മാനന്തവാടി: എടവക പള്ളിക്കലില്‍ യുവതി തൂങ്ങിമരിച്ച സംഭവത്തില്‍ ഭര്‍ത്താവിനെതിരെ പരാതിയുമായി കുടുംബം. ഭര്‍ത്താവിന്റെയും, കുടുംബത്തിന്റെയും നിരന്തര പീഢനമാണ് യുവതിയുടെ മരണത്തിന് കാരണമെന്നാണ് ആരോപണമുയരുന്നത്. 

കഴിഞ്ഞ തിങ്കളാഴ്ച്ചയാണ് കുപ്പാടിത്തറ തെറ്റത്ത് അഫ്‌സില (27)യെ താമസിക്കുന്ന ക്വാര്‍ട്ടേഴ്‌സിനുള്ളില്‍ തൂങ്ങിമരിച്ച നിലയില്‍ കണ്ടെത്തിയത്. സംഭവത്തില്‍ അഫ്‌സിലയുടെ ഭര്‍ത്താവ് എടവക പള്ളിക്കല്‍ വടക്കേ പുത്തന്‍പുരയില്‍ ജാബിര്‍ കുറ്റക്കാരനാണെന്നാണ് ആരോപണം. അഫ്‌സിലയുടെ മരണത്തെപ്പറ്റി അന്വേഷിക്കണമെന്ന് ആവശ്യപ്പെട്ട് സഹോദരന്‍ മാനന്തവാടി പൊലിസില്‍ പരാതി നല്‍കി. 

ALSO READ: കൊച്ചിയില്‍ എച്ച്1എന്‍1 ബാധിച്ച് ചികിത്സയിലായിരുന്ന വയോധിക മരിച്ചു 

ജാബിറും, വീട്ടുകാരും അഫ്‌സിലയെ ശാരീരികവും, മാനസികവുമായി പീഡിപ്പിച്ചിരുന്നുവെന്നാണ് പരാതി. മുന്‍പ് ഒട്ടേറേത്തവണ പ്രശ്‌നങ്ങള്‍ ഉണ്ടായിരുന്നെങ്കിലും മഹല്ല് കമ്മിറ്റി ഉള്‍പ്പെടെ ഇടപെട്ട് പ്രശ്‌നങ്ങള്‍ പരിഹരിക്കുകയായിരുന്നെന്നും സഹോദരന്‍ പറയുന്നു. 

അഫ്‌സിലയുടെ മൃതദേഹം പോസ്റ്റ്‌മോര്‍ട്ടത്തിന് ശേഷം ചൊവ്വാഴ്ച്ചയോടെ കുപ്പാടിത്തറ നടമ്മല്‍ ജുമാ മസ്ജിദ് കബറിസ്ഥാനില്‍ കബറടക്കി.