മാഡ്രിഡ്: റയൽ മാഡ്രിഡ് പ്രസിഡന്റ് തിരഞ്ഞെടുപ്പ് ചൂടുപിടിക്കുന്നതിനിടെ സൂപ്പർ താരം എർലിംഗ് ഹാലണ്ടിന്റെ പേര് വോട്ട് നേടാനായി ഉപയോഗിച്ച സ്ഥാനാർത്ഥിക്കെതിരെ കടുത്ത നിയമനടപടിയുമായി ഇംഗ്ലീഷ് ക്ലബ്ബ് മാഞ്ചസ്റ്റർ സിറ്റി. റയൽ മാഡ്രിഡ് പ്രസിഡന്റ് സ്ഥാനാർത്ഥിയായ എൻറിക് റിക്വൽമെ താൻ തിരഞ്ഞെടുക്കപ്പെട്ടാൽ ഹാലൻഡിനെ ക്ലബ്ബിലെത്തിക്കുമെന്ന് പരസ്യമായി പ്രഖ്യാപിച്ചതാണ് മാഞ്ചസ്റ്റർ സിറ്റിയെ ചൊടിപ്പിച്ചത്.

വരുന്ന ഞായറാഴ്ച നടക്കുന്ന വോട്ടെടുപ്പിൽ നിലവിലെ പ്രസിഡന്റായ ഫ്ലോറന്റിനോ പെരസിനെയാണ് 37 കാരനായ എൻറിക് റിക്വൽമെ നേരിടുന്നത്. ബുധനാഴ്ച ഒരു സ്പാനിഷ് ടിവി ചാനലിന് നൽകിയ അഭിമുഖത്തിനിടയിലാണ് റിക്വൽമെ കായികലോകത്തെ ഞെട്ടിച്ച പ്രഖ്യാപനം നടത്തിയത്. 79 കാരനായ പെരസിനെ അട്ടിമറിച്ച് താൻ അധികാരത്തിൽ വന്നാൽ നോർവീജിയൻ സ്‌ട്രൈക്കർ എർലിംഗ് ഹാലണ്ട് റയലിൽ എത്തുമെന്ന് ഉറപ്പുനൽകിയ അദ്ദേഹം, 'ഹാലൻഡ് 9' എന്ന് എഴുതിയ റയൽ മാഡ്രിഡ് ജേഴ്സി ക്യാമറയ്ക്ക് മുന്നിൽ ഉയർത്തിക്കാട്ടുകയും ചെയ്തു.

വാഗ്ദാനം ലംഘിച്ചാൽ വൻ തുക നഷ്ടപരിഹാരം!

ഹാലണ്ടിന് പുറമെ സിറ്റിയുടെ സ്പാനിഷ് മിഡ്‌ഫീൽഡർ റോഡ്രിയെയും മാഡ്രിഡിൽ എത്തിക്കുമെന്ന് റിക്വൽമെ അവകാശപ്പെട്ടു. "ഈ കളിക്കാരെ ടീമിലെത്തിക്കുമെന്ന എന്റെ വാഗ്ദാനം ഞാൻ ലംഘിച്ചാൽ, റയൽ മാഡ്രിഡ് അംഗങ്ങളുടെ അടുത്ത സീസണിലെ വരിസംഖ്യയുടെ 100 ശതമാനവും ഞാൻ സ്വന്തം കൈയിൽ നിന്ന് നൽകുമെന്ന ഗ്യാരണ്ടി പത്രത്തിൽ ഒപ്പിട്ടിട്ടുണ്ട്. ഹാലണ്ടിന് ഒരു റിലീസ് ക്ലോസ് ഉണ്ട്, അവന് മാഡ്രിഡിലേക്ക് വരാൻ ആഗ്രഹവുമുണ്ട്," റിക്വൽമെ പറഞ്ഞു.

