ചെന്നൈ: മുല്ലപ്പെരിയാറില്‍ പുതിയ അണക്കെട്ട് നിര്‍മിക്കാനുള്ള കേരള സര്‍ക്കാരിന്റെ ശ്രമങ്ങളെ തടയുമെന്ന് വ്യക്തമാക്കി ടി.വി.കെ സര്‍ക്കാരിന്റെ ആദ്യ നയപ്രഖ്യാപനം. മുല്ലപ്പെരിയാര്‍ അണക്കെട്ട് തെക്കന്‍ ജില്ലയിലെ ജനങ്ങളുടെ ജീവനാഡിയാണ്. മുല്ലപ്പെരിയാര്‍ അണക്കെട്ടിന്റെ ജലനിരപ്പ് 142 അടിയായി ഉയര്‍ത്താന്‍ 2014 ല്‍ സുപ്രിംകോടതി ഉത്തരവിട്ടിരുന്നു. അണക്കെട്ട് ബലപ്പെടുത്തിയ ശേഷം ജലനിരപ്പ് 152 അടിയായി ഉയര്‍ത്താമെന്നും നിര്‍ദ്ദേശിച്ചിരുന്നു. എന്നാല്‍ അണക്കെട്ട് ശക്തിപ്പെടുത്തുന്നതിനുള്ള പ്രവര്‍ത്തനങ്ങള്‍ നടത്താന്‍ തുടര്‍ച്ചയായി അനുമതി നിഷേധിക്കുന്ന കേരള സര്‍ക്കാര്‍ പുതിയ അണക്കെട്ട് പണിയണമെന്ന ആവശ്യത്തില്‍ ഉറച്ചുനില്‍ക്കുകയാണെന്നും. ഇത് തടയാന്‍ സര്‍ക്കാര്‍ ശക്തമായ നടപടികള്‍ സ്വീകരിക്കുമെന്നും നയപ്രഖ്യാപന പ്രസംഗത്തില്‍ പറയുന്നു. 

കൂടാതെ മുല്ലപ്പെരിയാര്‍ അണക്കെട്ട് പ്രദേശത്ത് അറ്റക്കുറ്റപ്പണികള്‍ നടത്തുന്നതിനും അണക്കെട്ടിലെ ജലനിരപ്പ് ഉയര്‍ത്തുന്നതിനുമായി നടപടികള്‍ കൈക്കൊള്ളുമെന്നും നയപ്രഖ്യാപന പ്രസംഗത്തില്‍ പറയുന്നുണ്ട്. 

കേരളവുമായുള്ള തര്‍ക്കത്തിന് പുറമെ, അയല്‍ സംസ്ഥാനമായ കര്‍ണ്ണാടകവുമായുള്ള ജലവിനിയോഗ വിഷയത്തിലും തമിഴ്‌നാട് തങ്ങളുടെ നിലപാട് കടുപ്പിച്ചിട്ടുണ്ട്. കാവേരി ജലപ്രശ്‌നത്തില്‍ മേക്കേദാഡു അണക്കെട്ട് നിര്‍മ്മിക്കാനുള്ള കര്‍ണാടകയുടെ ശ്രമങ്ങള്‍ തടയുന്നതിനും തമിഴ്‌നാടിന് സമയബന്ധിതമായി വെള്ളം ലഭിക്കുന്നുണ്ടെന്ന് ഉറപ്പാക്കുന്നതിനും ആവശ്യമായ നിയമപരമായ നടപടികള്‍ ഈ സര്‍ക്കാര്‍ സ്വീകരിക്കുമെന്ന് ഗവര്‍ണറുടെ നയപ്രഖ്യാപനത്തില്‍ വ്യക്തമാക്കുന്നുണ്ട്.

അതേസമയം, വന്ദേമാതരം ഒഴിവാക്കി തമിഴ് തായ് വാഴ്ത്ത് ആലപിച്ചാണ് നിയമസഭാ നടപടികള്‍ ആരംഭിച്ചത്. സംസ്ഥാനത്തിന്റെ ഔദ്യോഗിക ഗാനമായ 'തമിഴ് തായ് വാഴ്ത്ത്' ആദ്യവും, ദേശീയഗാനം സഭാനടപടികള്‍ക്ക് ഒടുവിലും ആലപിച്ചുകൊണ്ടാണ് പതിവ് കീഴ്വഴക്കം നിയമസഭ നിലനിര്‍ത്തി. കഴിഞ്ഞ മെയ് 10ന് മുഖ്യമന്ത്രിയായുള്ള വിജയിന്റെ സത്യപ്രതിജ്ഞാ ചടങ്ങില്‍ ഗാനങ്ങളുടെ ക്രമം മാറ്റിയതിനെച്ചൊല്ലി വലിയ രാഷ്ട്രീയ വിവാദം ഉയര്‍ന്നിരുന്നു. ഈ പശ്ചാത്തലത്തിലാണ് നടപടി.

തമിഴ്‌നാട്ടിലെ ദശാബ്ദങ്ങളായുള്ള കീഴ്വഴക്കമാണിത്. ഇതനുസരിച്ച് ഔദ്യോഗിക സര്‍ക്കാര്‍ ചടങ്ങുകള്‍ ആരംഭിക്കുന്നത് തമിഴ് ഭാഷയെ സ്തുതിച്ചുകൊണ്ടുള്ള 'തമിഴ് തായ് വാഴ്ത്ത്' ആലപിച്ചുകൊണ്ടാണ്. ചടങ്ങുകള്‍ അവസാനിക്കുന്നത് ദേശീയഗാനത്തോടെയുമാണ്. എന്നാല്‍ മെയ് 10ന് നടന്ന സത്യപ്രതിജ്ഞാ ചടങ്ങില്‍ ഈ ക്രമത്തില്‍ മാറ്റമുണ്ടായിരുന്നു. കേന്ദ്ര ആഭ്യന്തര മന്ത്രാലയത്തിന്റെ നിര്‍ദ്ദേശപ്രകാരം വന്ദേമാതരത്തിന്റെ ആറു ചരണങ്ങളുള്ള പൂര്‍ണ്ണരൂപമാണ് ചടങ്ങില്‍ ആദ്യം ആലപിച്ചത്. ഇതാണ് വിവാദങ്ങള്‍ക്ക് വഴിവെച്ചത്. തമിഴ് ഗീതം മൂന്നാം സ്ഥാനത്തേക്ക് തള്ളപ്പെട്ടതിനെതിരെ പ്രതിപക്ഷ പാര്‍ട്ടികളും ഭരണപക്ഷ സഖ്യകക്ഷികളും ഒരേപോലെ രംഗത്തെത്തിയിരുന്നു.

The government led by Vijay has stated in its policy announcement that it will not permit the construction of a new dam at Mullaperiyar and will oppose efforts by the Kerala government in this regard. The declaration underscores the long-standing differences between Kerala and Tamil Nadu over the Mullaperiyar issue, particularly concerning dam safety and water management.