തൃശൂർ: ഗസറ്റഡ് തസ്തികയിലുള്ള ഹയർസെക്കൻഡറി അധ്യാപകരെ സെൻസസ് ജോലിയിൽ എന്യൂമറേറ്റർമാരായി നിയോഗിച്ചതിനെതിരേ പ്രതിഷേധം ഉയരുന്നു. സെൻസസ് കമ്മിഷണറുടെ നിയമാവലിയിൽ ഹയർസെക്കൻഡറി അധ്യാപകരെ സൂപ്പർവൈസർമാർ മുതൽ ട്രെയിനർമാർ വരെയായി മാത്രമേ നിയമിക്കാവൂ എന്ന് വ്യക്തമാക്കിയിട്ടുണ്ടെന്നും ഇത് കണക്കിലെടുക്കാതെയാണ് നിലവിലെ നടപടിയെന്നും ചൂണ്ടിക്കാണിക്കപ്പെടുന്നു. 

പലയിടത്തും  തഹസിൽദാർമാർ ഹയർസെക്കൻഡറി അധ്യാപകരെ എന്യൂമറേറ്ററായി നിയമിച്ചിരിക്കുകയാണ്. ഹയർ സെക്കൻഡറി അധ്യാപകരുടെ ഗസറ്റഡ് പദവി പരിഗണിക്കാതെയാണ് എന്യൂമറേറ്റർ നിയമനമെന്നാണ് ആരോപണം.

കഴിഞ്ഞകാലങ്ങളിൽ ഹയർ സെക്കൻഡറി അധ്യാപകരെ സെൻസസ് എന്യൂമറേറ്റർമാരായി നിയമിച്ചിരുന്നില്ല. ഗസറ്റഡ് പദവി പരിഗണിച്ച് ട്രെയിനർമാരോ സൂപ്പർവൈസർമാരോ ആയാണ് നിയോഗിച്ചിരുന്നതെന്നും അധ്യാപകർ പറയുന്നു. നിലവിൽ പല സ്‌കൂളുകളിലെയും ഭൂരിഭാഗം ഹയർ സെക്കൻഡറി അധ്യാപകരെയും എന്യൂമറേറ്റർമാരായി നിശ്ചയിച്ചത് അവരുടെ പദവിയെ തരംതാഴ്ത്തുന്നതിന് തുല്യമാണെന്നാണ് ആക്ഷേപം. 

ഹയർ സെക്കൻഡറി അധ്യാപകരുടെ സേവനം സെൻസസ് നടപടികൾക്ക് അത്യാവശ്യമാണെങ്കിൽ ഗസറ്റഡ് പദവിക്ക് അനുയോജ്യമായ സൂപ്പർവൈസർ അല്ലെങ്കിൽ ട്രെയിനർ ചുമതലകളിലേക്ക് നിയമനം വേണമെന്നാവശ്യപ്പെട്ട് പരാതി നൽകാൻ അധ്യാപകസംഘടനകളും രംഗത്തുവന്നിട്ടുണ്ട്.

Higher secondary school teachers have expressed strong protest against the government's decision to assign them as enumerators for the upcoming census duty.