വരെയും താപനില ഉയർന്നേക്കാം. പർവത മേഖലകളിൽ 32 മുതൽ 39 ഡിഗ്രി സെൽഷ്യസ് വരെയായിരിക്കും താപനില. മണിക്കൂറിൽ 35 മുതൽ 40 കിലോമീറ്റർ വേഗതയിൽ വരെ കാറ്റ് വീശാൻ സാധ്യതയുണ്ട്.

വരുന്ന വെള്ളി വരെ സമാനമായ കാലാവസ്ഥ തുടരുമെന്നാണ് പ്രവചനം. ബുധനാഴ്ച മുതൽ അറേബ്യൻ ഗൾഫിൽ കടൽ കൂടുതൽ പ്രക്ഷുബ്ധമാകാൻ സാധ്യതയുള്ളതിനാൽ തീരദേശത്തുള്ളവരും കടലിൽ പോകുന്നവരും ജാഗ്രത പാലിക്കണമെന്ന് അധികൃതർ നിർദേശിച്ചു. അതേസമയം, ഒമാൻ കടൽ പൊതുവെ ശാന്തമായിരിക്കും.

English summary : 

UAE is expected to see fair weather this week, with fresh winds stirring dust and sand across parts of the country and sea conditions in the Arabian Gulf turning rough at times, the National Centre of Meteorology (NCM) said.

The country was being affected by weak surface pressure systems accompanied by an extension of an upper air high pressure system.