കടുത്ത ഭാഷയിൽ മറുപടി നൽകി മാഞ്ചസ്റ്റർ സിറ്റി

എന്നാൽ വ്യാഴാഴ്ച പുറത്തിറക്കിയ ഔദ്യോഗിക പ്രസ്താവനയിലൂടെ മാഞ്ചസ്റ്റർ സിറ്റി ഈ വാദങ്ങളെല്ലാം പൂർണ്ണമായി തള്ളി. ഹാലണ്ട് റയൽ മാഡ്രിഡിലേക്ക് മാറാൻ യാതൊരു സാധ്യതയുമില്ലെന്ന് വ്യക്തമാക്കിയ സിറ്റി, അനുവാദമില്ലാതെ തങ്ങളുടെ കളിക്കാരന്റെ ചിത്രം (Image) തെരഞ്ഞെടുപ്പ് പ്രചാരണത്തിന് ഉപയോഗിച്ചതിനെതിരെ നിയമനടപടി സ്വീകരിക്കുമെന്നും മുന്നറിയിപ്പ് നൽകി.

"എർലിംഗ് ഹാലണ്ടിന്റെ ഭാവിയെക്കുറിച്ച് സ്പെയിനിൽ നിന്ന് പ്രചരിക്കുന്ന വാർത്തകൾ തികച്ചും അസത്യമാണ്. ഇത് സംഭവിക്കാൻ ഒരു സാധ്യതയുമില്ല, അതിനുള്ള യാതൊരു കരാർ വ്യവസ്ഥയും നിലവിലില്ല. ഈ സാഹചര്യത്തിൽ ഞങ്ങളുടെ കളിക്കാരന്റെ ഇമേജ് ദുരുപയോഗം ചെയ്തതിന് നിയമനടപടി സ്വീകരിക്കുന്നത് ക്ലബ്ബിന്റെ പരിഗണനയിലാണ്," മാഞ്ചസ്റ്റർ സിറ്റി വക്താവ് വ്യക്തമാക്കി.

2025 ജനുവരിയിലാണ് ഹാലണ്ട് സിറ്റിയുമായി റെക്കോർഡ് തുകയ്ക്ക് 10 വർഷത്തെ പുതിയ കരാറിൽ ഒപ്പുവെച്ചത്. എത്തിഹാദ് സ്റ്റേഡിയത്തിൽ താൻ തികച്ചും സന്തുഷ്ടനാണെന്ന് കഴിഞ്ഞ ഏപ്രിലിൽ താരം വ്യക്തമാക്കിയിരുന്നു. 2006 ന് ശേഷം റയൽ മാഡ്രിഡിൽ നടക്കുന്ന ആദ്യത്തെ മത്സര സ്വഭാവമുള്ള പ്രസിഡന്റ് തിരഞ്ഞെടുപ്പിൽ വോട്ട് പിടിക്കാൻ റിക്വൽമെ നടത്തുന്ന ഈ നീക്കങ്ങളെ ഹാലാണ്ടിന്റെ ഏജന്റ് റാഫേല പിമെന്റയും പിതാവ് ആൽഫിയും ചിരിച്ചു തള്ളുകയാണ് ചെയ്തത്. "എല്ലാം കേൾക്കാൻ നല്ല രസമുണ്ട്, പക്ഷേ ഇതിൽ ഒട്ടും സത്യമില്ല," എന്ന് ഇരുവരും സംയുക്ത പ്രസ്താവനയിൽ പറഞ്ഞു.

അതേസമയം, നിലവിൽ ഒരു വർഷത്തെ കരാർ ബാക്കിയുള്ള റോഡ്രിക്കായുള്ള ഓഫറുകൾ കേൾക്കാൻ പോലും സിറ്റി തയ്യാറല്ലെന്നാണ് റിപ്പോർട്ടുകൾ. അടുത്ത സീസണിലും താരം ടീമിനൊപ്പം ഉണ്ടാകും. കരാർ പുതുക്കുന്നതിനായുള്ള പ്രാഥമിക ചർച്ചകൾ ക്ലബ്ബ് ആരംഭിച്ചിട്ടുണ്ടെങ്കിലും, തന്റെ മുന്നിലുള്ള മറ്റ് ഓപ്ഷനുകൾ കൂടി പരിഗണിച്ച ശേഷമേ റോഡ്രി അന്തിമ തീരുമാനമെടുക്കൂ.